Tagataese O E e Aiga

Jeff Messerly

Iuta, ISA

I le leva o se tasi afiafi, na telefoni mai ai lou atalii o Garrett mai Eau Claire, Wisconsin, ISA. O ia ma lona toalua o Shelly, ma le la fanau, na malaga mai Alabama, sa fai ai le aoaoga faamiliteri a Garrett, faasolo atu i le Minot Air Force i Dakota i Matu. Sa ia faamatala e faapea a o latou malaga atu e ui atu i Wisconsin, sa tigaina lava le mai o Shelly. Sa latou maua se falemai, ma sa faatulagaina le faia o se taotoga faafuasei o le pito gaau i le taeao na sosoo ai.

Sa ou fuafua e lele atu ma feiloai ma i latou, ae sa le mafai ona ou oo atu iai seia vagana le aso na sosoo ai. Na faailoa mai e lou atalii atugaluga e faatatau i le mea e fai i lana fanau—o le lima tausaga, tasi le tausaga, ma le pepe e tolu ona vaiaso—a o iai le latou tina i se taotoga. Ona o le leiloa o se isi i le eria, na ia manatu ai e valaau atu i le epikopo i Minot, e ui ina sa le i feiloai i laua. Na faapea mai le epikopo i Minot o le a ia faafesootaia le epikopo i Eau Claire.

I le taeao na sosoo ai, na feiloai ai Garrett ma le epikopo i Eau Claire, faatasi ai ma le peresitene o le Aualofa, i lona faletalimalo. Na latou faimai e fiafia e tausi tamaiti a o iai Shelly i lona taotoga. Mulimuli ane ua faapea mai Shelly sa matua lagona e ia le filemu le tuu atu o tagataese e toalua—o e aiga i le talalelei—e tausia lana fanau. I le taimi na ou taunuu ai i Eau Claire, ua faasolosolo ina manuia Shelly ma ua toe faatasi o ia ma Garrett ma le fanau a lau fanau. Sa matou faafetai mo le fesoasoani ua matou maua i le taimi na matou manaomia ai.

Ina ua tuanai ni nai vaiaso, sa ou matamata ai i le konafesi aoao o Oketopa 2016 lea na saunoa mai ai Peresitene M. Russell Ballard, Sui Peresitene o le Korama a Aposetolo e Toasefululua, “O fea o le a e alu iai e maua ai se Ekalesia auiliili ma musuia o le faalapotopotoga faatulaga e aoao ai oe ma lagolagoina e alii ma tamaitai o e ua matua tuuto atu lava i le tautuaina o le Alii e ala i le auauna atu ia te oe ma lou aiga?” (“O Ai Tatou te O i Ai?” Liahona, Nov. 2016, 91).

Sa ou le manofonofo ae mafaufau i le mea na tupu i Eau Claire. O se faamanuiaga le avea e le gata o se tagata o le Ekalesia ae o se tagata foi o le aiga o le talalelei, tatou te auauna ma faamanuia ai le tasi i le isi po o fea lava le mea tatou te iai.