2018
O La’u Tatalo i le Taualuga
January 2018


O Leo o Le Au Paia o Aso e Gata Ai

O La’u Tatalo i le Taualuga

Ata
man on the roof

Ata na tusia e Carolyn Vibbert

I se tasi aso timuga, sa ou alu ai i le potu i luga o le fale ma iloa ai se tutulu. Sa liki mai le vai i pito fao i le va o faalo e lua. I tausaga ua mavae, sa ou faia le tele o lipeaga i lo’u fale ma sa ou le fefe e taumafai ni galuega faatino fou. Ae o le taimi lenei sa ou feagai ma tauiviga faaletagata lava ia ma le leai o se talitonuga. Sa ou lagona le leai o se malosi faalelagona e faaleleia ai le tutulu, e ui sa ou iloa e tatau ona faaleleia a o lei oo mai le taumalulu.

I le vaiaso po o le lua mulimuli ane, sa ou alu i luga o le taualuga ma se tamai naifi, se naifi mafolafola, ma se fana faapipii e tumu i le ta o le taualuga. Sa ou faapea na o le fia maua lava o le mea o loo tutulu ma ufiufi loa i le ta. Peitai e leai ma sou iloa po o fea tonu le mea o loo tutulu. Sa ou lagonaina le lotovaivai. Sa ou tu ma faia se tatalo, ole atu i le Alii e taitai a’u i le nofoaga sa’o ina ia mafai ona ou lipeaina le tutulu. Sa ou faamoemoe o le a Ia faaali mai ia te a’u le nofoaga. Ae, e tasi lava le upu na oo mai i lo’u mafaufau: sue.

E le o se tali lea sa ou manao i ai, peitai sa amata ona ou tilotilo solo. Sa taulai atu ou mata i se ala savali. Sa ou aumaia i lalo ni tamai faaputuga oge e lua i autafa o le ala savali ma iloa atu ai le mea na foliga mai o le mafuaaga lea o le tutulu. Sa ou aveesea mai le ta tuai ma matutu ae tuu i ai se vaega tele o le ta fou. Sa ou suia ia faaputuga oge, ma i le itiiti ifo ma le tasi le itula ua maea la’u galuega. Na mouese atu ou lagona popole, ma sa ou maua le fiafia e uiga ia te a’u lava mo le mea sa ou faia e foia ai le faafitauli. I le taimi o le isi timuga, sa ou vaavaai i le potu i luga mo ni tutulu ma iloa ai o loo mago!

Sa ou mafaufau ia Oliva Kaotui, o le sa “lei mafaufau i ai ae nao [le] ole mai” (MF&F 9:7). E pei o ia, sa ou faamoemoe o le a na o le tuu mai ia te a’u e le Alii o se tali vave i la’u tatalo e aunoa ma so’u taumafaiga. Ma sa ou mafaufau i le faafiafiaina o lo’u agaga ina ua ou tuuina atu i ai sau lava taumafaiga e “suesue i ai” (MF&F 9:8)—ia saili. Sa ou aoao o le a le faia e le Alii mea uma mo i tatou. O le a Ia fesoasoani ma taialaina i tatou, ae ua faamoemoeina foi i tatou ina ia faia mea uma e mafai ona tatou faia mo i tatou lava aua e aumaia ai le tuputupu ae faaletagata lava ia.

Lolomi