2019
Te Kabwaka bon Mwakoron te Babaire
Nobembwa 2019

Te Kabwaka bon Mwakoron te Babaire

Iroun Adam C. Olson

Ana Maekatiin te Ekaretia

Aua reirei aika ti kona n reiakinaki man “kabwaka” aika ti tatangiri n koroboki aika a tabu.

young adult woman

Te mwakoro ae tamaroa n te intanete e tara ni karaoaki ni bukamarua te “kairua ae moan te kaangaang”—man kabwakan Pinterest nakon tamneia aomata aika a kataia ni karaoa te mwakuri ma e aki koro bukina. Tao tina tii tangiria n ataia bwa tiaki tii ngaira ngkana ara mwakuri aika kabanean te tamaroa a taraa n aki raoiroi. Eng, iai riki kawaina teuana n ataia bwa tiaki tiku n tingaira.

Ngkana ko namakinna bwa e kaonaki am bong ma kabwaka, kakaae inanon booki aika tabu ibukin te kaunganano. A mwaiti aia mwakuri aomata a rang kamimi aika a kee iaan aika kororaoi. Aikai tabea aia reirei aomata man booki aika tabu ake a kona ni buokiira n ataia bwa ko karaoa ae tamaroa riki nakon are ko iangoia.

1. Te onimaki e aki totokoa te kabwaka, e karaoia bwa e na rang n nano.

Nibwaai e kaonaki n te onimaki ngke ngaia ma tarina a oki rikaaki ibukin bwatua ake buraati, ma anne e aki kamanoia man bwakaia ae kamarakinano—uoua te tai (taraa 1 Nibwaai 3). E ngae ngke e kabwaka ma ana onimaki e buokia ni ni bita kabwakana nakon te katauraoi ibukin te tokanikai. Kabwakana mai imwaina are e kaitara iai ma Raban e buoka Nibwaai ni katauraoi ni kina, ni kina anuana, kunea a na auti, ao ni kona ni karekei ma rekooti aika tabu? Ti aki ata raoi koauana. Ma ti ataia bwa tokanikaira n taai aika a na roko a riki n tainako man mwiin te bwai ae ti reiakinna man kabwakara n taai aika nako.

2. Te Atua e kantaningai kabwakara ao e babaire imwaina.

Imwiina ngke e a tia n ataia Iotebwa Timiti taekan iteraniba ake 116 n ana Boki Moomon ake a koreaki bwa a bua, e tang, “Ni kabane A Bane ni Buat!”1 E ataia e a tia ni kabwaka. E ataia bwa e na kona n un ao ni kona n teweaki nako. Ma e ngae ngke iai te kabwaka, te tokanikai e bon kona reke. Te Atua e a kaman ataa kabwakan Iotebwa e kaniia 2,000 te ririki imwaina ao e tauraoi imwaina.

N ai arona, te Atua e a kaman atai kabwakara imwain karikan te aonaaba.2 E kona ni bitii ara kairua ni kariki bwa kakabwaia (taraa I-Rom 8:28). Ao E katauraoa te Tia Kamaiu bwa ngkana kabwakara a irekereke ma te bure, ti kona n rairiinanora, ni karekea “reireiara man [ara] taneiaia n aki kabuakakaki iai.”3

3. Tai katoka katakina, ti aki noora tokanikaira n tainako.

Abinadi e weteaki bwa e a tataekina te rairannano nakoia aomata. Ngkana e anaa abwakin tokanikaina Abinataai ni mwaitiia aomata ake a rairi nanoia, e kona n tia ni mate ni kakoaua bwa bon te kabwaka raoi. Te moan tai are e kauringiia iai aomata te Uea are Noa bwa a na rairinanoia, e aki butimwaeaki ao e birinako n aki tiringaki. (Taraa Motiaea 11:20–29.) N onean mwiin kabwaraan nanona, e manga kataia riki, n ataakina bwa e kona n tiringaki —ao e bon mate.

