Ol Blesing blong Gat Wan Gospel Lukluk long Tingting

I Kam long Elda Gary E. Stevenson

Blong Kworom blong Olgeta Twelef Aposol

I kam long wan toktok, “A Gospel Perspective,” we i kamaot long Brigham Yang Yunivesiti–Hawae long 19 Septemba 2017.

Blong lukluk long tingting wetem gospel bae i givim wan moa klia andastaning long olsem wanem yu stap tingting long ol samting we i kam faswan long laef blong yu, wokemaot ol problem, mo fesem ol temtesen blong yu wan.

I wan bigfala blesing tru blong stap olsem ol memba blong Jos Ia blong Jisas Kraes long taem ia we ol ki blong kingdom i kambak bakegen mo ol profesi oli kamtru we i mekem yumi save witnesem fastaem “gospel bae i rol i go long evri ples, kasem taem hem i fulumap ful wol, olsem wan ston we i kamaot hemwan long bigfala hil we i stap rol i go, kasem taem hem i gro, i fulumap ful wol” (Doktrin mo Ol Kavenan 65:2).

Profesi ia, we i kam long Daniel long OlTesteman i ripitim hemwan long taem blong naoia, i olsem i stap long medel blong i kam tru evriwan taem yumi stap luk ova long 3,300 stek insaed long Jos tedei. Long ol 50 yia i pas, membasip insaed long Jos i gro stat long 2.1 milian mo i bitim 16 milian.¹

Gro mo jenis ia we i mekem mi glad be tru samting i we ol prinsipol mo ol praktis blong gospel i stap semmak nomo, mo tu plan ia blong God blong kam olsem Hem mo kasem laef we i no save finis we Jos Ia blong Jisas Kraes i soemaot long yumi. Plan ia i mekem ol stek oli save kam tugeta, mo long wei ia oli “save difendem olgeta, mo blong oli stap long wan sef ples long taem blong strong win, mo long taem blong bigfala nogud kros, hemia long taem we bae mi kapsaetem ful paoa blong hem long ful wol”(Doktrin mo Ol Kavenan 115:6).

Ol brata mo sista, Lod i gud tumas wetem ol blesing we Hem i stap givim long yumi. Blong stap andastanem se ol blesing oli wan risal blong fasin blong yumi blong stap obei long ol komanmen, mo blong stap obei long ol komanmen i wan fasin blong yumi blong soemaot lav blong yumi long Lod, olgeta samting ia oli ol impoten step blong yumi lanem. Ol gospel prinsipol olsem olgeta ia, oli givim wan impoten lukluk long tingting blong yumi.

Hemia i lid i go long tu poen we mi wantem tokbaot bigwan. Mi tekem not se Presiden Dallin H. Oaks, Fas Kaonsela long Fas Presidensi, i bin serem tufala poen ia wetem ol yang singgel adalt long 2015.

Holemtaet Wan Gospel Lukluk long Tingting

Presiden Oaks i bin talem se “lukluk long tingting i minim blong luk evri samting we i tru insaed long wan rilesensip we i gat mining, blong gat lukluk ia we i fulwan.”² Hemia sam samting yu andastanem taem yu lukluk long wan gospel tingting:

Yumi ol pikinini blong wan Papa long Heven we i gat fulap lav (luk long Doktrin mo Ol Kavenan 76:24).
Yumi stap long wol ia from wan stamba tingting, wetem paoa ia blong mekem ol joes (luk long 2 Nifae 2:27; 10:23).
“From i mas nid, se i mas gat wan fasin blong go agens long evri samting” (2 Nifae 2:11).
Jisas Kraes i Sevya blong yumi mo loya long fored blong Papa (luk long 1 Jon 2:1; Doktrin mo Ol Kavenan 110:4).

Tekem se wanem bae i hapen sapos lukluk long tingting blong yu wetem gospel i kam olsem glas blong lukluk blong yu lukluk tru long evri samting long laef blong yu. Blong lukluk long tingting wetem gospel bae i givim wan moa klia andastaning long hao yu stap tingting long ol samting we i kam faswan long laef blong yu, wokem aot ol problem, mo fesem ol temtesen blong yu wan. Hemia i save jenisim evriwan long olsem wanem yu stap fesem ful laef blong yu mo ol defren kaen desisen we bae yu mekem folem rod.

