Moronae ma le Enisinia Taavale
Saunia e Elder Claudio R. M. Costa
O le Fitugafulu
“Ma o le a taitaiina i latou e le tamaitiiti” (2 Nifae 30:12).
I le tele o tausaga ua mavae, sa agai atu ai lo matou aiga i le fale i São Paulo, Pasila, ina ua uma ona asia ni tagata o lo matou aiga. A o matou agai atu i luga o le auala vaapiapi, na pe le matou taavale.
Sa matou taumafai e toe faaola mo le tele o minute. Ae sa le ola. Sa pasia i matou e lea taavale ma lea taavale. E leai se tasi na tu e fesoasoani mai.
Na iu lava ina ou fai atu i lo’u aiga e tatau ona matou tatalo. Sa fai mai lo’u atalii e ono tausaga o Moronae, “Aua e te popole, Tama. Ua uma ona ou tatalo.”
“O le a se mea na e tatalo ai?” Sa ou fesili ai.
“Sa ou tatalo i le Tama Faalelagi ina ia sau le tagata sa’o e fesoasoani ia i tatou,” na ia fai mai ai.
E lei umi ae vaaia i tua atu o lo matou taavale ni moli susulu e lua. O se loli toso taavale. O le avetaavale o se enisinia taavale.
“Matua laki lava outou,” o lana tala lea. “Ua maea la’u galuega mo le aso ma o loo ou agai atu i le fale.”
Sa ia faia le matou taavale. Ona ia mulimuli mai lea ia i matou e faamautinoa ua matou taunuu saogalemu i le fale.
Sa ou fesili ia Moronae pe na te iloa le taua o lenei mea. “Ioe,” o lana tali mai lea. “Sa faalogo le Tama Faalelagi i la’u tatalo. O lea la ua i ai lau lava molimau! Ou te le toe tau nonoina mai ia te oe, Tama.” Sa ootia lo’u loto i le faataitaiga faamaoni a Moronae.
Ua matua nei Moronae, ae ou te manatua pea lana faataitaiga lelei a o ia laitiiti. E oo lava i se tamaitiiti, e mafai ona e avea ma se faataitaiga i lou aiga ma uo.