O Tatou Aiga, O Tatou Auaiga
Taumafai e Avea o se Tina Atamai ma Tamalii
E alala le tusitala i Metro Manila, Filipaina.
Sa ou taumafai e saili le faamoemoega o le tulaga faatina. Ae o se tusiga mai se nusipepa tuai na suia ai lou manatu.
Ata na tusia e Jennifer Tolman; ATA NA TUSIA MAI LE GETTY IMAGES
Na ou manao lava pea e avea ma se tagata auai sili i mea tau saeanisi. I le taimi o ou suesue i lou faailoga muamua i le Iunivesete a Polika Iaga i Hawaii, sa muai faailoa mai e Dr. Douglas Oba, o se polofesa fesoasoani tele ma aoaoina au i le lalolagi o suesuega o meaola ma mea faatekonolosi. Sa ou maua foi se avanoa e galue ai i le ofisa e fai ai suesuega i le Iunivesete o Polika Iaga i Provo, Iuta, Amerika, mo se galuega faataitai i le tau mafanafana.
Ina ua ou foi i lou aiga i Filipaina, sa ou maua se galuega i le Ofisa e Suesue ai le DNA i le Iunivesete o Filipaina. O le faatumutumuga o lau galuega e aofia ai le galue i nisi o poloketi mo le lotoifale, auai i aoaoga ma konefesi, ma le mataituina e faalapotopotoga o le lotoifale ma le lalolagi o au pepa faa saeanisi na faasalalauina. Na amata ai foi lau polokalama mo se faailoga maualuluga. Sa ou lagona lou faamalieina i lau galuega fou.
I le mavae ai o le lua tausaga o galue, sa ou faaipoipo ai i le malumalu ma lau uo na ma tutupu ae o laiti. Ina ua mavae sina taimi, sa maua ai le ma pepe muamua ma mo se taimi muamua lava lea ua ou le mautonu ai. Sa ou le iloa ona faapaleni le tausiga mo le pepe, faaaluina o le taimi ma lou toalua, galueaina o vasega i lau polokalama, fetuunaiga o poloketi ma pepa i le galuega, ma le faataunuuina o valaauga i le Ekalesia. Sa ou talanoa ma lou toalua e uiga i ou le mautonu, ma sa ia fautua mai ma le faaeteete ina ia ou mafaufau e aluese mai lau galuega. Sa ou iloa le poto o lana fautuaga, ae sa ou le i saunia e faamatuu ese lou olaga faapolofesa i lea taimi.
Ina ua ou maitaga i la ma tamaitiiti lona lua, sa fai ou muai gaoioiga ae le i fanau le pepe e manaomia ai i lou malolo i le moega. Sa ou iloa mulimuli ane ai e le mafai ona ou faia o mea uma i le taimi e tasi. Na ou iloa le alagatatau ona ou faia se filifiliga e silisili mo au ma lou aiga. Ina ua tuanai ona mafaufau loloto ma tatalo, sa ou filifili ai e tuua lau galuega faasaeanisi ma tuuina atu lou taimi atoa mo lau fanau.
Sa ou fuafua mo lou tiute faatina i lou olaga atoa, ae sa ou le iloa lava le tele o le ositaulaga o le a oo mai i lenei filifiliga. Sa ou taumafai i le mea e sili e tausia le uiga faaalia lelei, ae sa ou lagona pea le faanoanoa ina ua faaselemutu lau galuega ma lau polokalama mo se faailoga maualuga. Sa ou tatalo i le Tama Faalelagi mo le malosiaga faaleagaga e faataunuuina ai lou tiute o se tina ma le agaga atoa. Na faalogo ma le onosai lou toalua i au faitioga. Na ia faamalosiau mai ina ia ou tusia ou manatu ma lagona i lau tusi talaaga, sa le mafai ona ou tusia mo se taimi ona o le pisi o lau faatulagaga o mea e fai.
I se tasi aso, a o momoe lau fanau, sa ou manatu e vavaai i au tusi talaaga tuai. A o ou toe iloilo iai, sa faateia au i lou tusitusia pea lava pea lou naunau sili ina ia fai ma tina a o ou talavou ma talavou matua. O se tasi o tusiga faapitoa na ootia ai au: “O le a ou taumafai e alualu i luma i aoaoga o le poto ma aoaoga faaleagaga ina ia avea ai au ma se tina atamai ma le tamalii i lau fanau.”
O lena faapupulaga o se mea sa sili ona ou manaomia! Sa ou lagonaina le Agaga ua molimau mai ia te au e faapea ua ou faia le filifiliga sao mo lou aiga. Sa ou iloa ai o lau aoaoga ma aafiaga o lau galuega ua le na o se faamanuiaga mo au ae mo lau fanau. O se toe faafouina o lau molimau ma le malamalama e faavavau o le tulaga faatina.
Sa avea au ma tina nofofale mo le lima tausaga. Mulimuli ane, sa ou faamaeaina ai lau polokalama mo lou faailoga maualuga ma toe foi atu e galue ina ua tau matutua teisi ae la ma fanau. O lo o ou aoao pea e faapaleni ou taimi utiuti e faataunuuina ai ou tiute i le galuega, aiga, ma le lotu, ae ou te iloa e fetaui uma lava ona o le fesoasoani mai o le Alii. Ua faaauau pea ona ou maua aafiaga taua i le “ofisa o suesuega o le soifua” ma maua le fiafia ma le faamoemoega i le tulaga faatina.