O Leo o Le Au Paia o Aso e Gata Ai
Tali i Tatalo a le Tasi ma le Isi
Ata na tusia e Allen Garns
A o tau faaiuiuina la’u misiona i le Misiona a Ilinoi Sikako i Saute sa ou mauaina se faatagaga faapitoa e asiasi atu i se eria muamua ma faia se taumafataga o le afiafi ma le aiga o Tremillo. Sa ou galue i lo latou uarota mo le tausaga atoa ma ua mafana se fegalegaleaiga ma i latou.
I le taimi o le taumafataga, na uunaia a’u e Brother Tremillo e faasoa atu se savali o le fiafia e le itiiti ifo ma le tasi i lo’u agai atu i le fale. Fai mai a ia o le a tuu e le Alii se tasi i la’u faigamalaga lea o le a manaomia ai la’u fesoasoani. Sa ou folafola atu ia te ia o le a ou faia.
Mai lena taimi i le taimi sa ou tuua ai Sikako, sa ou tatalo foi ia maua se faamautinoaga o le a talia e le Alii la’u taulaga o le auauna atu i se misiona.
Tolu vaiaso mulimuli ane, sa ou ulu atu i le vaalele lea o le a aveina a’u i le fale. A o ou agai atu i lo’u nofoa, sa tilotilo mai i luga le tagata sa i le nofoa e sosoo ma a’u. “Leai!” na ia fai mai ai. “Ou te le talitonu i ai!”
O lou manatu muamua lava, “Lelei, e ita i Mamona!” Ina ua ou nofo i lalo, sa ia tau mai o lona igoa o Keli ma o ia o se tagata faatoa liliu mai. Sa ia faaalia lona fiafia i le nofo o se faifeautalai i ona autafa. Fai mai Keli o le tagata mulimuli sa nofo i ona autafa o se tagata e tetee i Mamona ma sa le lelei le auala na ia faaalia ai ona manatu e uiga i le faatuatuaga fou a Keli. Sa popole Keli ma na i ai ni ana fesili. Sa ia tatalo mo ni tali ma le faamafanafanaga.
Sa ou tatalo i lo’u loto ma molimau atu i le moni o le talalelei ma i le alofa o le Atua mo Ana fanau e aofia ai ma ia. Sa ou tau atu ia te ia e uiga i le fautuaga sa ou mauaina mai ia Brother Tremillo. Sa ou fai atu na saunia e le Atua lenei taimi faapitoa mo ia.
Ma loimata i ona mata, sa faafetai mai Keli ia te a’u. Sa ia fai mai foi, “E mafai ona ou tau atu sa e avea ma se faifeautalai lelei ma ua talia e le Alii lau taulaga.” I lena taimi, sa ou lagona le alofa tele o le Atua mo a’u. O lo’u taimi la lea e tagi ai. Faatasi ai ma loimata i o’u mata, sa ou faafetai atu ia Keli ma tau ia te ia o ia o se tali i la’u tatalo. Sa ou taliina nisi o ana fesili, ma sa fesuiai a ma’ua tuatusi imeli.
Na tulaueleele le ma vaa ma ma talotalo faatofa atu a o ia savali atu i le isi ana vaalele. Ou te faafetai pea sa naunau le Tama Faalelagi ia faamanuia i tatou i se auala agamalu.