Deiting mo Ponografi

I Kam Long Liahona mo ol wok man blong Famli Seves

Help mo hop taem yu fesem ponografi long ol deiting rilesensip blong yu.

Olsem ol yang adalt, yumi evriwan i save se blong stap deit i save mekem yu gat wan gud taem, mekem yu fraet, save komplitim wan samting, mo i save had tu evriwan long semtaem nomo. Be taem yumi stat blong talemaot ol samting long wanwan long yumi, yumi wantem kam blong save moa abaot wanwan long yumi, mo wanem bae i kamaot bae i moa impoten blong bildim mo mekem rilesensip i kam gud moa. ?Wanem nao ol drim, ol samting yumi fraet long hem, mo ol bilif? ?Olsem wanem nao yumi filim abaot mared mo famli? ?Wanem nao ol jalenj we umi bin fesem bifo o naoia we yumi save serem wetem yumi?

Olsem we hem i wan had samting blong tokbaot (o askem) abaot ol problem wetem ponografi, ating blong no tokabaot bae i save lid i go long bigfala problem afta. Problem we wanwan man i gat wetem ponografi i blong hemwan nomo mo i gat jalenj, mo bae yu no save sapos hem i wan problem o olsem wanem bae yu talem long man we yu stap deitem, mekem se hemi impoten blong yu lukaotem help blong Spirit. i nogat wan ansa blong evri situesen, be long atikol ia,mifala i givim sam ansa long yufala we yufala stap gat tingting long hem:

?Olsem wanem nao bae mi tokbaot ponografi long man we mi stap deitem? ?Mo wetaem bae hem i stret taem blong askem/talem?
?Olsem wanem nao bae mi muv i go fored wetem wan rilesensip wetem wan we i gat wan histri blong yus blong ponografi?
?Olsem wanem nao bae yumi wok tugeta blong winim ponografi?

Blong Olgeta We Oli Bin Gat Hadtaem o Stap Gat Hadtaem

Sapos yu stap faenem i had wetem ponografi bifo o yu stap faenem i had yet, wan tingting blong deiting bae i save mekem yu lusum hop o mekem yu fraet. Be sapos yu gat wan strong tingting blong karemaot ponografi long laef blong yu (o yu karemaot finis), yu mas save se wetem bigfala efot blong yu mo help long Papa long Heven mo Jisas Kraes, wan helti, mo longfala rilesensip bae i posibol long yu . Tingting long ol kwestin ia taem yu stap long wan rilesensip.

1. ?I Rili Nid Blong Mifala I Tokbaot Hemia?

Wan kwestin we oli stap askem oltaem hem i, “?I rili nid blong mi serem histri blong ponografi blong mi long man we mi stap deitem, iven sapos mi sakem sin long hem finis?” O “?Mi mas tokbaot problem blong mi blong naoia wetem ponografi long man we mi deitem?” Antap long evri samting ia, i mas nid blong oli tokabaot ol samting ia—long raet taem mo long wan stret wei, Taem yu stap tokabaot ol samting ia, putum long maen blong yu sam impoten prinsipol:

Taem—Toktok ia i mas tekem ples taem rilesensip i seris mo i nidim blong oli tokbaot,
Onesti—Rilesensip i mas bes long tras mo onesti. Sapos man we yu stap deitem i jus blong endem rilesensip, olgeta i mas andastanem stamba blong problem blong yu, wea ples yu stap long hem blong fixim, mo plan blong yu long wanem nao blong mekem sapos i kambak long fiuja.
Fogivnes—Blong stap ones abaot yus blong ponografi wetem man we yu stap deitem i no minim se yu no nid blong talem evri samting taem yu stap tokbaot. Sapos yu sakem sin mo yu filim se oli fogvim yu, yu no mas harem nogud long hem. Lod i nomo rimemba ol sin blong yumi taem yumi sakem sin ( luk long Doktrin mo Ol Kavenan 58:42), mekem se wanem yu tokabaot wetem man we yu stap deitem bae i smol nomo be ino blong “konfes” mo hemi moa blong bildim tras, serem ol plan blong kam gud bakegen, mo blong karem sapot blong olgeta.
Hiling—Iven sapos yu sakem sin, tekem taem o oltaem yusum ponografi i save tekem longtaem blong kam oraet long hem longsaed long bodi, tingting, sosol mo long saed long spirit. Rod blong kam gud bae i had mo bae i tekem longtaem, be blong kam gud evriwan mo ril hiling i save hapen. Tru long wei ia, bae yu nidim stret help mo sapot, we man o woman we bae yu maredem tu i nidim.

