O Le Faavae Faaleagaga mo le Ola Tutoatasi o le Ekalesia i Mea Tautupe
Siiina mai i se saunoaga na tuuina atu i se Fonotaga mo Talafaasolopito o le Ekalesia 2018, “Financing Faith: The Intersection of Business and Religion,” i le Iunivesite o Polika Iaga i le aso 2 Mati, 2018.
I le avea ai ma taitai o le Ekalesia, tatou te faaauau pea ona lagonaina lo tatou tiutetauave maoae o le faaaogaina o sefuluai ma taulaga paia i se tulaga e fiafia i ai le Alii.
Sa ou maua se avanoa talu ai nei e asiasi ai i Katelani, Ohaio. I lenei nofoaga faasolopito, lea e tele mea mataina o le Toefuataiga na tutupu ai, ua valaaulia ai ia tagata asiasi ia toe mafaufau i le faatuatua ma le talatuu a alii ma tamaitai totoa o e na faataatiaina le faavae mo lenei galuega tele i aso e gata ai. E ui o Katelani sa o se vaitaimi o le tuputupu ae ofoofogia ma le malosi o le tulaga faaleagaga, ae o le toatele o nei uluai Au Paia sa matuai matitiva lava ma ola i ni tulaga matautia. Sa latou ositaulagaina mea uma—e masani lava o faatoaga ua faamanuiaina ma galuega ua mautu—ina ia mulimuli ia Iesu Keriso ma Lana perofeta o Iosefa Samita.
Ao ou savalia nei laueleele paia, sa le mafai ona aveesea mai lou mafaufau ia eseesega matautia lea na i ai i le va o le mativa sa i ai muamua Katelani ma le manuia ua i ai nei le Ekalesia ma ona tagata o le tele o tupulaga. Ua faamanuiaina e le Alii Lana Ekalesia ma le Au Paia o Aso e Gata Ai i se tulaga ofoofogia!
O lenei anoanoai o faamanuiaga faaletino ua fausia i luga o le folafolaga a le Atua e masani ona fofoga soo mai “o le tulaga e oo i ai la outou tausiga o a’u poloaiga o le a outou manuia i le laueleele.”1
O lenei folafolaga e taulai atu i le tala ma aoaoga o le Tusi a Mamona. E faaalia mai i ni mau eseese e 18, ma i le fitu o ona tusi e 15. E ui o le faamanuiaga o le manuia o loo ta’ua i nei mau e faaautu lava i se tulaga faaleagaga, ae e aofia ai foi le gafatia o le nuu a le Atua ia fiafia i le alualu i luma tau tamaoaiga ma ia ola tutoatasi faaletino.
O le mea na sili ona matauina, o le manuia faaletino e tupuga mai i le usiusitai faamaoni i nai mataupu faavae taiala lea na faaalia e le Alii e ala atu i Ana perofeta ma ua avea ma se vaega o le olaga i aso uma ma aga ma tu o le Au Paia o Aso e Gata Ai. O nei mataupu faavae e aofia ai le tulafono o le sefuluai, le tulafono o le anapogi, ma le manaomia o le aotauina, galuega, ma le ola tutoatasi. Ua fautuaina foi tagata o le Ekalesia ina ia ola i totonu o mea ua lava maua, aloese mai aitalafu e le manaomia, ma saunia mo le lumanai e ala i le atiinaeina o ni mea faaleoleo faaletino, e aofia ai meaai ma mea tautupe.
Ao aoao atu nei mataupu faaletino i tagata o le ekalesia, ua faatinoina foi e taitai o le Ekalesia i se tulaga tele atu mo le Ekalesia atoa. I ana aiaiga faavae tautupe ma teugatupe, ua faatinoina ai e le Ekalesia aoaoga faavae ma mataupu ia o loo aoao atu i ona tagata. O le a ou talanoa atu nei i le fa o nei mataupu faavae.
