Soka, Aso Sa, ma Oso Tuupuna Sese Faaleagaga
Mo Uili, o le filifili e aua nei taalo soka i aso Sa o lona uiga o le filifili e le taalo i se tasi o au sili ona lelei.
A o ou tamaitiiti, sa matou taaalo ma au uo i se taaloga e taua o le “Tuuoso po o le Tuumoulu.” E masani lava, pau le mea e tatau ona e maua o se vaitaele loloto po o le vaituloto ma se mea e te oso ese mai ai, e pei o se laupapa tuumoulu. Ina ia taalo ai, e te tuupuna i luga oe lava mai le laupapa tuumoulu. I le taimi e tasi, e valaau atu se tasi, “oso,” o lona uiga e te moomia ona moulu i le vai e muamua vae, pe “tuumoulu,” o lona uiga e te moomia ona moulu i le vai e muamua lima, i se tulaga tuumoulu.
A e taumafai e fai se taga ao i ai i luga o le ea, e masani lava e te iu i se gaoioiga faataamilo solo po o le faia o se tuupuna e faapalasi i le manava e tiga tele.
O le olaga e le tatau ona avea o se taaloga o le “Tuuoso po o le Tuumoulu.” E mafai ona e faia le tele o faaiuga i le taimi vave ma aloese mai le tele o tuupuna faaleagaga sese. E lei faapea mai, le perofeta o Le Feagaiga Tuai o Iosua, “Ia filifili ia a o lei tuai.” Na ia saunoa mai, “Ina filifili ia o outou i le aso nei po o ai tou te auauna i ai” (Iosua 24:15; faaopoopo le faamamafa).
Uili W., 14, mai San Francisco, Kalefonia, ISA, masalo e le faia le tele o ni tuupuna faaleagaga sese aua na te talitonu i le faia o filifiliga a o lei tuai.
“A e faia le filifiliga e faia po o le le faia o se mea ae e te lei feagai ma le tulaga, e sili atu ona faigofie,” o lana tala lea. “Ae a pe a e alu i se pati ae avatu e se tasi se mea inu ia te oe. Afai e tatau ona e filifili e faia pe ia talia pe le talia, atonu e faaosoosoina oe e talia. Ae afai na e filifili i se taimi ua leva e fai atu leai pe a ofo atu e se tasi se meainu ia te oe, e te lagona le sili atu o le mautinoa ia te oe lava. E te le maua lava le taimi e faaosoosoina ai. E te fai atu leai aua ua uma ona e filifili i ai i se taimi ua leva.”
Ua faapea mai le mau autu o le Mutuale 2018, “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u” (MF&F 19:23). Mo Uili, o le filemu o lona uiga o le lagona lototele a o filifili le mea sao ma e lei popole i tala le lelei mai i isi tagata. E oo mai lena filemu ia Uili mai le faia o le faaiuga e faalogo i—ma usitai vave i—afioga a Iesu Keriso.
“O isi taimi e taufaalili mai tamaiti ia te au mo mea ou te faia po o le le faia, ae ou te le afaina moni ai aua sa ou filifili i se taimi ua leva o le auala lea o le a ou ola ai,” o lana tala lea.
O se tasi o mea na filifili i ai Uili ma lona aiga i se taimi ua leva o le tausia o le aso Sapati ia paia. Sa tau faigata ina ua lavea Uili i se au maualuga o le soka. E pei ona fai mai Nifae, na talitonu lona aiga e faapea “E le aumai e le Atua ni poloaiga i le fanauga a tagata, sei iloga Na te saunia le ala mo i latou ia mafai ai e latou ona fai le mea ua Ia poloaiina ai i latou” (1 Nifae 3:7).
Ia Uili, o le soka se tasi lea o mea aupito i taua i lona olaga. Fai mai lona tina, “Na te ai, inu, moe, ma fiafia i le soka. O le mea e fiafia i ai o ia ma e lelei tele ai o ia.”
Ina ua avea Uili ma se tasi o le au sili ona lelei i le eria, sa fiafia o ia. Na o le pau lava le faafitauli: e taaalo le au i le tele o ana taaloga i le aso Sa. O le tele o au e le taliaina se tagata taalo e misi taaloga uma o le aso Sa. O le filifili ia le taalo i aso Sa o lona uiga o le aveesea o lona tulaga i le au.
Ae sa faia e Uili lena faaiuga i se taimi ua leva. E na te tausia le paia o le aso Sapati.
E tatalo faatasi Uili ma lona aiga ma tau atu i le Tama Faalelagi o latou manaoga e tausi Ana poloaiga ma ole atu mo Lana fesoasoani. Ona talanoa lea o Uili ma lona tina i faiaoga o le au e uiga i lo latou talitonuga. I lo la maofa ai, sa mananao faiaoga ia Uili i le au e tusa pe na te le taalo i aso Sa!
“Ou te iloa a ou faamamaluina le Sapati, e faamanuiaina au,” o le tala lea a Uili. “Atonu ou te le taalo i le tele o taaloga e pei o isi tagata taaalo, ae ua ou vaaia faamanuiaga, e pei o taaloga i aso Sa na faafuasei ona sui i se isi aso. Ou te manatu foi ou te taalo lelei atu ona e i ai sau aso e malolo ai.”
E sili atu ona manaia lenei tala. E lei pine ae iloa e Uili o se tasi o ana au taaalo o se tagata foi o le Ekalesia. I le mavae ai o ni nai masina o le taaalo faatasi, sa mulimuli leisi tama i le faataitaiga a Uili ma tuu foi le taalo i le aso Sa.
A e lagona e te le o mauaina faamanuiaga o le usiusitai, atonu ona e te le o mafai ona vaai i mea uma ua faapolopoloina e le Tama Faalelagi mo oe. O le filifili e faalogo i afioga a Keriso ma auauna atu i le Alii o se faaiuga sao lava, ia faia nei lena faaiuga!
“Ou te aioi atu ia te outou, ina ia faia nei loa lava se faaiuga iinei, i le taimi nei, e le aluese lava mai le ala lea o le a tau atu i lau sini: o le ola e faavavau ma lo tatou Tama i le Lagi,” na saunoa mai ai Peresitene Thomas S. Monson (“O R e Tolu o Filifiliga,” Liahona, Nov. 2010, 68).
Aua le faia lou olaga o se taaloga o le “Tuupuna po o le Tuumoulu.” Aua nei i ai i se tulaga lamatia faaleagaga poo soo se isi lava ituaiga tuupuna e faapalasi i le manava. Ia filifili nei e mulimuli ia Iesu Keriso ma olioli i le filemu Na te aumaia i lou olaga.