6 Mafuaaga Tatou Te Manaomia ai lava le Ekalesia!
O le tele o mea i le soifuaga e le faamalosia. Ae o le avea ai ma tagata sa faamoemoe e avea ai oe, e ao ona e mulimuli i le fuafuaga na saunia e le Tama Faalelagi mo oe.
Pe ua e faalogo ea i se tasi o fesili pe aisea ua i ai sa tatou lotu? Pe aisea tatou te manaomia ai le lotu? Aisea ua latou le na o le faaleagaga ai i latou lava—o atu i mauga poo le matafaga po o se isi nofoaga faapitoa ma lagona latalata ai i le Atua—ma taua lea ua lelei?
E moni lava e mafai ona e latalata i le Atua po o fea lava le mea o e i ai (o le mea moni, o se manatu lelei lava lea!) ae o loo i ai i le Tama Faalelagi nisi e tele atu o loo faaputuputu mo outou nai lo le faaleagaga masani ai. Ua finagalo o Ia ina ia avea oe ma tagata silisili e te mafai ai. O le mea moni, ua finagalo o Ia ina ia fai oe ma tofi o mea uma ua ia te Ia ma maua le ola e faavavau. Ma e i ai Lana fuafuaga ma le faatulagaga ina ia mafai ai ona e faia o lea. O le fuafuaga o le ata o le faaolataga, ma o le Ekalesia a Iesu Keriso o le Au Paia o Aso e Gata Ai o le faalapotopotoga—” o le ekalesia ola ma faamaoni e tasi i luga o le fogaeleele atoa” (MF&F 1:30).
O mafuaaga nei e ono i le ala tatou te matua manaomia ai lava le Ekalesia.
1. Ia Aoao ma Auai i le Talalelei a Iesu Keriso
O se tasi o faamanuiaga o le avea ai ma se tagata o le Ekalesia o lo tatou aoao ai i le atoaga o le talalelei (tagai MF&F 1:17–23). Afai ua ia i tatou se manao faamaoni e aoao, ma afai tatou te loto maualalo, tatalo, filiga, ma usiusitai, e mafai ona tatou maua se molimau ma i ai le faamoemoe i le Toetu ma i le Togiola o Iesu Keriso.
E ala i taitai o le Ekalesia ma punaoa a le Ekalesia, ua tatou aoao foi e uiga i isi aoaoga faavae taua, e aofia ai le Toefuataiina o le talalelei, o le valaauina o perofeta i aso nei, ma le natura moni o le Aiga-Atua. O le ola e tusa ai ma mataupu faavae moni e aumai ai ia i tatou le olioli ma le fiafia.
2. Ia Maua Sauniga ma Feagaiga Taua
O le galuega a le Tama Faalelagi o le “ia aumaia le tino ola pea ma le ola faavavau o le tagata” (Mose 1:39). Ae o nisi o taimi atonu e galo ia i tatou o Lana galuega e manaomia ai nisi o galuega a i tatou foi! Tatou te agavaa i faamanuiaga o le ola e faavavau e ala i le usiusitai i sauniga ma feagaiga o le talalelei. Na saunoa mai Peresitene Russell M. Nelson, “Tatou te le na ona faamoemoe o tatou ala i le afioaga o le Atua. Ia tatou usiusitai i tulafono e autu i ai faamanuiaga uma lava [tagai MF&F 130:20-21].”1
“O sauniga tatou te auai ma feagaiga ua tatou osia ua alagatatau mo i tatou e toe foi atu ai i le afioaga o le Tama Faalelagi ma ola ai ma Ia. O na sauniga ma feagaiga e manaomia ai le perisitua—ua maua lea i le na o le Ekalesia moni a le Atua. A aunoa ma na feagaiga, o le a leiloloa lava i tatou.