Ma ibukina bwa e aki bwarannano, n tokin te tai aomata a bon rairi nanoia. (taraa Motiaea 21:33). Tera riki ae riki, Aramwa e rairaki, e reireinaki ao e bwabetitoia aika a mwaiti, ao a katea te Ekaretia ibuakoia Nibwaite. Ana kariki Aramwa a kaira te Ekaretia, ao n tabetai te botanaomata, ni karokoa rokon Iesu Kristo, n rairiia aika a nganga mwaitiia, n raonaki ma angiia Remwanaite. (taraa Ereman 5:50). Temanna te aomata ae e aki bwarannano ngke a rinanon te kabwaka e kona ni karika te kaokoro ae moan te korakora.

4. N tabetai katokan te kanganga e aki rang kakaawaki riki nakon te reiakinaki mai iai.

Oliver Granger e tataneiai ni karekea te kariaia ni katiaan waai. Imwaain kainakin te Ekaretia n 1830, e a tia n riki bwa te bureitiman n te aba, te keeno n te taanga ni buaka, ao te tia kabwarabwara ae raitienti n ana ekaretia. Imwiin kainakina, e mwakuri ibukin uoua mition ao e riki bwa kain te kauntira ae rietata i Kirtland. Ma ngkanne Iotebwa Timiti e angan Oliver te mwakuri ae kuri aki konaaki ni karaoaki ni karaoa mwakuri ibukiia mataniwiin te Ekaretia ake a tia ni kanakoaki mai Kirtland. .4

Namakinan ae kaanga te kabwaka, Oliver e nakon Iotebwa ao e ongo ana taeka te Uea, “I uringa au tia mwakuri ae Oliver Granger; … ao ngkana e bwaka e na manga teirake, bwa ana karea e na rang nakoiu nakon rikirakena” (taraaR&B 117:12–13). Mairoun Oliver, ti reiakinna bwa mwiin te bwii are e kakaea te Atua tiaki ibukira n tainako bwa tina kakaea te reke ae eti nakon ara kakaewenako, ma ibukira bwa tina rikirake man kaitarakiia.

Te rikirake e kona ni mangaongao

Ti roko iaon te aonaaba aei bwa tina reirei ao n rikirake, ma te rikirake e aki roko ngkana akea te kaitara. Ti bane ni karaoi kairua, e taku Beretitenti Dieter F. Uchtdorf, Kauoman ni Kauntira n te Moan Beretitentii, ma “tokin kawaira e aki baireaki man mwaitin ara tai are ti tatanako iai ma man mwaitin te tai are ti teirake iai, taetaei bubura, ao ni waaki nako.”5

Bwaai aika a na taraaki

  1. Taraa “Lucy Mack Smith, History, 1844–1845,” boki 7, iteraniba 5–6. Ibukin reirei riki man te taneiai aei, taraa Keith W. Perkins, “Thou Art Still Chosen,” Ensign, Tianu. 1993, 14–19.

  2. E reirei imwiina Iotebwa: Iehova ae mwaaka e iangoa te bwai ae e na riki ae bwanin n ikotaki ma te aonaaba, ni kaineti nakon te baire ni kamaiu, imwain ae e waaki nako n karikaki. … E ata aroia ake a maiu ao ake a mate, ao e a tia ni karaoi tua ibukin kamaiuaia” (in Teachings of Presidents of the Church: Joseph Smith [2007], 406–7).

  3. Bruce C. Hafen, “The Atonement: All for All,” Riaona, Meei 2004, 97.

  4. Taraa Boyd K. Packer, “Man Aika Uarereke Aikai,” Riaona, Nob. 2004, 86–88; taraa naba The Joseph Smith Papers, History, 1838–1856, volume B–1 [1 Tebetembwa1834–2 Nobembwa 1838], 837.

  5. Dieter F. Uchtdorf, “Ko Kona ni Karaoia Ngkai!” Liahona, Nobembwa 2013, 55.