Filemu ia Keriso

Saunia e Au Peresitene Aoao o Tamaitai Talavou ma Alii Talavou

Po o a lava ou tulaga, e mafai lava ona e maua le filemu ia Iesu Keriso.

I se lalolagi ua faatumulia i le vevesi, manatu faatautava, faaosoosoga, ma le fenumiai o filosofia, o le mauaina o le filemu e le faigofie i taimi uma. Peitai o le folafolaga a le Faaola o loo maua i le Mataupu Faavae ma Feagaiga 19:23 (o le autu o le Mutuale 2018) ua tuuina mai ai se auala faapitoa i le filemu: “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u.”

I le avea ai ma Au Peresitene Aoao o Tamaitai Talavou ma Alii Talavou, matou te molimau atu ai i le moni. Ua matou vaaia i o matou lava olaga, ma afai e te mulimuli i lenei mamanu, o le a faataunuu e le Atua Lana folafolaga o le filemu i lou foi olaga.

Atonu o le toatele o outou o le a lagona le atuatuvale ma le popole po o a ni mea o i ai i le lumanai mo outou. O le toatele o outou o le a mafaufau e uiga i tou foliga, tomai, ma gafatia. Peitai po o le a lava le mea o le a fetaiai ma outou, o le a outou maua le filemu. E le faapea o le a vave ona mouese atu na fesili po o popolega, ae o le a mafai ona e lagona le faamautinoaga filemu o le a lelei mea uma. O le mea sili ona taua, o le a mafai ona e lagona le alofa o Iesu Keriso mo oe lava ia, ma e aumaia e lena mea le filemu sili.

Sei o tatou talanoa e uiga i vaega taitasi o lenei mau.

Aoao mai ia te A’u

O le iloaina o le Tama Faalelagi ma Iesu Keriso o se vaega taua tele o lau faigamalaga i le olaga. Na fetalai mai Iesu, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3). A o amata ona e iloaina lelei Keriso, o le a e malamalama i Lona lelei, atamai, agalelei, ma le alofa. O le a tuputupu ae lou faatuatua ia te Ia, ma o le a i ai sou manaoga silisili ia mulimuli ia te Ia ma le Tama Faalelagi.

Faalogo Mai i A’u Upu

Ua fetalai mai Iesu Keriso e ala mai i tusitusiga paia, perofeta soifua, ma le Agaga Paia. E manaomia lo tatou taumamafa, mafaufau loloto, ma faaaoga nei afioga i o tatou olaga. I au suesuega i afioga a le Faaola, taulai atu i le Tusi a Mamona aua “o le tusi silisili ona sa’o i tusi uma lava o i le lalolagi, ma o le maa auau o la tatou ekalesia,” na aoao mai ai Iosefa Samita, “ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi.”¹ O le valaaulia mamana a Peresitene Thomas S. Monson i le konafesi aoao ia Aperila 2017 mo i tatou ina ia faitau le Tusi a Mamona i aso uma o le a fesoasoani ia i tatou e faalogo ma malamalama i afioga a Keriso.²

Savali i le Agamalu o Lo’u Agaga

O le faalogo i afioga a le Faaola e faatoa amata ona suia ai i tatou pe a tatou naunau e usiusitai i ai. E manaomia ai e lenei mea le agamalu i la tatou vaega. E manaomia ai lo tatou lafoai o o tatou lava ala ae savali i Lana ala. O nisi taimi tatou te mafaufau ai ua sili atu le tatou ala. Ae a tatou agamalu ma mulimuli ia te Ia i soo mea Na te taitai ai i tatou, o le a tatou i ai pea i le ala sili ona lelei.

O Le A E Maua le Filemu ia te A’u

O le folafolaga matagofie lenei: afai o le a e faia nei mea e tolu—aoao, faalogo, ma savali faatasi ma le Faaola—o le a e maua le filemu i lou olaga. O le a e maua le faamautinoaga o loo i ai le Atua i ou autafa ma o le a Ia leoleoina oe, e ui i soo se popolega, le mautonu, po o vaivaiga o ia te oe. E mafai ona e maua le talitonuga—e le na o ia te oe lava ae ia Iesu Keriso foi ma Lona alofa ma le mana.

Matou te valaaulia le autalavou uma o le Ekalesia ina ia tauloto lenei mau. Faaaoga o se taiala i lou olaga. Pe a siomia oe e puao o le pogisa ma foliga lofituina, o le a mafai ona e mafaufau i lenei mau, mulimuli i lona mamanu, ma taulaina oe lava i le faavae mausali ma mautinoa o Iesu Keriso lea.