Itulau o le Lotoifale
Faaauau Pea ona Tuputupu Ae le Ekalesia i Amerika Samoa
O loo faaauau pea ona tuputupu ae le faitau aofai o tagata auai i le Ekalesia i Amerika Samoa. O se tasi o faataitaiga o lena tuputupu ae e mafai ona maua i Aunuu.
I le 1985, sa faatulagaina ai se Aoga Sa i Aunuu. E tasi le tausaga mulimuli ane, ua tupu le Aoga Sa i le pe a ma le 40 tagata o le ekalesia ma ua faatu ai se paranesi. Na tumau pea le aulotu o se paranesi mo le 30 tausaga, peitai i le tausaga ua mavae na toe faafouina le taulai a tagata o le ekalesia i le galuega faafaifeautalai. I le isi tausaga na sosoo ai na faatupulaia le faitau aofai i le 16%.
E tusa ai ma le taitai o le ekalesia o Michael Lavea, o lena faatupulaia na mafai ai e le paranesi ona ausia le tulaga o se uarota i le aso 14 Ianuari 2018. Na mafua ai foi ona toe faafouina ma faalautele ai le fale lea na feiloai ai le uarota.
Ma le isi, na foia e le Paranesi a Amanave i Amerika Samoa se luitau maoae ma ausia le latou sini o le avea ma se uarota.
O Adney M. Reid, peresitene o le Siteki o Pago Pago Samoa Sisifo, na saunoa, “o se aafiaga ese lava ma sa i ai le aao o le Alii i le faagasologa atoa lava. Na Ia matuai faamanuiaina lava le Uarota [a Amanave] mo lo latou faatuatua, galue malosi ma le tuuto i le tuleia i luma o le galuega.”
I se taimi ao lei umi ona mavae le amataina e Peresitene Reid o lana auaunaga, sa ia luiina le Peresitene o le Paranesi o Sagala ma le Paranesi a Amanave lea na ia taitaia ia lava le faatoateleina o lo latou auai i masina e lima a sau ina ia avea ai ma se uarota. Sa amata ona galulue Sagala ma le paranesi ma sa faamanuiaina ae faafuasei loa ona maliu Sagala.
Nai lo le faavauvau, na lolofi atu tagata o le Paranesi a Amanave ma siosiomia lo latou taitai fou, o Lele Toa, ma faaauau ona valaaulia isi e auai atu ma i latou. I le toe ono vaiaso o le lima masina ua mavae atu, sa tofia ai e le Peresitene o le Misiona a Apia Samoa o Peresitene Arthur D. Hannemann le toafitu o ana faifeautalai sili ona lelei e fesoasoani i tagata o le Paranesi o Amanave e saili nisi tagata lolotu.
I totonu o le na o le toe tolu vaiaso (ma le tolu vaiaso ao lumanai le aso na setiina e Reid e avea ai ma se sini) ua lava le tuputupu ae o le paranesi e avea ai ma se uarota.
Na taumafai talu ai nei le Uarota ina ia maua se fanua e fausia ai se faletatalo. Na faataga e tagata e anaina le fale lea e faaaoga i le taimi nei e le Uarota mo ana sauniga e faatele le fale.
O le faaaogaina o meafaufale na saunia e le Ekalesia, ua faaopoopo ai nei e tagata o le Uarota se faaopoopoga i le fale.