O Se Tali moLusia
E alala le tusitala i Kalefonia, ISA
Sa le mautonu Lusia e uiga i le tala a lana faiaoga. O ai e mafai ona fesoasoani?
“O tusitusiga paia ou te fiafia i ai, O taimi uma lava ou te faitau ai, le Agaga moni e tau mai” (Tusipese a Tamaiti, 66).
Sa solo ese e Lusia se loimata. Na te lei manao e vaai i ai isi tamaiti. Sa ia tuua le aoga ma nanati atu agai i le fale.
Sa nofo Lusia i se motu laitiiti matagofie. E na o ia le tagata o le Ekalesia i le aoga. Sa o uma isi tagata o lona aiga i le lotu e tasi. Sa latou taufaalili ia Lusia ma le taaalo ma ia aua sa ese o ia.
Sa le na o le pau lena o le faafitauli. O nisi taimi sa le amanaia e le faiaoga Lusia pe a sii lona lima.
“Ae o ananei o se aso sili ona leaga!” O mafaufauga ia o Lusia. Sa ia kikia le maa laitiiti i le auala. I le taimi o le vasega, sa faitau ai e le faiaoga ni fuaiupu o le Tusi Paia lea sa le malamalama ai Lusia. Sa pei na latou fai mai o le Tama Faalelagi, Iesu, ma le Agaga Paia o se tagata e toatasi. Ona fai mai lea o le faiaoga sa i ai nisi o ekalesia e le talitonu i le mea sa aoao mai e le Tusi Paia. Sa ia vaai sao atu ia Lusia. Sa talie tagata uma i le vasega.
Sa lē mautonu Lusia. E le [ni Atua] mavaevae le Tama Faalelagi, Iesu, ma le Agaga Paia? O le a ea le mea o loo tupu?
Sa faafuasei lava ona ia maua se manatu fiafia. E mafai ona ia fesili i faifeautalai! Sa o mai i le nuu a Lusia i aso uma. “O le a la iloa le auala e fesoasoani mai ai!” sa ia mafaufau ai.
Ina ua taunuu Lusia i le fale, sa ia vaai ia Sister Brown ma Sister Ruiz. Sa la fesoasoani e pamu le vai i luga i se tane i luga o le taualuga o le fale.
Sa fai atu loa e Lusia lana fesili i le taimi lava lena. “Aisea e fai mai ai le Tusi Paia o le Tama Faalelagi ma Iesu o le tagata e toatasi?”
Na ataata Sister Brown. “O se fesili lelei lena. A maea le ‘aiga o le aoauli ona tatou vaai lea i ni mau e fesoasoani ai.”
Sa tau le tofoina e Lusia le manaia o le sitiu ropa vieja na fai e Mama. Na o le pau le mea na ia manao ai o le tali!
Na iu lava na maea le ‘aiga o le aoauli. Sa tatala e Lusia ma faifeautalai a latou tusitusiga paia. Sa latou faitau e uiga i le faaaliga a Iosefa Samita. Ona latou faitau lea e uiga i le papatisoga a Iesu. O mau uma na faaali mai ai o le Tama Faalelagi, Iesu, ma le Agaga Paia e mavaevae.
“Ae aisea e fai mai ai isi mau o i latou e tasi?” na fesili ai Lusia.
Sa amata ona susue e Sister Brown ia itulau. “Sei o tatou faitau i le Ioane 17. O iina sa tatalo ai Iesu i le Tama Faalelagi e uiga i Ana Aposetolo.”
Sa latou auaua’i uma i le faitauina. I tusitusiga paia, sa tatalo Iesu “ia tasi” Ana Aposetolo e pei ona tasi o Ia ma le Tama Faalelagi. Sa faitau e Lusia ni taimi eseese se tolu sa Ia fetalai ai.
“E le mafai ona avea Aposetolo uma ma tagata e tasi,” o le tala lea a Sister Ruiz. “Ae e mafai ona avea i latou ma tagata e tasi i le auala latou te talitonu ma amioa’i ai. O le auala lena e tasi ai le Tama Faalelagi, Iesu, ma le Agaga Paia.”
Sa amata ona lagona e Lusia le mafanafana i totonu. Sa ia iloaina o le Agaga Paia. Sa Ia tau atu ia te ia, e moni le mea na tau atu e Sister Ruiz.
Sa le’i avea le Tama Faalelagi ma Iesu o se tagata e tasi. Ae sa tasi i Laua i mea sa La fetalai atu ai ma faia. Ma sa iloa e Lusia sa La alolofa ia te ia.