O le Taliaina ma le Faailoaina o Taiala Faalelagi
Saunia e Elder Adilson de Paula Parrella
O le Fitugafulu
Ua finagalo le Atua e tuuina mai ia i tatou le taitaiga, ae e tatau ona tatou mananao ma saunia e taliaina.
I le avea ma faifeautalai talavou i le nofoaga tutotonu mo le aoaoina o faifeautalai i Brazil, sa i ai se aso sa tofia ai i matou e o, o ni soa, i auala o São Paulo e valaaulia tagata e faalogo i lesona a faifeautalai. Ina ua maea ni nai itula sa matou toe foi atu i le MTC ma faia se sauniga molimau.
E toatele sa talanoa mai e uiga i musumusuga sa latou mauaina e o atu i se auala patino po o le faafeiloai atu o se tagata patino. Na lagonaina le ofoofogia o nei aafiaga ia te a’u. Ae peitai, talu ai sa leai sa’u aafiaga faapea, sa ou lagona ai atonu e le i lava lo’u lelei, pe lava saunia, e avea ma faifeautalai.
I le lagona ai o le lotovaivai, sa ou saili atu ai se fesoasoani mai le au taitai o le NAF. Sa latou fesoasoani mai ia te a’u ou te malamalama o le Atua e finagalo e tuuina mai ia i tatou faatonuga e ala i le Agaga Paia, ma e ui ina le tutusa lo’u aafiaga ma aafiaga o isi, sa manaomia pea ona ou agavaa mo le taitaiga a le Agaga. E pei lava o se leitio e manaomia ona ki i se alaleo patino, po o se telefoni feaveai e manaomia ona fesootai i le upega tafailagi, e tatau foi ona tatou ogatasi ma fesootai ina ia mafai ai ona mauaina le mea e fesootai mai e le Agaga Paia ia i tatou.
Ola Tumau Faaleagaga
Na tuuina mai e Peresitene Russell M. Nelson le lapataiga lenei: “I aso a sau, o le a le mafai ona ola tumau ai faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.”1
Na ia uunaia i tatou e “aapa i tua atu o [o tatou] tomai faaleagaga o i ai nei e maua ai faaaliga faaletagata lava ia, aua ua folafola mai e le Alii e faapea ‘afai e te [saili] mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau’ [Mataupu Faavae ma Feagaiga 42:61].”2
A o tatou faimalaga ai iinei i le lalolagi, o loo faamoemoe mai le Alii tatou te “faia mea e tele i lo [tatou] lava loto malie, ma aumai le amiotonu tele” (Mataupu Faavae ma Feagaiga 58:27). Ae peitai, o nisi mea e faato’ā mafai lava ona tatou faataunuuina faatasi ma le fesoasoani a le lagi. O le a faaalia mai e le Agaga Paia ia i tatou mea e tatau ona tatou faia e tumau ai—ma agai pea i luma—o le ala i le fiafia i lenei olaga ma ia maua le ola e faavavau. “Aua faauta, ou te toe fai atu ia te outou, afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia” (2 Nifae 32:5).
O Le Mamanu a le Alii
Ua faamalamalama mai e tusitusiga paia le auala e tuuina mai ai e le Alii ia i tatou faaaliga faaletagata lava ia: “O le a Ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (Mataupu Faavae ma Feagaiga 8:2).
Ua fetalaia mai foi le Alii ia i tatou “ia tuu atu lou faalagolago i le Agaga lena lea na te taitai ia fai mea lelei” (Mataupu Faavae ma Feagaiga 11:12). O nisi taimi o le a taitaia i tatou e le Agaga e faia mea lelei e ala i mafaufauga, manatu, o se faasologa o manatu, faalogona e taofia le faia o se mea pe amata ona faia se mea, manatu loloto po o le malamalamaaga, o le tatala maia o mea ia e le mafai ona tatou aoaoina i le na o lo tatou lava gafatia, le manatuaina o mea ua galo, ma isi.3
I le Kalatia 5:22–23, tatou te aoao ai faapea e masani ona fesootai mai le Agaga Paia e ala i lagona ma faalogona e pei o le alofa, olioli, filemu, onosai, mataalofa, agalelei, faatuatua, agamalu, ma le le gaoiā. O le fesoasoani tatou te maua mai i le Agaga Paia o le a faifaipea ona oo mai o ni faatonuga patino lava ia i tatou mo o tatou manaoga patino, ae ia manatua, o nei ituaiga o taitaiga o le a faatosinaina i tatou e faia le lelei (tagai i le Moronae 7:13) ma o le a ogatasi i taimi uma ma aoaoga a perofeta soifua ma tusitusiga paia.
