O Oe, o le Autalavou ma le Autu o le Mutuale
E mafai faapefea e le autu o le Mutuale ona tuufaatasia i tatou?
O tausaga taitasi e valaaulia ai e le Au Peresitene o Alii Talavou ma Tamaitai Talavou le autalavou e suesue, aoao e uiga i, ma faataitai se autu faatusitusiga paia ua faamaonia e le Au Peresitene Sili. O le aoaoina ma le ola ai i aoaoga i le autu o le Mutuale e mafai ona faamalosia le faatuatua ma le molimau ma tuufaatasia ia korama, vasega, ma aiga.
O Le Autu mo le 2018
O le autu o lenei tausaga ua aoaoina atu ai le autalavou i le auala e maua ai le filemu lea e sau mai ia Iesu Keriso. I le Mataupu Faavae ma Feagaiga 19:23, ua valaau mai ai le Alii, “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u.” I se lalolagi lea e mafai na faatumulia i le le mautonu ma le fefe, o se folafolaga mamana lenei folafolaga.
O lenei mau ua tuuina atu ai i matua, taitai, faufautua, ma faiaoga se avanoa e aoao atu ai i mamanu lea e mafai ona faamalosia ai le autalavou e ala i taimi faigata.
E Faapefea Ona Ou Faaaogaina le Autu?
Ua valaaulia i tatou e Au Peresitene Aoao o Tamaitai Talavou ma Alii Talavou ia tauloto mau, suesue le aoaoga faavae, ma faaaoga mataupu faavae i o tatou olaga. E ui e mafai ona faia taitasi nei mea, ae o le faia faatasi e mafai ona fesoasoani e tuufaatasia ma faamalosia ai le autalavou ma o latou aiga.
E tele avanoa e faaaofia ai le autu i olaga o tatou talavou. E mafai ona faaaoga i afiafi faaleaiga, i lesona i le lotu ma le seminare, o se autu mo lauga a le autalavou i sauniga faamanatuga, e faaleleia ai sauniga amata i le Mutuale, ma tuuina atu ai le taulaiga mo gaoioiga a le autalavou, e aofia ai tolauapiga, konafesi a le autalavou, gaoioiga tuufaatasi, Amataga Fou, ma faigalotu.
O Ni Nai Manatu mo Gaoioiga
O ni nai manatu nei mo le faaaofiaina o le autu o le Mutuale i le tausaga atoa. Mo nisi manatu, asiasi i le youth.lds.org.
“Aoao mai ia te A’u”
O le aoao e uiga ia Iesu Keriso e taua i le mauaina o le filemu ia te Ia. O loo i ai le filemu ma le faamautinoaga i le iloaina pe faapefea o Ia, aoao i le auala na Ia soifua ai, ma malamalama i mea o Ia faia mo i tatou.
Ina ua 14 ona tausaga, sa fesiligia Peresitene Spencer W. Kimball (1895–1985) po o ua ia faitauina atoa le Tusi Paia. “O le taimi lea ua tele isi tusi ua uma ona ou faitauina, o komi, ma isi tusi mananaia i le faitau, ae peitai sa faapea mai lo’u loto tausalaina, ‘O oe, Spencer Kimball, e te lei faitauina lava lena tusi paia, Aisea?’”1 Mai lena taimi, sa faamautinoa e Peresitene Kimball ua ia “[taumafa] fiafia i afioga a Keriso” (2 Nifae 32:3).
-
Mafaufau e fai atu i le autalavou e fai se api suesue e tusi ai mea o loo latou aoaoina e uiga ia Iesu Keriso ma Lana talalelei.
-
Atonu e te valaauliaina le autalavou e tautino e faia le lui a Peresitene Russell M. Nelson e “faapaiaina se vaega o [lo latou] taimi i vaiaso taitasi e suesue mea uma na fetalaia ma faia e Iesu e pei ona tusia i [tusitusiga paia].”2 I le vasega po o le afiafi faaleaiga, e mafai ona e fai atu ia i latou e lipoti mai mea o loo latou aoaoina ma le auala o loo latou faaaogaina ai i o latou olaga.
Punaoa
-
“O Le Keriso Soifua: O Le Molimau a le Au Aposetolo,” Liahona, Ape. 2000, 3.
-
Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 39–42.
-
David A. Bednar, “O Se Uiga Faa-Keriso,” Liahona, Oke. 2017, 50–53.
“Faalogo mai i A’u Upu”
O le faalogo atu i upu a le Faaola e aofia ai le le na o le faalogo ae o le gauai atu (po o le usiusitai). E mafai ona oo mai le filemu sili ma le faamautinoaga mai le iloaina o loo tatou ola e tusa ai ma Ana aoaoga.
Ina ua valu ona tausaga, sa fifili Peresitene Thomas S. Monson e faia se afi o le tolauapiga ma lana uo o Danny. E tasi se faaletonu—o le fanua sa la mananao e faaaoga e matutu, matuituia, ma tumu i vao. O le taimi lena na maua ai e Peresitene Monson talavou se manatu: “Sa ou fai atu ia Danny, ‘Pau lava le mea ta te manaomiaina o le susunu o vao nei i le afi. E tau lava na ona ta susunuina o se li’o i totonu o vao!’ Sa vave ona ia ioeina, ma ou tamoe atu ai i le matou tamai fale e aumai se afi tusi. …
“… Ou te manatua le mafaufau ai o le a mu na o le mea lea ma te mananao i ai ona tape lea e le afi ia lava i se maneta pe ā.
