Iloaina Pe O Ai Oe—ma Pe o Ai e Avea ai Lava Oe i Taimi Uma

Saunia e Sheri L. Dew

E Uiga ia Sister Dew

Ata mai le Getty Images

Sa fanau Sheri Linn Dew i Ulysses, Kansas, ISA, i le 1953. O ia o le ulumatua o le fanau e toalima, ma e oo ifo i le taimi na maea ai lana vasega lima, ua ia aveina se palau i luga o le faatoaga saito a le aiga. I Aso Sa e piki vave ai o ia e lona tina matua o Maudie Dew mo le lotu, lea sa faia i se faletele mautotogi. O i laua e saluina muli sikareti ma apa pia e saunia ai le potu mo le lotu. O le auai ai i se tamai paranesi o lona uiga sa ia faia le tele o lauga ma aoaoga. Sa oo ina avea o ia ma ta piano o le paranesi a o avea o ia ma se tamaitai talavou ma sa auauna atu i lana au peresitene o le Peraimeri o le paranesi ina ua 16 ona tausaga.

I le mavae ai ona maua o lana tikeri i talafaasolopito i le Iunivesite o Polika Iaga i le 1978, sa ia faigaluega loa o se faatonu i le Bookcraft. Sa ia auai i le Deseret Book i le 1988, ma avea ai ma se sui peresitene i le 2000.

E 35 ona tausaga ae auai i le fono faatonu aoao a le Aualofa i le taimi o peresitene ia Barbara W. Winder. Sa na o le 43 ona tausaga ae avea o ia ma Fesoasoani Lua ia Mary Ellen W. Smoot i le Au Peresitene Aoao o le Aualofa i le 1997.

Sa apoapoai atu Sister Dew i tamaitai ia malamalama i lo latou taua i le taimi o lana lauga i le Konafesi a Tamaitai i BYU 2001, lea o loo sii atu ii (ua faalaugatasia faamamafa).

Talu ai nei, sa o mai ai Megan e 16 tausaga le matua, o le tama teine a lo’u uso ma ana uo e toalua e momoe i lo’u fale. A o matou savalivali i lena afiafi, sa fesili mai se tasi o i laua pe faape’i le ola a’e i se faatoaga i aso ua mavae. … Sa ou ta’u atu ia Megan ma ana uo o “aso ua mavae,” sa matua ou matamuli lava ma sa matua leai lava so’u to’a.

“Na faapefea ona e faatoilaloina na lagona?” Sa fesili mai ai Megan. Sa toetoe lava ou avatu i ai se tamai tali puupuu i lena fesili ae ou tu, ma lagonaina o nei tamaitai talavou maoae na fia iloaina atili nisi mea. O lea sa ou fai atu ai ia i latou o le mafuaaga o se mafuaaga faaleagaga: Sa le’i i ai seia oo ina amata ona ou malamalama i lagona o le Alii e uiga ia te a’u lea sa amata ai ona suia o’u lagona e uiga ia te a’u lava ia ma lo’u olaga. Ona tasoo mai lea o a latou fesili: Na faapefea ona ou iloa pe faape’i lagona o le Alii? Ma na faapefea ona latou iloaina le auala na Ia lagona ai e uiga ia i latou?

Mo ni itula, a o uuina tusitusiga paia, sa matou talanoa ai e uiga i le auala e lagona ai le siufofoga o le Agaga, e uiga i le naunautai o le Alii e faamatuu mai le malamalama o loo teumalu i totonu o o tatou agaga e faatatau pe o ai i tatou ma po o le a le tatou misiona, ma e uiga i le eseesega e faia e suiga o le olaga pe a tatou iloaina.

… E leai se isi mea e sili atu ona taua i lo tatou tulaga manuia ma lo tatou fiafia iinei nai lo le aoao e faalogo i le siufofoga o le Agaga. O le Agaga lea na te faaali maia ia i tatou lo tatou faasinomaga—e le na o le pe o ai i tatou ae pe o ai e avea ai pea i tatou i taimi uma. Ma a tatou iloaina lena mea, e maua e o tatou olaga se lagona o le faamoemoega e matua mata’ina lava lea e le mafai ai ona tatou toe tumau ai i le mea e tasi.

… E faananau lava o tatou agaga mo i tatou ia manatua le upumoni pe o ai i tatou, ona o le auala tatou te vaai ai ia i tatou lava, lo tatou lagona o le faasinomaga, e aafia ai mea uma tatou te faia. … E aafia ai le auala tonu tatou te ola ai i o tatou olaga. O lea la, o le asō, ou te valaaulia ai outou ia mafaufau loloto i se auala fou e le na o le pe o ai i tatou ae pe o ai e avea ai pea i tatou i taimi uma.

… Mata e mafai ona e mafaufauina le Atua o le na silafia atoatoa i tatou, sa faapolopoloina i tatou e o mai i le taimi nei, i taimi ua matua tetele ai lamatiaga ma faateteleina ai mea faafeagai nai lo se isi lava taimi? O afea Na te manaomia ai tamaitai o ē o le a fesoasoani e tausi a’e ma taitai se tupulaga filifilia i le siosiomaga faaleagaga ua sili ona lamatia? Mata e mafai ona e mafaufau na Ia filifilia i tatou ona sa Ia silafia o le a tatou le fefefe i le fausiaina o Siona?

… Malualii ma maoae. Lototele ma naunautai. Faamaoni ma le lē matatau. O le tagata lena e i ai oe, ma o le tagata lena e avea ai lava oe i taimi uma. O le malamalama i lena upumoni e mafai ona suia ai lou olaga, ona o lenei malamalama e tauaveina se to’a lea e le mafai ona faaluaina i se isi lava ala.

… A e malamalama na filifilia oe ma faapolopoloina mo le taimi nei, ma a e ola e tusa ma lena misiona, o le a e fiafia atu nai lo se isi taimi muamua.

… O le Atua o lo tatou Tama, ma o Lona Alo e Toatasi na Fanau o le Keriso lea. Tau ina ia tatou olioli i le toe tutu atu ma le lototoa mo le Faaola ma auauna atu ma le lototele ma le malosi i Lona tovine. Ma ia tatou le matatau lava i le fausiaina o Siona a lo tatou Atua—ona ua tatou iloa pe o ai i tatou ma pe o ai e avea ai lava i tatou i taimi uma.