O La Tatou Avanoa
Sa Ou Tuuina Atu Lo’u Faatuatua ia Galue
Ata na tusia e David Malan
Sa faasalaveia le ma taaloga ping pong ma la’u uo o Erfrey e ni tuitui se tolu i lana faitotoa. Sa ou lagona se leo e le masani ai ma se faaleoga ese o le gagana Hiligaynon, o lo matou gagana masani.
Sa faatopetope atu Erfrey i le faitotoa, ma o le mea moni sa faatalitali ia i latou. “Sau!” sa ia fai mai ia te a’u. “Ou te manao e te feiloai i a’u uo!”
Sa la ofuina ni ofutino papae ma fusiua ma sa o mai e aoao atu le uso laitiiti o Erfrey e saunia o ia mo le papatisoga. Sa ou talanoa atu ia i laua i le Igilisi, ma sa faagaeetia i laua i le fesili mai pe mafai ona ou faaliliu i le la lesona ma le uso o Erfrey.
Sa ou manatu o lau matafaioi e tau lava na o se faaliliu. Peitai sa avea a’u ma se tagata auai mataalia a o gotouga ifo a laua upu i lo’u loto. Sa ou maua se lagona e lemafaamatalaina, o se lagona fiafia tumau ou te lei mauaina muamua.
Ina ua mavae lena aafiaga, sa ou talosaga i faifeautalai e aoao lo’u aiga. Peitai ina ua la o mai, sa mautu le faaiuga a o’u matua e leai se nofoaga a se Mamona i totonu o lo matou aiga.
Sa ou fia papatiso, o lea sa ou tuuina ai lo’u faatuatua ia galue. Sa ou anapogi ma tatalo. Sa ou tauivi ia avea ma se faataitaiga ia i laua.
Lua tausaga mulimuli ane, e ala atu i lo’u lava faatuatua faatauvaa ma le lagolagosua alofa a le Tama Faalelagi, na iu lava ina faamaluluina le loto o lo’u tama ma sa ia sainiina le faatagaga mo lo’u papatisoga. Ou te fiafia e ta’u atu o la’u molimau e uiga i le talalelei toefuataiina o la’u meatotino sili lea ona taua.
Arnel M., Negros Occidental, Filipaina
Mai le Peraimeri i Tamaitai Talavou
E masani lava ona ou iloaina le faigata e faamasani ai i ni tulaga fou. O le mafuaaga lena na ou popole ai e tuua le Peraimeri ae amata i Tamaitai Talavou. I le taimi muamua sa ese le faatulagaga ia te a’u. O Tamaitai Talavou o se siosiomaga ese atoa lava—leai ni taimi e pepese ai, leai se taimi mo fetufaaiga. Sa faia foi le matou Mutuale i le aluga o le vaiaso.
Sa na o lo’u fia ofi i totonu ma lagona le toafimalie, o lea sa ou tuu atu ai i la’u lisi fou se avanoa. Sa ou tatalo soo, ma amata ona ou faamasani i le faiga masani fou ma fesootai ai ma isi tamaitai talavou.
A o faagasolo vaiaso, sa amata ona ou iloaina le mafuaaga ua ou i ai i le polokalama a Tamaitai Talavou. Sa ou aoao atili e uiga i le talalelei, sa ou maua le tele o avanoa e maua ai sina agalelei i vaiaso taitasi, ma sa mafai ona ou alu i le malumalu ma lagona le Agaga o le Alii i Lona maota.
O lea ua ou matua faafetai ai mo Tamaitai Talavou. Ua ou fiafia sa ou tuuina i lenei suiga se avanoa ma sa fesoasoani mai le Tama Faalelagi ia te a’u i le faataunuuina.
Bethany W., Florida, ISA
O Se Agaga Mama: E Sili Atu le Taua nai lo se Tauvaga
I le vasega valu, sa ou i ai i se kalapu faitautusi. O masina taitasi matou te feiloai ai e talanoa i se tusi, ma i le faaiuga o le tausaga sa faia ai se matou tauvaga e vaai po o fea o ‘au e tele mea e iloa e uiga i tusi taitasi. E tasi le tulafono matou te mulimuli i ai o le faitau lea na o tusi mama.
I le masina e tasi, a o amata ona ou faitauina le tusi e sosoo ai, sa ou lagona e pei e le mama. Peitai e tatau ona ou faitauina pe afai ou te manao e malo la’u ‘au i le tauvaga. E le mafai ona ou faatoilaloina i latou. I ni nai mataupu mulimuli ane, sa faateteleina le leaga o le tusi. Na iu lava ina ou tuuina i lalo. Na ou iloa e le mafai ona ou faitauina—na sili atu le taua o lo’u mama faaleagaga nai lo le malo i se tauvaga.
Peitai sa ou matua popole lava e tau atu i la’u ‘au. O le po a o lumanai le fonotaga a le matou kalapu, sa ou tatalo i le Tama Faalelagi ina ia fesoasoani mai ia te a’u ia maua le lototoa e talanoa atu ai ia i latou.
O le aso na sosoo ai sa ou matua popole lava. Sa ou nofo i lalo ma la’u ‘au. O le taimi lava na amata ai le fonotaga, sa ou tau faamatala atu i tagata uma e le mafai ona ou faitauina le tusi. Peitai ae ou te lei fai atu, sa tu i luga le taitai ma faamalie mai. Sa faamalamalama mai na te lei faitauina muamua le tusi a o lei tuuina i totonu o le matou lisi o tusi ma e na te lei iloaina mea sa i ai i totonu. Fai mai o ia o le a ia aveesea mai le lisi. Ina ua ou taunuu i le fale, sa ou faafetai i le Tama Faalelagi.
Ou te iloa afai tatou te ola e tusa ma o tatou tulaga faatonuina, e leoleoina i tatou e le Alii. Na te le foia i taimi uma le tulaga e pei ona Ia faia mo a’u, ae o le a Ia tuuina mai pea ia i tatou le lototoa e faia ai filifiliga lelei.
Ashleigh A., Iuta, ISA