Suesue i Upu a le Faaola

Saunia e Peresitene Russell M. Nelson

Peresitene o le Korama a Aposetolo e Toasefululua

Mai se tusiga i le lds.org/blog.

E le gata ua ou mauaina nei se molimau sili atu i le Alii ma le Faaola, o Iesu Keriso, ae ua ou mauaina foi se faamautinoaga o lo’u tautinoga maumaututu o le metotia sa i ai ia Iosefa Samita mo le faaliliuina o le Tusi a Mamona o se meaalofa mai le Atua.

I le taimi o le faigalotu i le lalolagi atoa mo talavou matutua ia Ianuari 2017, sa ou luiina ai i latou o e sa matamata ina ia faateleina a latou molimau i le Faaola i le faaaluina o le taimi i vaiaso taitasi ia:

Suesue i mea uma na fetalai mai ai ma faia e le Faaola e pei ona tusia i le Feagaiga Tuai.
Suesue i Ana tulafono e pei ona tusia i le Feagaiga Fou.
Suesue i Ana aoaoga faavae e pei ona tusia i le Tusi a Mamona.
Suesue i Ana upu e pei ona tusia i le Mataupu Faavae ma Feagaiga.

Ou te folafola atu ia i latou o e o faafofoga mai afai o le a latou agai i luma e aoao mea uma latou te mafaia e uiga ia Iesu Keriso, o le a faatupulaia lo latou alolofa mo Ia ma mo tulafono a le Atua i le mea e sili atu nai lo le mea o latou mafaufauina.

O le mea ou te lei tauina atu i lenei lauga ou te iloa o lenei folafolaga e moni aua sa ou i ai i le ogatotonu o le faamaeaina o lenei lava foi galuega e au lava ia mo le uluai taimi.

I le aso 1 o Tesema, 2016, sa ou maua ai se seti fou o tusitusiga paia ma agai atu loa e amata le galuega lava lea na ou tuuina atu mulimuli ane i le autalavou matutua ia Ianuari. Ina ua ou faamaeaina le galuega i le ono vaiaso mulimuli ane, sa ou sueina ma makaina le silia ma le 2,200 upu sii mai tusi e fa o tusitusiga paia.¹

Mo au, o le mafai ona faataunuuina o lenei galuega o se mea mataina!

O se mea na ou iloa na sili ona manino o le tau mai lea e le Faaola ia i tatou e uiga ia te Ia Lava e ala i nei vaitaimi eseese—Feagaiga Tuai, Feagaiga Fou, o le vaitaimi o le Toefuataiga, ma o tatou aso. I tusi uma o tusitusiga paia, e tutusa tala ma o le Tusitala lava e tasi.

President Nelson studying the scriptures

Sa ou tuuto atu le tele o lo’u 93 tausaga i le aoaoina e uiga i le Faaola, ae seasea lava ona maua se taimi na ou aoaoina ai le tele o mea e pei ona ou faia i le ono vaiaso o suesuega. O le mea moni lava, sa tele mea na ou aoaoina e uiga ia te Ia mai lenei suesuega lea ua ou fuafua e faasoa atu i nisi lauga o loo i luma o loo ou sauniuni i ai i le taimi nei.²

I le amataina o lenei galuega, ou te lei mafaufau o le a fesoasoani lenei suesuega ia te au e maua ai se molimau fou e uiga i le paia o le galuega a Iosefa Samita—ae na mauaina! O faaaliga na faamaumauina e Iosefa Samita ma tala na maua i le Tusi Paia e ofoofogia le ogatusa. O se mea sili ona aoga mo a’u i le vaai i ai i lenei mea i la’u suesuega.

Atonu na le lava se taimi o Iosefa Samita e faatusatusa ai ma faafesootaia nei mea i le Tusi Paia i le televave lea na ia faaliliuina ai le Tusi a Mamona—ae o loo i ai uma iinei!

E le gata la ina ua ou mauaina se molimau maoae e uiga i le Alii ma le Faaola, o Iesu Keriso, ae ua ou mauaina foi se faamautinoaga o lo’u tautinoga maumaututu i le metotia na i ai ia Iosefa Samita i le faaliliuina o le Tusi a Mamona o se meaalofa mai le Atua.

Ia, ua ou iloaina nei o nisi o outou masalo o mafaufau ia te outou lava atonu e le lava se taimi tou te faamaeaina ai se galuega faapenei.

Ou te iloa o outou lagona. Sa ou mafaufau i le mea lava e tasi ia te au lava ia—e leai se auala e mafai ona maua ai le taimi e faia ai nei mea uma. Sa manaomia lou toe faamanatu ia te a’u lava ia faapea o se manatu faapea e le o se manatu e uunaia ai le faatuatua. O se manatu faaalia e uunaia le faatuatua e faapea “Ou te iloa e le lava sou taimi mo lenei mea, ae o le a ou faaavanoaina se taimi. Ma o le a ou faataunuuina i le taimi ua ou mauaina.”

O tatou uma o loo faia lenei lu’i o le a faamaeaina i o tatou lava taimi faatulagaina. Mo a’u, o le tele o le fiafiaga o lenei mea na oo mai i le faamaeaina i na o le ono vaiaso. O lenei suesuega malosi i se vaitaimi puupuu lava na mafai ai ona ou talisapaia le tulaga tutusa o le aoaoina o loo maua i le Feagaiga Tuai, Tusi a Mamona, Feagaiga Fou, ma le Mataupu Faavae ma Feagaiga.

Ia i latou o e atonu o lagona faapea e leai se tou taimi, afai o le a tou faia se ositaulaga, o le a tauia lelei outou ma matua faafetai mo le suia o le vaaiga, faateleina o le malamalama, ma le faaleleia loloto o lo outou liua. Ou te iloa e moni lenei mea aua ua ou vaaia ia taui lava e tasi i lo’u lava olaga.

E pei ona ou taua i le faigalotu, i se aso o i luma, o le a tou tuuina atu outou lava i luma o le Faaola. O le a lofituina outou e oo atu i le tulaga o le fetagisi i le i ai i Lona afioaga paia. O le a tou tauivi ia maua ni upu e faafetai atu ai ia te Ia mo le totogiina o a outou agasala, mo le faamagaloga o oe i soo se upu le lelei agai i isi, mo le faamaloloina o oe mai ni manuaga ma faigata o lenei olaga.

O le a e faafetai atu ia te Ia mo le faamalosia o oe e faia mea faigata, mo le liliuina o ou vaivaiga i malosiaga, ma mo le mafai ai e oe ona lua toe nonofo faatasi ma Ia ma lou aiga e faavavau. O Lona faasinomaga, Lana Togiola, ma Ona uiga auau mama o le a avea ma mea moni ma patino ia te oe.

Ae e te le tau faatali seia oo i lena taimi. Filifili nei loa ina ia avea ma se tasi o Ona soo moni. Ia avea ma se tasi e alofa moni ia te Ia, o se manao moni lava e auauna atu ma taitai e pei o Ia. Ou te folafola atu ia te outou afai o le a outou suesue i Ana upu, o le a faateleina lo outou gafatia ia avea atili ai faapei o Ia. Ou te iloa e moni lenei mea.