3 Manatu mo Afiafi Faaleaiga e Toe Fafaga ai a Outou Ma’a Faaleagaga

Saunia e Faith Sutherlin Blackhurst

Mekasini a le Ekalesia

Tatou te manaomia uma lava ona toe fafagaina o tatou ma’a faaleagaga i aso uma. Na tusia e Elder W. Mark Bassett o le Fitugafulu e uiga i lenei manaoga i le “Vaai ma Ola Ai” (Liahona, Ian. 2018). O nei manatu mo gaoioiga e tusa ai ma lana tusiga e mafai ona fetuunai e aiga o i ai ni fanau i soo se vaitausaga mo le faaaogaina i afiafi faaleaiga.

E pei o le fanauga a Isaraelu, tatou te manaomia foi ona ao mai le “manai faaleagaga” i aso uma—tatou te tatalo, suesue i tusitusiga paia, tausi poloaiga, ma auauna atu i isi ina ia mafai ona faatasi le Agaga ma i tatou. Sue se mea e mafai ona e faaaogaina o se “manai” (faamau, meataalo, polo pepa, ma nisi mea) ma fola i luga o le fola. Fai atu i tamaiti e ao mai le manai ma tuu i totonu o se pesini. (Ina ia faafaigata laitiiti atu le taaloga, atonu e te manao e nana le manai.) Soo se taimi latou te tuu ai se fasi manai i totonu o le pesini, e mafai ona latou tuu mai se faataitaiga o se faatinoga lea e saunia se fafagaina faaleagaga. Mafaufau e faitau le Esoto 16:19–21 ma fai se talanoaga. Aisea na taua ai mo le fanauga a Isaraelu le ao mai o manai i aso uma? Ma e aisea e taua ai mo i tatou?
E pei lava o le ma’a o le taavale lea na manaomia le fafagaina i lea taimi ma lea taimi i le tala a Elder Bassett, tatou te manaomia foi ona fafagaina faaleagaga. Sue se meataalo e vili po o se moa—o se mea e tatau ona vili pe faataavili e ola ai. Vili pe faataavili le meataalo mo ni nai taimi. E faapefea ona fesootai lenei mea i le auala o tatou fafagaina ai i tatou lava faaleagaga? O le a se mea e tupu pe a tuu le viliina o le moa? Ma le isi, o le a le mea e tupu pe a tatou le tatalo pe o i le lotu? Atonu e te manao e faasino i le vaega o le “Manai Faaleagaga” o i le tusiga a Elder Bassett.
Afai o fafagaina o tatou “ma’a faaleagaga” ma malolosi, o le a mafai ona avea le Agaga Paia ma o tatou soa tumau. A o lei faia le afiafi faaleaiga, fai ni lisi se lua o ni faatinoga: (1) mea e uma ai o tatou ma’a faaleagaga (e pei o le pepelo, agaleaga i se uso/tuafafine, faamisi le suesueina o tusitusiga paia) ma le (2) mea e fafagaina i latou (e pei o le totogiina o le sefuluai, asiasi i e mama’i, ‘ai ma inu i le faamanatuga). Ia faitau leotele aitema taitasi. Fai atu i tamaiti e o i le itu tauagavale o le potu pe afai o faatinoga e uma ai o tatou ma’a faaleagaga ma le taumatau pe afai e fafagaina i latou. Fautuaina i latou e filifili le mea sa’o.