Wetem lukluk ia, yumi save se Lod i wantem blong yumi tekpat long sakramen evri wik mo yumi stadi ol skripja mo prea long Hem evri dei. Antap long hem, yumi save se Setan bae i temtem yumi blong no folem Sevya blong yumi o lisin long ol toktok blong Tabu Spirit. Nao bae yumi luksave moa se devel i trae had blong tekemaot paoa blong joes blong yumi mo paoa blong save stanap agensem ol hadwok blong hem tru long adiksen, mo tu ol drag mo ponografi.

Long narasaed, glas blong lukluk blong gospel i givim yumi wan lukluk we i klia long olsem wanem i impoten blong mekem ol famli—blong jus blong mared mo tijim ol pikinini long stret mo gud fasin. Lukluk ia, i openem tu ol ae blong yumi blong luk se enemi i wantem spolem evriwan famli yunit mo i konfiusum ol rol blong man mo woman, mo long wei ia, i daonem valiu, insaed long ol ples blong sosaeti, long saed blong mekem mo bildimap ol famli.

Kipim wan balens long Saed blong Spirit

Presiden Oaks i bin talem: “Taem ol yang adalt oli gat wan lukluk long tingting—lukluk ia we i fulwan—hem i impoten blong oli kipim balens long saed blong spirit long ol laef blong olgeta. Blong mekem hemia, yu mas stap longwe long ol samting blong wol we i pulum yu, mo tu, yu mas mekem ol samting we i nid blong kam kolosap moa long Sevya.”³

Long wan saed, yu mas gat fulap problem we i stap trabolem yu mo ol samting blong laef we oli kam faswan long evri saes mo kaen, we oli nidim atensen, wan lukluk nomo mo daereksen. Lis blong wanwan long yufala bae i defren smol folem ol situesen blong yuwan, be long medel blong hem bae u mas faenem edukesen, wok, mared, mo stap gud long saed blong ol filing mo bodi. Yes, jalenj blong yu i blong balensem ol impoten wok long laef agensem olgeta long saed blong spirit.

Presiden Oaks i bin givim advaes ia se yu mas lukaot gud taem “yu stap planem taem blong yu blong mekem se yu no hanggri ded long saed blong spirit taem ol stamba aktiviti we yu plan from oli stap lukluk long nara samting. Prinsipol ia i eksplenem from wanem nao hemia i impoten speseli blong ol yang singgel adalt, blong folem kaonsel blong go long ol miting blong Jos, givim seves insaed long Jos, mekem skripja stadi evri dei, nildaon blong gat famli prea evri dei, mo wok long ol koling blong Jos.”⁴

Long medel blong ol nid blong yuwan mo narafala samting, blong balensem ol gol blong laef wetem ol jalenj blong yu long saed blong spirit, bae yu kam blong luksave se yu save balens. Lod i no askem yu blong mekem wan samting we yu no save mekem i hapen. Mi bin harem Thomas S. Monson (1927–2018) fulap taem, hem i kaonselem se “hem we Lod i kolem, Lod i kwalifaem hem.”⁵ Mi ting se hemia i speseli blong ol memba blong Jos.

Mi promes se wan long bigfala merikel long taem blong yu long wol ya hem i paoa blong yu blong faenem balens bitwin ol narafala impoten wok blong yu long saed blong spirit wetem long laef. Hemia i save tekemples long wan wei we bae i mekem yu save kipim ol impoten wok blong yu long saed blong spirit mo laef long wan stret ples be tu, i save gro mo develop long tugeta saed blong ol impoten eria ia.

Bigfala risen from wanem hemia i posibol i from Lod hem i senta blong evri samting. Hem i senta poen blong balens. Mo Hem nao i gat tru intres long yuwan olsem wan long ol pikinini blong hem. Be risal ia bae i kamaot folem traehad mo lukluk wan nomo blong faenem balens blong yu.

