O Se Faamanuiaga Folafolaina mo le Auai i le Malumalu
E alala le tusitala i Iuta, ISA.
Sa ou manao ina ia auai atili i le malumalu—ou te lei iloa o le a faamanuia ai lo’u aiga.
I nai tausaga ua mavae, na asiasi mai ai Peresitene Oldroyd, o se tasi o le au peresitene o le siteki, i la’u uarota ma fai mai se mea o le a ou le faagaloina lava: “Ou te folafola atu ia te outou afai tou te auai i le malumalu, o le a faamanuiaina soo se vaega o lou olaga.”
A o ou mafaufau e uiga i ai, sa ou le mafaufauina pe faapefea e le auai i le malumalu ona pai atu i soo se vaega o lo’u olaga. Ae ina ua maea le lotu, sa ou filifili pea o le a ou faataitaia lana lui ma auai i le malumalu i se tulaga faifai pea. Sa ou manao e tofotofo i lana folafolaga. Sa manao lo’u toalua ia alu soo i le malumalu, ae sa ou musu ona sa i ai le ma fanau laiti. E tatau ona ma o i se itula ma le afa i le malumalu o San Antonio, Texas, faataunuu se sauniga o le faaeega paia, ma toe foi i le fale. E lei fetaui le talosaga atu i se tasi e vaai le ma fanau mo le fitu po o le valu foi itula.
O Le Amataga o se Faamanuiaga
I le taimi muamua sa ma taumafai e fesuiai le tausiga o tamaiti ma se isi aiga, ae e iu lava ina ma’i se tasi po o le i ai o se mea e tupu. Sa ma fuafua e tatau ona ma setiina ni aso mo le tausaga atoa ma o! Ona ma mauaina lea o se metotia o le “pizza ma le taaalo”. Matou te tietie faatasi atu i le malumalu. E alu le tasi matua i se sauniga o le malumalu ae alu le isi e ave tamaiti e faatau mai se pizza. Ona ma fesuiai lea: e alu le matua lona lua e faia galuega o le malumalu ae alu le isi matua e savalivali ma tamaiti i le lotoa o le malumalu. Na lelei lenei faiga. Na iloa e le ma fanau e taua le malumalu ia i matou—sa latou iloa isi mea semanu e mafai ona matou faia i le Aso Toonai—ma sa mafai ona matou faaaluina le taimi faatasi o se aiga.
Ou te lei iloa o le alu i le malumalu o le a faamanuia ai lo’u aiga. Ina ua mavae le o soo mo le silia ma le tausaga, sa ou saofai i se sauniga ae ou iloa atu se tamalii e pipili. Sa ou manatu o se tulaga faagaeetia lona i ai iina. I le agai atu i fafo o le malumalu, sa ou vaai ia te ia o saofai latalata i le pakaga taavale, o lea sa ma mafaufau ai ma lo’u toalua o le a ma o atu e faatalofa i ai.
Sa fesili le tamaloa i lo’u toalua, o Chad, ma a’u pe mafai ona ma fesoasoani ia te ia e faia se valaau i le telefoni. Sa ma ioe e fesoasoani atu, ma sa tau e le tamaloa ia Chad le mea sa i ai lana telefoni. Sa vili e Chad le numera mo ia ona toe tuu atu lea o le telefoni ia te ia. Sa le mafai ona aapa mai le tamaloa i le telefoni, e ui sa ia ataata mai ma le agalelei. Sa tilotilo i lalo Chad i lima o le tamaloa, lea na faamau i lana nofoa faatavalevale, ma vave ona iloaina sa manaomia lona uuina o le telefoni i luga o lona taliga. O le auaunaga o le pasi o le aai lea sa tatau ona pikiina le tamaloa ua tuai. Sa matou nonofo ma talatalanoa ma ia sei taunuu mai lana pasi. Sa lofituaina i maua, e ui i ona luitau, ae sa ia i ai i le malumalu. Oka se lelei o ona uiga. Sa ia te ia se ataata fiafia. Ae na te lei aluese atu, sa fesuiai a matou faamatalaga taufesootaiga ma iloaina ai o lona igoa o Max Para.
Afai e mafai e Brother Para ona aumai o ia i le malumalu, e mafai foi ona ma avatua i maua i le malumalu—e leai ni alofaga!