3. Ia Fesoasoani le tasi i le isi i le Ala
Sa aoao mai Elder D. Todd Christofferson o le Korama a Aposetolo e Toasefululua, “O se mafuaaga tele ua faia ai e le Alii se ekalesia, o le fatuina lea o se nuu o le Au Paia o le a lagolago le tasi i le isi i le “ala sa’o ma le vaapiapi lea e tau atu i le ola e faavavau.’ [2 Nifae 31:18].”2
I le lotu, e mafai ona tatou atinaeina sootaga lelei ma isi. E mafai ona tatou fesoasoani o le tasi i le isi i taimi o puapuaga a o tatou taitai, faatonutonu, ma savavali i tafatafa o le tasi ma le isi (tagai “O le Atua lou Tama,” Viiga, nu. 184; Efeso 2:19). Na saunoa Elder Jeffrey R. Holland o le Korama a Aposetolo e Toasefululua. ‘O i tatou uma o fanau a le Atua, ma e ao ona tatou aoao le tasi i le isi; e tatau ona tatou fesoasoani le tasi i le isi e ‘saili le ala.’”3 O le Ekalesia o le nofoaga sili ona lelei e faia ai lena!
4. Ia Fesoasoani i Aiga ina ia Agavaa mo le Ola e Faavavau
O le isi mafuaaga sili ua i tatou le Ekalesia o le fesoasoani lea i aiga ina ia agavaa mo le ola e faavavau. O le sauniga o faamauga i le malumalu ua mafai ai ona toe faatasia ia aiga e faavavau. Ina ia tupu lena mea, e ao ona tatou ola agavaa ina ia maua na faamanuiaga. E fesoasoani le Ekalesia i aiga ina ia fesoasoani ai le tasi i le isi e faia lena.
E pei ona aoao mai e Elder Christofferson, “O le taua o le aoao atu i le talalelei ma sauniga o le perisitua e faatautaia e le Ekalesia ia agavaa ai aiga mo le ola e faavavau.”4 O lea, e fesoasoani le Ekalesia ina ia tatou ola ai e tusa ma ia feagaiga—ma fesoasoani ia tatou lagolago le tasi i le isi i taualumaga o le olaga.
5. Ina ia Faamanuia Tagata Uma i le Lalolagi Atoa.
Na saunoa Elder Christofferson e faapea a o tatou galulue faatasi i le Ekalesia, e mafai e le Tama Faalelagi ona faataunuuina mea e manaomia ia e le mafai ona faataunuuina e tagata taitoatasi po o ni vaega toaitiiti.”5
E te iloa o tausaga taitasi mai le 30 tausaga ua mavae, sa foai atu ai e le Ekalesia le US$40 miliona o mea o le uelefea ma fesoasoaniga mo tagata ma galuega o le auauna atu? O le lima foai ma auaunaga fesoasoani ua ofoina mai e tagata o le Ekalesia ua faataunuuina ai mea e le mafai ona fai i se isi lava auala.
E ala atu i la tatou polokalama maoae o faifeautalai e faasoa atu e faifeautalai le malamalama o le talalelei ma tagata i le lalolagi atoa. Toeitiiti 105,000 faifeautalai (e aofia ai autalavou laiti ma matutua) o loo auauna atu. Oka! E sili ae nai lo le aofai o tagata i nisi o aai!
Ma ona o le lima foai ma le agaalofa o tagata, ua i ai i le Ekalesia punaoa e fausia ai malumalu i le lalolagi atoa. Mai ia Aperila i le 2018, e 182 malumalu a le Ekalesia ua galueaina, ma le isi 13 o loo fausiaina, po ua faasilasilaina.
6. Ia Fausia le Malo o le Atua i le Lalolagi
O se tasi o mafuaaga silisili ona taua ua faatuina ai e le Atua se ekalesia ona o le malo lea o le Atua iinei i le lalolagi (tagai MF&F 65). Ua faaeeina e le Alii i luga o Iosefa Samita ma perofeta ma aposetolo uma mai lena taimi ki o le perisitua. Sa aoao mai Elder Christofferson, “I le pule o nei ki, ua faasaoina ai e ofisa o le perisitua a le Ekalesia le mama aiai o le aoaoga faavae a le Faaola ma le tauamiotonuina o Ana sauniga faaola.”6
E ala i taitai o le Ekalesia, e mafai e le Alii ona taitaia Lana galuega ma auauna atu i Ana fanau. A aunoa ma lenei taitaiga, o le a tele ituaiga o manatu ma aoaoga pepelo o le a faamatau e taitaia i tatou i ala pouliuli faasaina. I se isi faaupuga, ina ia fesoasoani tatou te iloa le ala e taunuu ai i le ola e faavavau, tatou te manaomia le puipuiga ua tuuina mai e perofeta ma aposetolo ua moni ona tofia ma faauuina. E na o le Ekalesia e tupu ai lena mea.