2. Mi Rere long wan Series Rilesensip?

Wan samting we i bigwan mo i defren long wan we i redi long wan series rilesensip mo wan we i no wantem hem i hat ia we oli gat blong talemaot evri samting long man we oli stap deitem. Sapos yu stap faenem i had wetem ponografi, yu save jus blong letem fraet i tekem rilesensip blong yu i go long wan ples we i nogat tras o blong yusum fet blong yu blong faetem ol jalenj ia tugeta.

Maet bae i no fil gud mo bae i had blong serem histri blong yu wetem ponografi, be blong no wantem serem bae i mekem filing blong fraet mo sem i kam antap moa. Fraet blong yu blong lusum man ia baei mekem yu blong haedem o no wantem blong serem ful storian, we bae i mekem yu brekem tras o spolem rilesensip blong yutufala afta.

Long narasaed stori, taem yu rispektem fasin blong joes blong man we yu stap deitem bae yu givim ona long joes blong olgeta mo stap long rilesensip ia taem yu save tugeta gud mo nogud. Bae yu stil fraet long wanem bae i kamaot, be i impoten se yu luksave, evri infomesen we i kamaot, blong mekem se nara man i save helpem yu long ol traehad blong yu mo strong tingting ia blong karemaot ponografi long laef blong yu. Be i nomata se bae rilesensip ia bae i wokaot o no, wetem help blong God, yu save gohed long rod blong kam gud.

Blong ol yang adalt we oli stap deit wetem wan we i stap gat hadtaem wetem ponografi.

From se yia we fastaem bae oli luk ponografi hem i 11 yia mo hem i isi blong gat akses long hem, fulap long ol yang pipol we oli stat blong luk ponografi hem i taem oli gat 18 yia. Hemia bae oli gat konsen long hem taem deiting i stap gohed Be blong luk i no semmak olsem adiksen, mo i gat ol defren level blong yus long ponografi (luk long Dallin H. Oaks, “Recovering from the Trap of Pornography,” Liahona Oct. 2015, 50–55). Gudfala nius i we Atonmen blong Jisas Kraes i save givim paoa mo hiling long olgeta we i lukaotem. Hemia samfala kwestin blong tingting long hem taem rilesensip blong yu i stap muv:

1. ?Wetaem mo Olsem Wanem Bae Mi Askem Abaot Ponografi?

Blong disaed long wetaem mo olsem wanem blong talem long man we yu stap deitem bae hem i wan samting we yu mas tokbaot wetem mama mo papa blong yu, bigfala brata o sista, ol Jos lida, o eni wan we yu trastem blong givim yu gud advaes. Faenem wan wei we yu filim gud long hem mo gat wan konvsesen long wan stret taem, taem yu stap kam seris long rilesensip blong yu.

Be hemia i no minim se bae yu nid blong statem wan intaviu long fas deit blong yu long wanem oli mekem bifo, be taem rilesensip blong yu i kam gud, lukaoten insperesen blong Spirit blong i helpem yu blong save hao mo wataem blong askem histri blong olgeta abaot ponografi,

hands holding two torn pieces of a photograph

2. ?Olsem Wanem Bae Mi Ansa?

Taem yu mo man we yu stap deitem i stap serem ol ones filing long yu tufala, i save karem hiling i kam. Hem i impoten blong yu luk save long tingting blong yuwan mo ol filing taem oli talemaot yus blong ponografi we oli haedem—bae hem i save mekem yu givim ol rabis komen, kros, tingting i ded, o filim se oli giaman long yu. Be long semtaem, sikret blong olgeta i save mekem olgeta i gat tras long yu,gat sore, lav, mo andastanem yu. Tingting long filing blong olgeta mo ansa blong yuwan.

3. ?Olsem Wanem Nao Mi Muv I Go Fored?

Taem yu faenemaot se man we yu stap deitem i faenem i had wetem ponografi, no spolem tras blong olgeta taem yu serem ol traehad blong olgeta long ol nara pipol. Toktok wetem tras long wan bisop o wan man blong help, o, sapos man we yu stap deitem i letem, wetem wan fren o wan lida we i save help tu.

Taem yu stap disaed blong kontniu o no wetem rilesensip ia, yu mas gohed blong lukaotem help blong Spirit. Be ol tingting ia bae i save helpem yu:

Askem olgeta hamas nao ponografi i spolem laef blong olgeta mo wea ples nao oli stap long hem blong oli kam gud. Oli mas soem strong tingting ia blong karemaot ponografi long laef blong olgeta tru long ol aksen we oli nidim blong tekem.
Luksave se i gat defren kaen yus blong ponografi (eksampol, abiusum ol pikinini long saed blong seks) hem i wan long stamba samting we i nidim profesenol help.
Luksave se paoa blong Atonmen blong Sevya hem i ril. Yu save fogiv, mo olgeta i save kam oraet.
Disaed blong yu save stap wetem ful onesti long rilesensip blong yu mo stap klin inaf blong mared long tempol.
Andastanem se hiling mo kam gud bakegen i tekem taem. Blong mekem bakegen bae i save hapen, mo olgeta we oli traehad blong kam gud bakegen oli nidim sapot. Hemia i minim tu blong andastanem wanem i mekem olgeta blong mekem ol samting ia bakegen (ol samting we bae i mekem oli save gobak luk ponografi bakegen) mo blong givim sapot o helpem olgeta blong protektem olgeta.
Sapos rilensensip blong yu i stap go fored, meksua se yutufala tugeta i agri se ponografi i nogud mo i no mekem wan mared laef i helti long saed blong seks.

