E Mafai Ona Ou Auauna Atu Iina?
Mai le uluai pene sa ou tuuina i lau fagu e teuina ai tupe mo lau misiona, sa ou iloa ai ou te manao e auauna atu. Sa ou teuina tupe mo le 12 tausaga ina ua oo mai le faasalalauga e faapea e mafai e tamaitai ona auauna atu i le 19 tausaga o le matua. E ui ina sa ou le i mautinoa pe ua talafeagai le taimi mo au, sa tali mai le Alii i au talosaga, ma e sa ou lagona musuia e amata ona faatumu au pepa mo le misiona.
Sa ou manao i lou valaauga i le misiona ina ia tonu mo au ma iloa ai o le faamaoni i ou taitai o le Ekalesia, aemaise ai lava lou soifua maloloina, pau lea o le auala e lagonaina ai le filemu. E maua au i le epilepisi, o le tulaga e mafua ai ona tete le tino e aunoa ma le iloa. O le mea e lelei ai, o lou tulaga e taofia atoatoa lava e fualaau. E tusa ai foi, e mafai e lou faalagolago i le fualaau ona faatapulaa le mea e tofia au e galue ai.
Manatu ane i lou tei ina ua tofia au e galue i le Misiona a Tominiko Ripapelika Santo Domingo i Sasae! Ae sa iai se faafitauli: sa ou iloa e le maua lau fualaau i le Tominiko Ripapelika Santo Domingo. Sa ou lē mautonu. Aisea i le Alii ona musuia taitai o le Ekalesia e auina atu au i se nofoaga e le maua ai au fualaau?
Sa matou tatalo faatasi ma lou aiga mo se tali. Sa ou lagona se talitonuga malosi e faapea ua finagalo lava le Alii ou te auauna atu i le Tominiko Ripapelika, o lea sa matou galulue loa. Sa tusi mai e lou fomai se talavai mo le 18 masina, ae ua totogi e le inisiua le na o fualaau mo le tausaga, ma tuua ai i matou e totogi mo le 6 masina mulimuli. A o matou agai atu i luma ma le faatuatua, mulimuli ane sa maua seisi tau taugofie.
Ina ua vaetofia au e avea o se faifeautalai, sa faamanuia au e lau peresitene o le siteki ina ia le aafia au e lou tulaga i le misiona—o se folafolaga e mafai ona ou molimau atu sa faataunuuina lava. E ui ina sa falo au i lou malosi faaletino, ou te iloa e ala i le Togiola a Iesu Keriso, sa mafai ai ona ou foia luitau sa ou feagai ai a o lei tuua ma le taimi o lau misiona.