Mataupu Faavae Muamua:. O Le Tulafono o le Sefuluai
I se faaaliga na maua e Iosefa Samita i le aso 8 Iulai, 1838, na faatonuina ai e le Alii “i latou o e ua faapea ona faasefuluaiina, ia totogi atu le tasi-vaesefulu o a latou mea faaopoopo uma i tausaga taitasi.” Sa faamalamalama mai foi o lenei lava faatonuga e mo le Au Paia uma ina ia avea “ma tulafono tumau ia te i latou e faavavau.”2
O le tulafono o le sefuluai na mauaina i lena aso e avea o se poloaiga mai le Alii ma le toefaatulagaina o se tulafono paia lea na faamamaluina e le fanauga a Isaraelu i taimi ua mavae. Sa avea ma se faatusa o le feagaiga na osia e le Alii ma Lona nuu—afai latou te tumau faamaoni i ai, o le a Ia faamanuiaina i latou i le faaleagaga ma le faaletino. I lenei vaitaimi, o loo faaauau pea ona avea le tulafono o le sefuluai ma se faatinoga taua mo le Au Paia o Aso e Gata Ai, po o fea lava o latou nonofo ai, o latou tulaga faaagafesootai, po o tulaga faalemanuia faaletino. O se faavae foi o le tulaga mautu tautupe o le Ekalesia.
Talu mai lo’u valaauga i le Au Epikopo Pulefaamalumalu, e le’i muta lava le faagaeetiaina o a’u i le faatuatua ma le tuuto o tagata o le Ekalesia ao latou ola ai i lenei tulafono. A aunoa ma le sefuluai, o le a le mafai e le Ekalesia ona faataunuuina ana misiona paia. I se saunoaga o le konafesi aoao faasolopito, na tautino mai ai e Peresitene Gordon B. Hinckley (1910–2008): “Ou te matuai faafetai lava mo le tulafono o le sefuluai. Ia te a’u o se vavega o loo tupu pea. Ua tupu ona o le faatuatua o tagata. O le fuafuaga a le Alii mo le faatupeina o le galuega o Lona malo.”3
I lena lava aso i le 1838, sa maua ai e Iosefa se isi faaaliga lea na faamalamalama atu ai e le Alii le ala e tatau ai ona faamaonia ma faatautaia ai le faaaogaina o le sefuluai. Sa Ia fetalai mai, “ia taulimaina ia mea e se aufono, e aofia ai le Au Peresitene Sili o laʼu Ekalesia, ma le epikopo ma lana aufono, ma laʼu aufono maualuga; ma i loʼu lava leo ia te i latou, ua fetalai mai ai le Alii.”4 O le “epikopo ma lana aufono” ma “la’u aufono maualuga” o loo faatatau i ai le mau i lenei faaaliga, ua lauiloa i aso nei o le Au Epikopo Pulefaamalumalu ma le Korama a Aposetolo e Toasefululua.
I lo tatou vaitaimi, o loo faaauau pea ona faatinoina ma le sa’o nei faatonuga o loo i ai i le vaega 120 o le Mataupu Faavae ma Feagaiga. O Aso Faraile muamua uma o Tesema, e fono faatasi ai le Au Peresitene Sili, Korama a Aposetolo e Toasefululua, ma le Au Epikopo Pulefaamalumalu e iloilo ma faamaonia le vaevaega o tupe paia mai sefuluai ma taulaga ua fuafuaina mo le tausaga a sau. O le faia o sea ituaiga fonotaga ua faamautinoa ai, ua faia faaiuga i le agaga o le fefautuaai faatasi, faaaliga, ma le lotogatasi.
I le avea ai ma taitai o le Ekalesia, e faaauau pea ona tatou lagonaina la tatou tiutetauave sili e faaaoga sefuluai ma taulaga paia i se tulaga e talafeagai ma e fiafia i ai le Alii. E pei ona matuai lelei ona faaalia mai e Elder David A. Bednar o le Korama a Aposetolo e Toasefululua, “O loo matou matua nofouta i le natura paia o tupe iti e lua a le fafine ua oti lana tane.”5 Na faaopoopo mai Peresitene Hinckley:
“O tupe e maua e le Ekalesia mai tagata faamaoni o le ekalesia e paia naua. O le atotupe a le Alii. … O tupe ia e tatou te vaaia, ua tuu mai i ai se faatuatuaina paia e taulimaina na tupe ma le matua faamaoni a’ia’i ma le faautauta tele, o ni foai paia a tagata.
