Faafaigofieina Po o le Malumalu: 6 Motugaafa e Faafaigofie ai Malaga i le Malumalu
E tele naua mea e mafai ona taofia mai oe mai le oo atu i le malumalu. O le i ai o se kalena faapenei ua na o se tasi lea o motugaafa mo le faafaigofieina le i ai iina lea na matou aoina mai ina ua uma ona talosagaina ni tou manatu i le Facebook. Pe e te tuuesea se taimi i lou taimi pisi faatulagaina e te alu ai lava oe ia pe e te lua malaga faatasi ma se uo ia aua ai nei alu na o ia, o nei motugaafa e mafai ona fesoasoani ia te oe i le mauaina o faamanuiaga o le auai soo atu i le malumalu.
Mo Aiga o i ai Tamaiti
Fai po o le malumalu o se po eva. Suitulaga se tasi o au po eva ma se asiasiga i le malumalu. Po o a lava fuafuaga e masani ona e faia mo le vaaiga o le fanau pe a lua o ma lou toalua i se evaga e mafai lava ona tumau ai a’o lua auai atu i se sauniga o le malumalu nai lo o se taumafataga ma se tifaga. O le a mafai pea lava ona lua faaaluina ma lou toalua se taimi lelei faatasi, ae ma se faamanuiaga faaopoopo o le auai atu i le malumalu.
Fesuiai tamaiti: Sue se isi aiga e malilie e faatulaga se aso taalo ma lau fanau a’o lua auai i le malumalu, ona fesuiai lea ma faia lena lava mea e tasi mo i latou.
Pikiniki & taaalo: E pei o le aiga mai le tusiga “O Se Faamanuiaga Folafolaina mo le Auai Atu i le Malumalu,” ia faia e avea ai ma tafaoga o se aso po o le faaiuga o le vaiaso. Ave le aiga atoa; e mafai ona auai le matua e toatasi i se sauniga o le malumalu ae alu le isi e ave tamaiti mo se pikiniki po o nisi ituaiga o meaai po o se meaai māmā. Ona auai lea o lena matua i se sauniga ae alu le matua muamua e ave tamaiti e taaalo i le paka po o se savaliga faataamilo i lotoa o le malumalu.
Mo Tagata Uma
Poloka le Taimi: Pe a faatagaina e lou taimi ma le nofoaga, ia tausia se taimi faatulagaina masani e asiasi ai i le malumalu (faalevaiaso, faalemasina, faaletausaga). O se asiasiga masani o le a faataga ai oe e fuafuaina ma fesoasoani ia te oe e faamuamua lou auai i le malumalu.
Tautino: Faaavanoa se taimi ma tautino atu i ai. Afai e te tauivi i le sailia o se taimi i lou taimi faatulagaina, taumafai i le vaveao; e masani lava ona le pisi tele ia malumalu i le amataga o le aso.
Saili se paga: Afai o e tauivi ia musuia e te auai oe lava i le malumalu, sue se uo lua te o. Aua le fefe e fesootai ia faiaoga o aiga, faiaoga asiasi, po o nisi tagata o le uarota ma talosaga atu ia i latou e auai ma oe i le malumalu.