Long lukluk mo eksperiens blong miwan, i luk olsem truaot long laef blong yumi, yumi stap stap strong nomo long wan wei o narawan. Blong stap balens long laef blong yumi, i nidim traehad mo kea blong yumi evri taem. Jusum fasin blong stap strong mo no muvmuv.

I save go tugeta wei. I maet gat ol taem we bae yu faenem se yu nid blong praktisim blong stap kea blong stap lukluk nomo long skul o wok blong yu, wetem blong givim “seves long Jos long taem blong Jos seves nomo.”⁶ Be, tingbaot blong kipim Lod olsem senta blong evri samting blong yu blong mekem se yu save faenem stret balens long saed blong spirit.

Lod Bae i Helpem Yu

Taem yumi kipim wan lukluk long tingting wetem Gospel, hem i isi blong andastanem ol stamba trutok se Lod bae i helpem yumi. Wan gospel prinsipol i we yumi ol pikinini blong wan Papa long Heven we i gat lav. Hem i nomol blong Tufala i helpem yumi long evri wei blong gobak long hom blong yumi long Heven.

Mi wantem serem samfala eksampol wetem yufala long hao Lod i save helpem yu. Wan long ol yut lida blong mi, Thad Carlson, i bin serem wetem mi fulap yia i pas. Thad, we i bin lus i no longtaem, i gat wan bigfala paoa long mi taem mi bin stap gro i kam antap. Hem i bin groap long Bigfala Taem blong Mane I Sot. Hem i namba naen pikinini aot long olgeta 14. Famli blong hem i mekem laef wetem fam mo fidim buluk. Hem i bin wan hadtaem long saed blong mane, mo bigfala mane blong olgeta hem i ol buluk blong olgeta.

Long yang taem blong Thad, wan long ol responsabiliti blong hem, hem i blong kea, mo taem i nid, mekem evri buluk i kam wan ples blong mekem sua se oli jusum bes buluk—wan bigfala wok blong wan yang boe. Hem i save mekem hemia wetem help blong wan yang hos blong ronem buluk we i save stret wanem blong mekem wetem smol daereksen nomo. Yang hos ia nem blong hem Old Smoky. Be Old Smoky i gat wan rong: hem i neva wantem blong yu kasem hem. Evri taem taem wan i kam kolosap long hem, bae hem i ronwe, from hem i save se bae oli mekem hem i wok.

Wan dei, afta we oli kasem Old Smoky, oli strapem hem mo sidaon long hem, yang Thad i ron i go aotsaed long ol gras we ol buluk oli stap kakae long hem. Graon i drae, mo ol gras tu oli drae, be Thad i luksave se gras we i stap aotsaed long fanis long saed blong rod blong rod blong tren i moa longwan mo grin moa. Hem i tingting se bae hem i mekem ol buluk i kam tugeta aotsaed long fanis mo letem ol buluk oli enjoem sam gudfala kakae long saed blong rod blong tren.

Wetem help blong Old Smoky, Thad i mekem ol buluk i kam tugeta aotsaed long fanis, mo oli stat blong muv i go fored mo biaen long saed blong rod blong tren mo kakae ol gras ia we i moa gud mo grin. Ol buluk ia we oli hapi i luk olsem oli lukaotgud olgeta wan, i mekem Thad i kam aot long hos blong hem mo sidaon long rop blong hos, mo stap enjoem ol samting raon long hem, mo stap pleplei mo laflaf hemwan. Hem i stap lukluk mo drim long ol grin gras ia hemwan, be, Old Smoky i stap wokbaot i go sloslo, mo ol rop blong hem i kamaot andanit long Thad.

Taem ia we i naes tumas mo fulap long pis i kam blong stop taem Thad i harem wan laod noes i kam longwe. Hem i wesil blong wan tren we i stap kam stret long rod blong tren we ol buluk blong hem oli stap olbaot stret long fored blong hem! Hem i luksave se ol risal bae oli nogud tumas long ol buluk mo tu long famli blong hem sapos hem i no mekem wan samting hariap blong karem ol buluk i gobak insaed long fanis, longwe long tren we i stap kam. Hem i filim se bae hem i neva save fogivim hemwan blong no mekem wok blong hem long wan responsabiliti we oli trastem hem wetem.