“Matou te lagona so matou tiute mamafa ia te outou o e tuuina mai nei foai. Matou te lagona foi se tiute maoae tele atu i le Alii e ona nei tupe.”6
E le o i tatou o se fale tupe po o se pisinisi. O i tatou o le Ekalesia a Iesu Keriso, ma e leai se isi faamoemoega a lenei Ekalesia nai lo lena ua atofaina mai e le Alii Lava Ia—e faapitoa lava, ina ia valaaulia tagata uma ia “o mai ia Keriso, ma faaatoatoaina ia te ia,”7 e ala i le “fesoasoani i tagata o le ekalesia ia ola i le talalelei a Iesu Keriso, faapotopotoina o Isaraelu e ala i le galuega faafaifeautalai, tausiga o e matitiva ma e le tagolima, ma faataunuuina le faaolataga o e ua maliliu e ala i le fausiaina o malumalu ma le faatinoina o sauniga sui mo i latou.”8
E ala i aiaiga faavae, ua faamaonia ai ma aveina atu ai tupe paia o le sefuluai e lagolago ai le misiona faaleagaga ma faalelotu a le Ekalesia. Ua faaaluina e lagolago ai vaega tetele e ono: (1) sauniaina ma le faatumauina o nofoaga o tapuaiga mo le silia ma le 30,000 o aulotu i le lalolagi atoa; (2) faatautaiaina ai polokalama tau le uelefea ma le fesoasoani alofa a le Ekalesia, e aofia ai le silia ma le 2,700 poloketi i le 2017; (3) saunia ai polokalama o le aotauina, e aofia ai aoga o le Ekalesia, iunivesite, ma polokalama o le seminare ma le inisitituti; (4) lagolagoina ai ia le faagaoioiga o a tatou faifeautalai i le lalolagi atoa, e aofia ai misiona e 430 ma punaoa e manaomia e pe tusa ma le 70,000 faifeautalai; (5) fausiaina ma le faagaoioia ai ma le toeitiiti atoa le 160 o malumalu i le lalolagi atoa, ma le tele o isi o le a oo mai, ma faatautaia ai se polokalama ua faalauteleina o talafaasolopito o aiga ma le teuina o faamaumauga; ma le (6) lagolagoina o le puleaina aoao o le Ekalesia.
Ou te faafetai mo le tulafono o le sefuluai. O se puna o faamanuiaga, i le faaleagaga ma le faaletino, mo le Ekalesia ma mo ona tagata taitoatasi.
Ia Iulai 2016, sa foai atu ai e le LDS Charities ni nofoa taavalevale ma ni uila pa’u tolu e tulei i lima se 280 i Karimnagar, Initia. Talu mai le 2001, ua silia ma le 500,000 nofoa faatavalevale ua tufatufa atu i atunuu e 133 e le LDS Charities.
Mataupu Faavae Lona Lua: Ola Tutoatasi ma ia Saoloto
O le faitalia a le tagata lava ia o se tasi o meaalofa silisili a le Atua. E taua tele mo lo tatou alualu i luma faalelalolagi ma lo tatou faaolataga e faavavau. E ala i le ola tutoatasi faaletino ma faaleagaga, e alualu ai i luma fanau a le Atua i lo latou tomai ia faia ma le saoloto ni filifiliga ma faataunuu ai le faamoemoega o lo latou foafoaga.
O le mea lea, e le o se mea e ofo ai le valaaulia e le aunoa e perofeta o lo tatou tisipenisione o tagata o le Ekalesia ina ia taumafai ia ola tutoatasi. E faapitoa lava le taua o upu a Peresitene Hinckley:
“Ou te apoapoai atu ia te outou ia vaavaai i tulaga o a outou mea tautupe. Matou te uunaia outou … ina ia faautauta i a outou tupe faaalu; ia pulea lelei outou lava i a outou faatauga ina ia aloese ai mai le aitalafu. Ia totogi faauma aitalafu i se vave e te mafaia ai, ma ia faasaoloto outou mai saisaitiaga.