“Sa ou tusiina se laau i luga o se maa ma susunu loa le vao mago o Iuni ma sasao ae ai.” O le vave ona iloaina o le a le pe le afi lava ia, sa tamomoe atu ai tama mo se fesoasoani, ma sa pe le afi i nai itula mulimuli ane.
“Sa ma aoaoina ma Danny ni lesona faigata ae taua i lena aso,” na saunoa mai ai Peresitene Monson, “o se vaega tupito lava, o le taua o le usiusitai.”3
-
Fai atu i le autalavou e suesue i le mataupu e 6 o le Tala’i La’u Talalelei, e aofia ai le vaega o le usiusitai i le gaoioiga o uiga i le faaiuga o le mataupu.
-
Talanoa e uiga i mea e mafai ona faalavelave ia i tatou mai le faalogo atu i upu a le Alii. Mo se faataitaiga, e mafai ona e valaauliaina le autalavou e suitulaga le 10 minute o le taimi i masini faaeletonika i le 10 minute o le suesueina o tusitusiga paia.
-
Faaaoga avanoa e maua soo e fesili atu ai i le autalavou po o le a se mea o le a latou faia ona o mea ua latou aoaoina.
Punaoa
-
“Usiusitai,” Tala’i La’u Talalelei: O Se Taiala mo le Galuega Faafaifeautalai (2004), 131.
-
Hadley Griggs, “Sefulu Minute i le Aso,”Liahona, Sete. 2017, 58–61.
-
Robert D. Hales, “Afai Tou Te Alofa Mai ia te Au, Ia Outou Tausi Mai i Au Poloaiga,” Liahona, Me 2014, 35–38.
“Savali i le Agamalu o Lo’u Agaga”
O le aoaoina ma le faalogo e faamatala ai mea e tatau ona tatou faia. O le savali i le agamalu o Lona Agaga o le auala lea e tatau ona tatou faia ai.
O le agamalu o lona uiga o le “onosaia o le manuaga ma le onosai e aunoa ma le le fiafia,”4 o se mea e alu uma ai le malosi ma le lotomaualalo. I le 1838, na tuua ai e Thomas B. Marsh, o le uluai Peresitene o le Korama a le Toasefulua le Ekalesia, i se vaega ona o lona le fiafia i le le ‘au atu o taitai o le Ekalesia i lona toalua i se feteenaiga e uiga i le susu. I ona tausaga mulimuli ane, sa ia faanoanoa i faamanuiaga na ia misia ma toe foi mai ai i le Ekalesia ma fai mai: “E masani lava ona ou manao ia iloa pe na faapefea ona amata lo’u liliuese [sic] , ma ua ou oo i le faaiuga atonu na aluese mai i lo’u loto le Agaga o le Alii. … “… sa ou lagona le ita; ma o le aluese o le Agaga o le Alii, e pei ona fai mai Tusitusiga Paia, sa faatauasoina a’u.”5
-
Sa lei faigofie le soifua o le Faaola. Saili ni faataitaiga i mau o taimi ia na faataitaia ai e Iesu le agamalu i le feagai ai ma luitau. Talanoa pe faapefea ona tatou faaaogaina le faataitaiga a le Faaola i tulaga tatou te ono feagai ai i lenei vaitaimi.
-
O se tasi o auala e agamalu ai o le auauna atu lea i isi. Mafaufau i faatinoga eseese o le auaunaga e mafai e le autalavou ona faia taitoatasi pe i se vaega.
Punaoa
-
Ulisses Soares, “Ia Agamalū ma Maualalo le Loto,” Liahona, Nov. 2013, 9–11.
-
Neal A. Maxwell, “Meekness—A Dimension of True Discipleship,” Ensign, Mar. 1983, 70–74.
“O Le a E Maua le Filemu ia te A’u”
O le filemu e mafai ona eseese ona uiga i tagata eseese—faamoemoe o le faamalologa e mafai, mautinoa o loo i ai se auala i taimi faigata, po o le faamautinoaina o loo tatou i ai i le ala sa’o.
-
Saili ni tala i le auala na maua ai e isi le filemu ia Keriso i le Mormon.org/easter ma i itulau e 60 ma le 63 o lenei lomiga. Na faapefea ona e maua le filemu?
-
Mafaufau e matamata i le vitio o le Eseta 2017, “Alii o le Filemu,” i le Mormon.org/easter. Atonu o le a e valaauliaina le autalavou e faasoa atu le vitio i luga o le initoneti ma se molimau i le auala na latou maua ai le filemu ia Keriso.
Punaoa
-
W. Christopher Waddell, “O Se Mamanu mo le Filemu,” Liahona, Me 2016, 90–93.
-
Quentin L. Cook, “Filemu o le Tagata Lava Ia: O Le Taui lea o le Amiotonu,” Liahona, Me 2013, 32–36.