Kwiktaem Thad i jam mo ron blong holem ol rop blong Old Smoky. Old Smoky i luk we Thad i stap kam mo kwiktaem hem i stap ronwe long hem, mo no wantem blong oli kasem hem. Win blong hem i sot mo hem i wari tumas, wetem ol pikja blong ol ded buluk mo bigfala lus blong famli blong hem long maen blong hem, Thad i save se hem i mas mekem wan samting kwiktaem.

Afta hem i bin raetem daon wanem i bin hapen: “Praemeri tija blong mi i bin tijim mifala blong prea mo mekem strong bakegen ol tijing we mi lanem long mama blong mi. Mi nomo gat wan nara rod, mi foldaon long ni blong mi mo stat blong prea from help blong oli kamaot long ol rod.”

Thad i no bin harem wan voes, be wan klia tingting i bin kam long hem: “Luksave hao ol buluk oli save wokbaot bitim Old Smoky be hem i no muv. I mekem se … Naoia we yu stap long ol ni blong yu, go long ol han blong yu tu. Mekem olsem yu wan buluk mo wokbaot fo leg i go long Old Smoky.”

Thad i talem: “Mi bin mekem. Hem i no bin muv. Mi holemtaet ol rop blong hem, lidim hem i go long fanis, jam long bak blong hem, mo mifala i resis olsem win blong karembak ol buluk i go insaed long fanis. Old Smoky i smat gud long evri kona we mifala i tantanem long hem.”

Afta, taem Thad i stap long hae skul, hem i tingbaot oltaem se hem i bin kasem wan klia ansa long prea blong hem long wan taem we hem i stap long bigfala nid. Hem i bin wajem, “Ol enjel ol bin toktok long Old Smoky we mi nogat paoa blong mekem hemia, mo hadtaem i bin kam long famli blong mi.” Afta hem i bin talem: “Hemia hem i faswan long ol fulap toktok blong Tabu Spirit we [bae] oli kam long mi. ‘Mo eni samting we bae yufala i askem long Papa long nem blong mi we i raet, mo bilivim se bae yufala i kasem, luk bae i givim long yufala’ (3 Nifae 18:20).”⁷

Yumi evriwan i gat ol buluk blong kliarem aot long rod blong tren bifo tren i kam. Ol hadtaem blong yumi oli kam long fulap defren stael mo saes. Sam oli series olsem denjeres situesen blong Thad, wetem ol risal we i save spolem laef o sol blong yumi o olgeta we yumi lavem.

Ol narafala situesen we yumi fesem maet bae i nogat ol series risal be i nomata hemia, oli hevi long maen mo hat blong yumi. Wan samting i tru—wanwan long yumi bae i gat ol samting we bae oli kam agensem yumi, mo ol hadtaem long laef blong yumi from oli pat blong eksperiens blong yumi long wol ia. Be tingbaot, bae Lod i helpem yumi!

Mi lavem ol toktok ia insaed long Buk blong Momon: “Yumi luk se God i stap tingbaot evri pipol, long eni kaen graon we maet oli stap long hem; yes, hem i kaontem ol pipol blong hem, mo stamba blong sore blong hem i stap kavremap ful wol” (Alma 26:37).

Hemia i minim wan wan long yumi. O i wan bigfala kamfot blong save se Lod bae i helpem yumi.

Fet, Hop, mo Wan Gospel Lukluk long Tingting

Blong talem i sot, mi stap leftemap tingting blong yufala blong kipim wan lukluk long tingting wetem Gospel. Luk long wol raon long yu tru long glas blong lukluk blong gospel blong Jisas Kraes.

Kipim wan balens long Saed blong Spirit. Yumi evriwan i fesem ol jalenj mo janis long ol defren wok long laef, mo oli stap blong gud blong yumi taem yumi balensem wetem fet blong yumi long Jisas Kraes mo long Atonmen blong Hem.

Laswan, gat fet mo hop se bae Lod i helpem yu. Save ia hem i wanem we bae i helpem yu blong gat tras long yuwan blong fesem ol jalenj we i wan pat we i no save ronwe long misin blong yumi long wol ia.