Maua ma Iloa
Atonu o se tasi o luitau autu tatou te feagai i le olaga faitino o le iloa lea ona maua, iloa, ma usitai i uunaiga ma taitaiga mai le Agaga Paia. Atonu e fesoasoani lesona nei ia i tatou.
Lesona 1: O loo finagalo le Alii e tuuina mai ia i tatou faaaliga faaletagata lava ia, ae e tatau ona tatou saunia e taliaina.
“O se tasi o mea na uunaia soo e le Agaga i lo’u mafaufau talu mai lo’u valaauga fou o le Peresitene o le Ekalesia,” na saunoa mai ai Peresitene Nelson, “o le naunau o le Alii e faaali mai Lona mafaufau ma Lona finagalo. O le avanoa o le mauaina o faaaliga o se tasi lea o meaalofa silisili a le Atua i Lana fanau.”4
I le NAF, sa ou aoao ai e tatau ona ou saunia e talia soo se mea sa finagalo le Alii e tuuina mai ia te a’u, i Lona taimi ma Lana ala. Sa ou aoaoina e faapea o mea faalavelave e mafai ona mafua ai ona matuā faalavelavea i tatou ma o le a lē mafai ai ona tatou iloaina le taimi e fetalai mai ai le Alii ia i tatou pe faalogo ai ma le faaeteete i le savali e finagalo o Ia tatou te lagonaina.
O Elder David A. Bednar o le Korama a Aposetolo e Toasefululua sa saunoa mai, “A o tatou naunau i ai ma valaaulia le Agaga Paia i o tatou olaga ma aoao e vave ona usitaia musumusuga faigofie, o le a mafai foi e i tatou ona poloka ese atu leo faalavelave o le lalolagi ae tulimatai ma le manino i musumusuga a le Agaga Paia.”5
Lesona 2: E tatau ona tatou suesueina ma aoaoina pe faapefea ona galue le gagana a le Agaga.
O Elder Ronald A. Rasband o le Korama a Aposetolo e Toasefululua na saunoa faapea, “E tele lava ina fesootai mai le Agaga o se lagona. “E te lagonaina i upu e te masani ai, e iai se uiga ia te oe, lea e uunaia oe. …
“… O nei lagona e mālū, o se uunaiga e faatino, ia faia se mea, ia fai atu se upu, e tali atu ai i se auala faapitoa.”6
O le aoao e talia faaaliga mai le Agaga Paia e ono faatusatusa i le aoaoina o se gagana. Muamua lava e laitiiti se mea tatou te malamalama ai pe masalo e matuā leai lava se mea. Ae ao tatou faaauau pea ona tuu atu i ai i tatou lava, tatou te pikia mai ni upu, ona oo ai lea i fuaiupu, ona oo ai lea i manatu atoatoa. E iu lava ina tatou iloa ane ua tatou malamalama i mea o loo talanoaina. Ina ia aoaoina le gagana a le Agaga, e tatau ona tatou:
-
Naunau e Aoao.
-
Suesue, i tusitusiga paia ma i upu a perofeta soifua, le auala e taliaina ai faaaliga.
-
Ia faalogo lelei i faalogona faaleagaga.
-
Ole atu i le Atua e auina mai ia i tatou le taitaiga e ala i le Agaga Paia.
-
Ia loto e talia—ae le o le lē amanaiaina pe manatu māmā i ai—i faatonuga ua maua.
-
Usitai i musumusuga.
-
Ia saili ma le filigā ia maua taiala faaopoopo.
Lesona 3: E i ai i le Tama Faalelagi Lana lava ala ma le taimi e tuuina mai ai ia i tatou faaaliga.
