Tatou Te Sili Atu Nai Lo Na o o Tatou Tau Faailoga
O lou taua e le fuaina i mea e mafai pe le mafai ona e faia.
O i tatou o tagata e fiafia e tau faailoga i tatou lava--afafine, tusiata, tamaitiiti aoga, tagata tamoe. E ui o tau faailoga e faamalosia i tatou, faatupulaia ai lo tatou iloa i lo tatou faasinomaga, ma maua ai e i tatou avanoa e tuputupu ae ai, ae iai foi o latou uiga matautia. Afai tatou te faatusatusa o tatou tau faailoga i isi, ma maua ni tau faailoga e faaitiitia pe feteenai ai ma lo tatou amio Atua, pe iai tau faailoga e tatou te lagona faatauvaa ai, e mafai e lo tatou faatauaina o le tagata lava ia ma le faaleagaga ona nutininii i le miliona o vaega laiti.
O lea, e faapefea pe a matou tau atu ia te outou e iai le tau faailoga e tasi e taua, faavavau, ma tulaga ese ua ia i tatou uma lava?
O nisi nei o lagona loloto mai ni tuafafine e toatolu e matua eseese lava, o lo o soifua i ni soifuaga matua eseese lava. Ae ua tatou faasoa faatasi le tau faailoga e silisili ona taua nai lo tau faailoga uma lava.
Chantele:
O nisi o taimi e faigata ona le faatusatusa oe lava i isi, aemaise lava i totonu o se aiga. O se faataitaiga na feagai ma au i lou olaga atoa o le faatusatusa lea e tagata o au ma ou uso e toalua i taimi uma lava. E eseese uma lava i tatou! E eseese tulaga o lo tatou soifuaga o lo o tatou iai ma e eseese taleni ma uiga faaletagata. Ua ou faaipoipo mo le toeitiiti 15 tausaga, e toafa lau fanau, ua ou tusia ma faasalalauina ni tusi o talafatu se lima i le maketi faaleatunuu ma taina le kitara mo le toeitiiti 30 tausaga. E tele naua ou faamoemoega ou te manao ina ia ausia. Afai ou te le fiafia i le le faataunuuina o le tele e pei ona ou manao iai, ou te manatua le alofa o le Tama Faalelagi mo au, e tusa lava pe ou te le ausia i latou uma. E ui ona ou manatu o a tatou taleni eseese e fesoasoani e faatulaga o tatou tagata, afai o le a tatou aveesea nei mea uma—taleni uma ma tau faailoga, e le tauaogaina lava se tasi o i latou. O le taunuuga lava o le mea e tasi—o lo tatou faasinomaga o le avea ai ma fanau a le Atua. Afai lava o loo ou taumafai i le mea sili e mafai ai, o le a faatasi mai le Atua ia te au. E fesoasoani le upumoni ia te au i lau malaga ma aumai ai le mafanafana moni, poo a lava tau faailoga e fetogi mai e le lalolagi ia te au po o isi foi ou te taua ai au lava.
Chaleese:
O au o se tina nofofale. E toatolu ou atalii ma lou toalua o i latou o lou ola atoa. O au o lo latou lagolago silisili. Latou te talia au lava. E leai sau galuega i fafo atu o lou aiga. O lou uso matua o se tina nofofale i se fanau e toafa, ae o ia foi o se tusitala maoae. O lou uso laitiiti ua na o le pau lea o le tagata o le aiga ua faauu mai le kolisi, o lo o faigaluega i le galuega na moemiti iai, ae le i faaipoipo lava o ia. E eseese uma i matou. Atonu e eseese o matou tau faailoga, ae o na tau faailoga e le avea ma mea e sili pe itiiti ifo ai lo matou taua nai lo le isi. Ae ui i o tatou eseesega, o i tatou uma lava o ni fanau a le Atua, ma e alofa o Ia ia i tatou uma. I le faaiuga, e moni ua pau lava lea o le mea e taua. Atonu o au tau faailoga e ono eseese mai tau faailoga o ou uso, ae a tuuesea na mea, ua tusa pau lava i matou. Ua ia i tatou le faamoemoega e tasi e faavavau.
Chakell:
Sa ou faavasegaina le tele o tau faailoga. O au o lo o saili lou faailoga maualuga, o se tusitala, ma se faufautua i le faia o kekesisi i sona lava vaega o taumafa. Ae iai foi ou tau faailoga ou te le fiafia iai. Ou te nofo toatasi, ou te taumafai e faaleleia lou ola maloloina, ma o le tele o taimi, ou te lagona ai le le atoatoa. Ou te faatagaina nisi ou te taua o ou tau faailoga “vaivai” e lofituina au i lo latou malosiaga nai le mea e tatau ai. Ma o nisi o taimi, e tusa foi ma tau faailoga ou te mitamita ai ua amata ona latou punitia lou faasinomaga moni. Ae a ou mafaufau tonu poo ai au ma manatua ai o au o se afafine o le Atua, e suia ai lava mea uma. O le tau faailoga e tasi e aumai moni ai le uiga o le olaga o lo tatou faasinomaga paia. Ou te le iloa mea uma o le a oo iai lou lumanai po o a tau faailoga o le a tau ai pe le taua ai foi au i lou olaga, ae ua ou mafanafana i le mafai ona faapea atu, “O au o se afafine o le Atua” ma iloa ai e sili atu lona taua nai lo seisi lava mea. Ma ou te le taumafai e saili lena tau faailoga po o Lona alofa—na tuuina mai ia te au e aunoa ma se totogi. Ou te iloa afai ou te taumafai e ola i lou olaga e tusa ai ma Lona finagalo, ma e afai ou te manatua pea o ai moni lava au, o le a Ia faamanuia ia te au (tagai MF&F 82:10). Afai e taulai uma isi ou tau faailoga i le tasi e moni lona taua, o le a ou maua le fiafia, malosi, ma le silisili i totonu ia i latou uma lava.