Tatou Te Soona Saua ia i Tatou Lava

Saunia e Heather White Claridge

O loʻo sili atu lou lelei nai lo le mea e te manatu i ai.

E alala le tusitala i Iuta, ISA.

O le toatele o i tatou e tauivi i tikeri eseese ma lagona e pei e le o lava i tatou pe ua le lava foi galuega ua tatou faia. I taimi eseese i lo’u olaga, sa ou oo ai i lenei lagona. O se tasi o nei taimi sili ona faamomoiloto na latalata i le faaiuga o lau misiona.

Sa ou i ai i se tasi o aʻu konafesi faamisiona mulimuli, ma e pei ona masani ai, na faasoa mai e loʻu peresitene o le misiona se savali na ia mauaina mai se faifeautalai. O nisi taimi e malie savali, o nisi taimi na latou musuia, ma o nisi taimi na latou faamaonia ai se manatu. O lenei savali atonu o le a musuia, ae nai lo lena, na matua faigata ia te au. Sa ia faasoa mai le lelei ona talisapaia e lenei faifeautalai o lana soa. Sa ia faasoa mai le tele o le alofa ma le agaalofa na lagona e lenei faifeautalai mai lana soa ma o se faataitaiga ofoofogia na i ai lana soa i lenei faifeautalai. A o ou faalogo, sa ou lagona le naunau tele i loʻu agaga e avea e faapei o lena soa. Sa ou matuai moomoo lava ina ia mafai ona ou agaalofa ma faia lena mea lelei. Ona ou lagona ai lea o le lotovaivai tele ina ua ou iloa ou te le faapena.

E le o a’u lea, ma e le o a’u lava lea. E leai se taimi mo aʻu e sui ai, ma afai e i ai, atonu o le a le mafai ona ou faia.

I se taimi mulimuli ane i lena aso, ina ua ma toe foi ma laʻu soa i lo ma potu, na ia faasino i le vaega tonu o le lauga a le matou peresitene o le misiona lea na matuai nutimomoia ai lava aʻu ma faailoa mai na ia tusia lena mea e uiga ia te au. O ana upu ia e faatatau ia te au. Sa ou tilotilo atu i se mea e leai se gataaga, pogisa, ma moomoo maimau pe ana ou avea ma ituaiga tagata ou te manao e avea ai—ma le toilalo. Ae o ana upu na euina se malamalama, ma nai lo le leai o se mutaaga, sa ou i luma o se faaata e vaai i se ata o au lava ia e pei ona ou i ai muamua. O ana upu na taua tele ia te au. O le mafai ona ia mafaufau o a’u o se tagata agalelei e pei o lē sa ta’ua i le tusi na faatumulia ai a’u i le olioli.

Ou te faasoaina lenei aafiaga e le o le mitamita—e taua tele ia te a’u o lea ou te lē mitamita ai—ae ina ia faaalia le le talafeagai (ma i le tele o taimi e sese) o lo tatou soona saua ia i tatou lava. Sa ou faaaogaina le viiga mo a’u e faitioina ai au’ lava ia!

E le o faapea atu foi e mafai ona taofi lo tatou taumafai ia avea atili faapei o Keriso. Ou te leʻi mafaufau, “Manaia, e mafai ona ou aveesea loʻu popole i tagata. Ia, aua le toe popole i lena mea.” Ae manaʻomia ona tatou iloa ma faʻaalia le alualu i luma ua tatou faia ma e sili atu lo tatou taua nai lo le tatou mafaufauina i nisi o taimi. E pei ona saunoa mai Elder Dieter F. Uchtdorf o le Korama a Aposetolo e Toasefululua, “E toatele o loo ola ma le manatu e le tele so latou taua, ae o le mea moni, o i latou o ni foafoaga tamalii ma faavavau, e le uma lo latou taua ma ua i ai ni agavaa e le mafaitaulia.”¹

O lea, faamolemole, taofi mo sina minute ma ia tomanatu i ni mea lelei na e faia ma uiga na e atiina ae pe o agai atu i le auala e atiaʻe ai. Manatua e talia oe, e alofaina oe, ma ua lava oe.

Ma afai e i ai nisi mea e te le o lagona moni lava ua e ausia pe mauaina, galue i ai ina ia ausia. Aua le fiu. Ioe, seti ni sini, ae aua le tuuina atu ni tapulaa i le taimi e mafai ai ona e avea atili e faapei o Keriso—o le mea lena na ou faia. Sa ou vaai faalemafaufau i se puipui o taofia mai au mai le suiga ina ua uma laʻu misiona, ae e tusa lava pe le o faatatau ia upu matagofie ia te aʻu, o le faaiuga o laʻu misiona e le faapea o le faamoemoe uma o le faaleleia ua uma.

E le faigofie i taimi uma ona i ai lea ituaiga mafaufau—o le mafaufau e lē lava mea tatou te mafaia. Ou te manaʻomia pea faʻamanatu ia aua nei ou vaai maualalo ia te a’u. Ae ia manatua o lou taua e maoa’e i le silafaga a le Atua (tagai MF&F 18:10). Ia manatua o oe o se atalii/afafine o le Atua, ma ia manatua o i tatou, “o ni fanau a le Atua, … e le tatau ona taʻufaatauvaaina pe faalumaina i tatou lava.”² Taumafai i taimi uma e avea atili e faapei o Keriso, ae aua nei e soona faitio ia te oe lava. Atonu o le a sili atu lou vavalalata i le tagata e te manao ia avea ai nai lo le mea na e manatu e mafai.