O le lesona lenei e aafia ai mataupu faavae e tolu:
-
E mafai ma o le a faailoa mai e le Atua ia i tatou mea e fai e alualu ai i luma. O le galuega a lo tatou Tama Faalelagi o le fesoasoani mai lea ia i tatou e maua le ola e faavavau (tagai i le Mose 1:39). “Ua [Ia] popole e le gata mo lo tatou mafanafana ae sili atu foi mo lo tatou alualu agai i luga ,” na saunoa mai ai Peresitene Henry B. Eyring, Fesoasoani Lua i le Au Peresitene Sili.7
O lona uiga e popole le Tama Faalelagi i a tatou laa e faia iinei i le fogaeleele. E silafia e Ia po o a faaiuga e tatau ona tatou faia ma a foi galuega e tatau ona tatou fai ina ia “mafai ona avea [tatou] ma atalii [ma afafine] o le Atua” (Moronae 7:48). E sili atu i lo mea e mafai ona e mafaufauina, e finagalo o Ia ia e ausiaina lou taunuuga—ia toe foi atu i lou aiga faalelagi i le mamalu,” o le saunoaga lea a Elder Dieter F. Uchtdorf o le Korama a Aposetolo e Toasefululua.8
-
O nisi taimi tatou te lē malamalama i le mafuaaga mo faatonuga faalelagi. E i ai taimi o le a auina mai e le Atua faatonuga tatou te le i mafaufauina. Ou te manatua lo’u nofo ai i se sauniga faamanatuga ina ua oo manino mai se uunaiga i lo’u mafaufau. O le faatonuga e le o se leo po o se musumusu ae o se manatu manino e ta’u mai ai se mea e tatau ona ou faia. Sa ou le mafaufauina ou te mauaina lea ituaiga faatonuga i le taimi o le sauniga faamanatuga.
Sa ou liliu atu i lo’u toalua ma ta’u atu ia te ia le uunaiga lea faatoa ou maua lava. Sa faailoa mai e ia e tatau ona ou usitai i le uunaiga, e ui lava ma te le i malamalama i le mafuaaga i ona tua atu.
A o ma usitai i lena faatonuga, ma a o faagasolo pea le taimi, sa ma mauaina nisi molimau o le taitaiga sa ma mauaina na aumaia ia i maua le filemu sili atu ma faamautinoa ai lo ma’ua tumau ai i le ma ala o le tuputupu ae.
-
E tatau ona tatou loto e faia le finagalo o le Atua. I Lona atoatoa ma Lona poto, e silafia e le Atua le mea e sili ona lelei mo i tatou. E faavae i se silafaga faalelagi, o le a Ia faaali mai ia i tatou se auala e sili atu. Ae o le a tele taimi e luitau ai i tatou. I lenei mea, e pei ona i ai i mea uma, o le Alii o Iesu Keriso o lo tatou faataitaiga atoatoa. Sa Ia faia le finagalo o le Tamā ma Ona finagalo. A o puapuagatia le Faaola mo a tatou agasala, sa Ia tatalo ai, “Lo’u Tama e, afai e mafai, ia ave ese lenei ipu ia te au; ae aua le faia lo’u loto, ao lou finagalo” (Mataio 26:39).
E tatau foi ona tatou loto e faamuamua le finagalo o le Atua i luga atu o o tatou lava faanaunautaiga. A o tatou taliaina Lona finagalo ma faia, ua tatou saunia ai i tatou lava e maua isi taitaiga faaopoopo. Sa aoao mai Elder Bednar faapea “a tatou faamamaluina a tatou feagaiga ma tausi i poloaiga, a o tatou taumafai atili e le aunoa e faia mea lelei ma atili ona lelei, e mafai ona tatou savavali ma le mautinoa o le a taialaina e le Atua a tatou la’a.”9
Mauaina O Le Fesoasoani A Le Lagi
O lo tatou alualu i luma e faavavau e faalagolago i lo tatou mauaina o faaletagata lava ia o le taitaiga mai le Agaga Paia. Ia tatou taitoatasi ma finafinau e mulimuli i le fautuaga a Peresitene Nelson e saili faaaliga mo o tatou olaga. A tatou talitonu ma faatuatuaina e finagalo le Atua e auina mai ia i tatou le taitaiga e ala mai i le Agaga Paia, ona, a o tatou filigā e faaogatotonu i o tatou olaga le tuliloaina o le fesoasoani a le lagi, o le a tatou maua le taitaiga tatou te manaomia.