Impoten pat blong muv i go fored i blong dipen long wanem Tabu Spirit i talem long yu blong mekem, we bae hem i save minim eni samting blong gohed wetem rilesensip ia mo wetem wan save se yus blong ponografi i mas stop blong no endem rilesensip ia be gohed blong sapotem olgeta wetem traehad ia blong jenis. Wanem we yu disaed, man we yu stap deitem i mas andastanem se ol samting i save jenis dipen long wanem oli kam antap long hem o wanem oli no kam antap long hem blong winim ponografi.

Wok Tugeta blong Winim Ponografi

Blong winim ponografi i tekem taem mo i hadwok, be yumi save mekem. Long en, wok blong winim ponografi tugeta i save mekem rilesensip blong yu i kam strong moa taem yutufala i gat moa andastaning long Atonmen blong Jisas Kraes mo lanem blong givim sapot long yutufala tru long ol hadtaem. Tingting long ol samting ia taem yu stap wok blong winim ponografi.

Websaet blong Jos overcomingpornography.ChurchofJesusChrist.org i givim fulap risos (we i insaed i gat infomesen blong wan Jos program blong winim adiksen) we i save helpem yutufala blong go tru long hiling proses ia.
Tingting blong gat wan stret ples mo taem blong tokbaot ponografi blong mekem se bae i no kam mein samting ia nomo long rilesensip blong yutufala. Taem bae yu toktok, no talem nogud hem o mekem hem i sem. Rilesensip blong yutufala bae i mas wan ples we i sef wea yutufala i save filim lav mo sapot, be i no blong gat ol strong intaviu o mekem wan i sem.
Ol praktis long saed blong spirit i save help blong faet agensem ol temtesen ia. Leftemap tingting blong yutufala wanwan mo mekem wanwan i kam strong wetem ol samting long saed blong spirit—we insaed i gat tru fasin blong skripja stadi mo tempol wosip (sapos oli save mekem), Kipim Sabat Dei i Tabu, givim seves long ol narawan, livim kakae oltaem, mo prea wetem tru tingting—wetem wan hat blong wantem mekem rilesensip blong yutfalawetem Sevya mo Papa long Heven i kam strong moa. Rilesensip ia i save mekem ponografi bae i kam moa smol long laef blong yutufala. Fasin blong stap olsem wan disaepol hem i blong ful laef, mo paoa we yumi kasem olsem ol man blong folem Kraes bae i helpem yumi blong winim ol jalenj long laef blong yumi, be i no ponografi nomo.
Sapos ol traehad blong yu i pruvum se i no gat sakses, yu no fraet o sem blong lukaotem help blong wan profesenol blong helt long saed blong tingting we i lukluk long adiksen long saed blong seks. Olgeta bae oli save helpem yu gat moa save blong tritim yus blong ponografi mo blong winim stampa blong problem.
Tingbaot se yumi stap raon long ol media we i no stret we i save temtem yumi blong sin. Sapos man we yu stap deitem i gobak bakegen blong luk ponografi, olsem wanem oli kambak hariap long laen i soem se oli save karemaot ponografi long laef blong olgeta. Be sapos yu stat blong filim blong wantem luk jenis bitim fastaem, yu mas tingting bakegen mo gohed wetem deiting rilesensip blong yu.
Fasin blong yu raon longman we yu stap deitem bae i save strong, be bae hem i no mas kam stampa risenblong jenisim fasin blong olgeta. Tingting blong olgeta blong jenis bae i mas kam long olgetawan, be i no yu.

Antap long evri samting, lukaotem help long Papa long Heven mo tingbaot se oltaem i gat hop tru long Sevya. Gladhat blong Hem i inaf blong hilim mo jenisim yumi. Atonmen blong Hem i stap blong yutufala tugeta blong givim paoa mo blong helpem yutufala blong fofogivim yutufala . Be, man we i stap traehad wetem ponografi i nid blong askem help blong Sevya blong i save winim ponografi Nogat man i save mekem blong olgeta. Gat fet mo trastem Papa long Heven. Bae hem i givhan long yu long spesel situesen blong yu.