Lucas ma le Tagata Saua
Na lelei lagona o Lucas i ana upu na fai atu … seia oo ina ia vaaia foliga o Pedro.
“Fai upu alofa i le tasi, i mea uma tatou te i ai” (Viiga, nu. 147).
“Auoi, leai! Lea ua sau Pedro!”
Ua iloa uma e tagata i le aoga o Pedro o se tagata saua. E lapoa, ma agaleaga! Na te tauvalaauina isi tamaiti i igoa, ave a latou meaai, ma tuli faataamilo i latou i le lotoa o le aoga. E leai ma se isi e fia sōsō ia te ia.
Na savali atu Pedro i talaane o Lucas ma lana uo, o Afa. Sa ia valaauina i laua o “toilalo popo” ma tulei Afa.
Ua le lavā Lucas i le agaleaga o Pedro. E aunoa ma le mafaufauina, sa ia ee atu, “Soia, Pedro!”
Sa le talitonu Lucas. Sa ia tali atu i le tagata sili ona saua i le aoga!
Na osofaia e Pedro Lucas ma uu lona ofutino. “O le a lau tala?” Na matua televave le tata o le fatu o Lucas ma na foliga o le a oso mai i fafo o lona fatafata! “O le a ou tuu atu ia te oe se lapataiga e tasi,” o le tala lea a Pedro. “Ae ia e faaeteete!” Sa ia tuleia Lucas ma savali ese atu.
Talu mai lena taimi, sa faia e Lucas le mea sili e aloese ai mai ia Pedro, ae e maua lava o ia e Pedro i taimi uma. Sa ia taofia Lucas mai taupega, tulei o ia i le taimi o le togi ga ‘ia, tapa o ia i le fale’aiga, ma fai atu e le aunoa ni mea leaga ia te ia.
I se tasi aso sa taaalo ai Lucas ma Afa i le polo lakapi a Afa. Sa oso mai Pedro i tua atu o laau ma faoina.
“Faamolemole toe aumai,” o le tala lea a Afa.
“O ai na te fosia au e toe avatu?” Na tulei e Pedro Lucas i se laau ma ata.
Na lagona e Lucas le tolotolo ifo o lona ita. Sa matuai ita lava o ia. “E te iloa oe, Pedro?” Na fai atu ai Lucas. O oe o se tamaitiiti sili ona leaga ua ou iloa! E leai se tasi e fiafia ia te oe. E moomoo tagata uma maimau pe ana e aluese atu!”
Sa le toe ata Pedro. Na lelei lagona o Lucas i ana upu na fai atu … seia oo ina ia vaaia foliga o Pedro. O le mea ea o le a tagi o ia? Sa vave ona tilotilo i lalo Pedro ma savali ese atu.
Na lagona vave e Lucas se lagona le lelei. Mo le vaega o totoe o le aso, po o le a lava lona taumafai, sa le mafai e Lucas ona aveese lenei lagona le lelei. O lena po sa ia feminoiai solo a o ia moe. Sa ia mafaufau pea i foliga faanoanoa o Pedro.
“Aisea na le fiafia ai Pedro?” O mafaufauga ia o Lucas. “Na te le popole pe ia agaleaga i isi tamaiti. Na tatau ona ou fai atu se tala, e a e sao?” O le tele o le mafaufau i ai o Lucas, o le tele foi lea o lona iloaina e sa’o o ia i le tali atu mo ia ma lana uo. Ae na sese o ia i le fai atu o na upu le lelei.
Sa tootuli Lucas i autafa o lona moega ma ole atu i le Tama Faalelagi ia faamagalo o ia. Sa ia tau atu i le Tama Faalelagi na te le toe manao lava e faatiga ni lagona o se isi tagata. Sa ia manao ia agalelei. Ina ua fai atu Lucas “amene,” na ia iloa le mea e tatau ona ia faia.
Ina ua mavae le taumafataga o le aoauli, na maua e Lucas Pedro o tu faalagolago i le puipui na o ia. Sa popole Lucas. O le a le mea o le a fai e Pedro? Na manava tele i totonu Lucas ma savali atu.
“A, faamagalo mai a’u e uiga i le mea na tupu ananafi.”
Sa foliga te’i Pedro. “Faamagalo oe?”
“Ioe. Sa ou fai atua ni upu le lelei ia te oe, ma e sa le tatau ona ou fai atua. Ou te faamalie atu.”
Sa sioa Pedro i lalo i ona seevae. “E le Afaina.”
Na tatagi le logo. Na amata ona toe savali atu Lucas i le vasega. Sa lelei atili ona lagona. Ae sa i ai se isi mea e tasi sa ia fia tau atua. Sa ia toe faliu i tua. “E mafai ona tatou taaalo lakapi i le malologa taeao pe a e manao ai.”
Na oso ae se ataata laitiiti i foliga o Pedro. “Ia, manaia lena.”
Ina ua mavae lena mea, na amata ona lelei atili mea ma Pedro. Sa ia saua lava i nisi o taimi, ae sa le tutusa. Na oo lava ina la taaalo ma Lucas i ni nai taimi o le malologa. Ma sa malie! I le faaiuga o le tausaga aoga, sa tau atu e Pedro ia Lucas o le ia masii ese atu. Ona ia fai mai lea o se tala na faateia tele ai Lucas.
“Faafetai mo le avea ma a’u uo,” o le tala lea a Pedro. “E oo lava i le taimi na ou le lelei ai.”
O le lagona mafana sa i totonu o le loto o Lucas na tau atu ia te ia o le agalelei o le filifiliga sa’o lava lea i taimi uma.