Ia Faasusulu Atu Lou Malamalama
Saunia e Peresitene Thomas S. Monson
Mai le “Be a Light to the World” (faigalotu a le Iunivesite a Polika Iaga i le aso 1 Nov., 2011), speeches.byu.edu.
Na tatou o mai uma i le lalolagi ma le Malamalama o Keriso. Ua tuuina mai ia i tatou ina ia faamumuina pea ma faasusulu atu lo tatou malamalama mo isi ia vaai i ai ma mulimuli i ai. O se tasi o auala sili ona lelei e tausia ai le faatuatua tatou te manaomia o le suesue lea i tusitusiga paia ma le tatalo.
A o e tausia pea le afi o le molimau ina ia faamumuina pea ma le malamalama, o le a avea oe ma se malamalama faailo o le amiotonu mo tagata uma ia vaai i ai. Na fetalai mai le Faaola: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16).
O o tatou avanoa e susulu atu ai e le faatapulaaina. Latou te siomiaina i tatou i aso taitasi. A o tatou mulimuli i le faataitaiga a le Faaola, o le a avea i tatou ma se malamalama i olaga o i latou o vagaia i tatou—po o ni tagata o tatou lava aiga, a tatou uo, po o ni tagata e le masani ai.
E mafai ona avea i tatou ma se malamalama i le lalolagi. E pei lava o le kiina o le ki o se moli i totonu o se potu pogisa o le a faatumulia ai le potu i se malamalama, o le avea ma se faataitaiga o le amiotonu lea e mafai ona fesoasoani e faamalamaina se lalolagi ua faateteleina le pogisa.
A’u uo e, e mafai ona tatou avea, e pei ona fai mai le Aposetolo o Paulo, “o se faaaoao i e ua faatuatua” (1 Timoteo 4:12). E mafai ona iloaina i tatou e le aunoa o ni soo o Keriso ma avea “o ni malamalama i le lalolagi” (Filipi 2:15).