O Le Faataitaiga a Brother Para
Sa ma filifili e asiasi ia te ia i le masina na sosoo ai o se vaega o le ma asiasiga i le malumalu. Sa ma valaau atu muamua, ma fai mai e mafai ona ma o atu i totonu pe a ma taunuu i lona fale. Sa ma tietie atu i San Antonia ma mauaina Brother Para i se tamai fale. Sa ia taoto i luga o lona mega ma se ie paepae o loo ufiufiina lona tino seia oo i lona auvae. Sa ia faaminoiina lona ulu i le itu ma talanoa mai ia i maua, o ataata fiafia mai pea o ia. Na ia tau mai ia i maua le mafuaaga na ia pipili ai ina ua ia pau mai se taualuga i le vaitau o lona 30. Sa ia faasoa mai lona tauiviga ma lana molimau.
O se asiasiga e tasi le taimi ia Brother Para na liua i tausaga o asiasiga. Na avea o ia ma se vaega taua o le ma olaga. Ma te lei iloa po o le a se mea e fai mo ia—e tetele ona luitau. Pau le mea na ma iloa o le avea ma ana uo. E mafai ona ma aumaia ia te ia ni meaalofa laiti: o se ata o le Faaolaga, o se CD o le Tusi a Mamona i le faaSipaniolo, o se ata o le malumalu, o se taga moli felesi. E mafai ona ma asiasi ia te ia, usu ni pese Peraimeri, ma faalogo atu ia te ia. Oka o se aafiaga ofoofogia lenei mea—e le mafai ona e tuuina atu se nutiga falaoa i le Alii e aunoa ma le mauaina mai o se papa falaoa.1
Sa ia aoao mai ia i maua le loto faafetai, lea na suia ai soo se vaega o o maua olaga. Sa ma aoao ia maua le lotofaafetai mo lo ma malamalama i le talalelei, mo le ma fegalegaleaiga ma le Atua; mo le ma malamalama i le ata o le faaolataga; mo o tatou fale, taavale, meaai ma lavalava; mo lo tatou gafatia e faaaoga o tatou tino; mo le avanoa e faia ai ni mea lelei mo o tatou nuu ma alalafaga; ma mo tagata lelei o siomiaina i tatou. Na suia e Brother Para lo ma faauigaga o upu faigata ma le tofotofoga. Ua i ai mafuaaga tatou te olioli ai i le tele o a tatou faamanuiaga ma ia faaaoga na faamanuiaga e siitia ai isi.
Aoao e Auauna Atu
I se tasi taimi a o i ai Chad i le malumalu ma se tasi o maua uo, Brother Gonzales, sa ia toe vaai foi ia Brother Para i le malumalu o faatalitali mo se veni e sau e avatu o ia. Na umi se taimi sa faatali ai Brother Para. Na filifili Chad ma Brother Gonzales la te momoliina Brother Para i le fale. Sa i ai ia Brother Gonzales se loli tele lanu uliuli. I le taimi lava lena, sa tu ai se taavale ua tumu i ositaulaga mai lo matou siteki, ma sa latou fesoasoani e tuu le nofoa faatavalevale mamafa i tua o le loli. Ona la siiina lea o Brother Para i totonu o le loli, ma faamau lona fusipau, ma taofi o ia ina ia aua nei ona pau. Ou te matea o se aso matagofie lena aso mo Brother Para—na te lei mafaufauina o le a ia malaga i le fale i lana loli na moemiti i ai!
O Faamanuiaga i Soo Se Auala
I le ma asiasiga mulimuli i le Malumalu o San Antonio ae matou te lei siitia ese atu, sa mafai ona ma asiasi ia Brother Para. I lenei asiasiga faapitoa mulimuli, sa avatu ai lo matou aiga atoa e Brother mo se taumafataga o le afiafi.
Sa ou matua faafetai sa ou faataitaia le folafolaga a Peresitene Oldroyd. Semanu e le feiloai lo matou aiga ia Brother Para pe ana ma lē auai i le malumalu. Ua avea au ma se tagata ese—ua ou avea ma se tagata e finagalo le Alii ia ou avea ai. A tatou faamuamua le Alii ma auai i le malumalu, o le a faamanuiaina o tatou olaga i soo se auala.