Soka ma Aso Sa

Saunia e Elder Jörg Klebingat

O le Fitugafulu

I Siamani, o le soka o le taaloga sili lea ona taatele. Na saini au e lou tama mo le kalapu soka i le lima o ou tausaga. Sa matou toleni faatolu pe faafa i le vaiaso. O taaloga e masani o Aso Toonai ma Aso Sa. A o ou taalo soka mo le au a le kalapu, sa ou taalo soka ma au uo. Sa matou taaalo soka toetoe o aso uma seia goto le la.

Ina ua 15 ou tausaga, sa amata ona ou taalo mo se au i se aai tele. Na amata ona fai le soka ma mea taua tele. Sa matou toleni atili pea. Sa matou malaga atu i nisi nofoaga e tele. Na matou taaalo ma isi au e tele. Na fai le soka ma ou olaga.

Ina ua toeitiiti atoa lou 18, sa ou iai i se koneseti. Na ou vaai i se tama e pei o lou matua. Sa iloagofie o ia. Sa le inupia, ulaula, pe fai upu masoa. Sa ou fia iloa pe aisea. Na ou iloa o ia o se tagata o Le Ekalesia a Iesu Keriso o le Au Paia o Aso e Gata Ai. O lana faataitaiga na ou manao ai ou te fia iloa atili. Mulimuli ane ua ou auai i le Ekalesia.

Ina ua uma ona ou papatiso, sa ou aoaoina ni mea se lua. Muamua, e le tatau ona ou taalo soka i le Sapati. E tatau ona ou alu i le lotu. Lona lua, e finagalo le Tama Faalelagi ia ou faia se misiona. Ae sa ou lelei lava i le soka. Sa iai sau uo na ma taaalo soka a o ma tuputupu ae. Na ofo mai o ma avanoa e taaalo ai i au faapolofesa. Na talia e lau uo le ofo. Sa ou filifili e faatuanai le soka ae ou alu i le misiona. Sa le i faigata le filifiliga aua na ou iloa e moni le Ekalesia.

Ae o lau filifiliga sa faigata mo lou aiga ma uo. Sa le malamalama i latou i le mea sa ou faia. Na lafo mai e ou matua tipiga nusipepa o lau uo o loo taalo soka. Sa le faigofie lena mo au. Ae sa ou le faafitia lava le auauna i se misiona.

Na faamanuiaina au e le Tama Faalelagi i aso uma ona ua ou filifili e auauna i se misiona. Ua Ia faamanuiaina au i le filemu. Ou te lagonaina le lagona lelei e oo mai le faia o le filifiliga sao.