“O se vaega lenei o le faaletino o le talalelei ua tatou talitonu i ai. Tau ina faamanuia outou e le Alii … ia faatulaga lelei o outou aiga. Afai ua uma ona totogi a outou aitalafu, afai o i ai sau tupe o teu, e tusa lava pe itiiiti, afai e pesi mai matagi i luga a’e o lou ulu, o le a i ai le malutaga mo lou [aiga] ma le toafilemu i o outou loto.”9
Na faamamafa mai foi e Peresitene Russell M. Nelson ia faamanuiaga o le ola tutoatasi ina ua saunoa mai: “O le galue ma le loto i ai ua maua ai e nisi se fiafiaga fou i le iloa o lo latou tulaga ma lo latou taua e faavavau. O le amiotonu, tutoatasi, ola faautauta, toaga, ma le faalagolago o le tagata ia te ia lava, o sini ia mo tagata taitoatasi. O nei uiga uma e suia ai olaga.”10
E pei lava ona faatumauina e le atamai i le faia o paketi i le aiga le saolotoga o tagata taitoatasi o le aiga, o le pulea tatau o tupe o le ki lea i le mafai ai e le Ekalesia ona galue saoloto. Na sosoo lenei mea ma le faatonuga paia na tuuina mai e ala mai ia Iosefa Samita faapea “e ala i le tausiga alofa [a le Alii], … [o le a] tu lē faalagolago le ekalesia i luga o isi tagata uma i lalo o le lalolagi selesitila.”11
O lenei tausiga alofa e faapitoa lava le faamaoniga i o tatou taimi. Tatou te olioli i le mea moni faapea ua ausia e le Ekalesia le tutoatasi atoa i mea tautupe ma ua mafai ona faataunuu ana misiona e aunoa ma soo se ituaiga o aitalafu. E pei ona saunoa i ai Peresitene Hinckley: “Afai e le mafai ona tatou galulue faatasi, o le a tuuitiitia a tatou polokalama [ina ia sefe ai tupe]. … O le a tatou le aitalafu lava.”12
O aiaiga faavae o le puleaina o tupe ua fuafuaina e taitai o le Ekalesia ma ua faaaogaina ma le faaeteete i le fausiaina o le paketi faaletausaga ma le vaevaeina o tupe faaalu. O nei aiaiga faavae e aofia ai ni mataupu faavae faigofie ma manino se lua:
-
Muamua, o le aofaiga atoa o tupe faaalu e le silia ma tupe maua na muai fuafuaina.
-
Lua, o le paketi mo le faagaoioiga o tupe faaalu o le a le faateleina mai lea tausaga i lea tausaga i le televave e sili atu nai lo le tuputupu ae ua faamoemoeina i foai o le sefuluai.
O tagata o le ekalesia o loo nonofo latalata i faatoaga e anaina e le Ekalesia ua maua le avanoa e volenitia ai e piki ia fualaauaina suamalie ma fualaauaina faisua. O fua mai faatoaga a le Ekalesia e sapalaiina ia fale gaosi apa ma faleteuoloa a epikopo e fesoasoani ai i tagata o le ekalesia e le tagolima.
Mataupu Faavae e Tolu: Ola Faautatua Lelei
Ua malamalama tagata o le ekalesia i le mea moni faapea ua latou ola i se vaitau o mala, na afua mai i faatinoga faaletagata ma mala faalenatura. Ua manino ia valoaga e uiga i aso mulimuli, ma e tele naua le atamai i le sauniuni mo le lumanai—pe e mo se oge e ono tulai mai, mala, faalavelave tautupe, po o soo se isi lava tulaga faigata e lei mafaufauina. Ua fautuaina soo e taitai o le Ekalesia ia tagata o le ekalesia e faatino le ola faautauta lelei e ala i le teuina o meaai mo le aiga, e aofia ai vai faaleoleo, mea taumafa masani, vailaau faafomai, lavalava, ma isi sapalai e ono manaomia i tulaga o faalavelave faafuasei. Ua fautuaina foi tagata ina ia “faasolosolo malie ona teu se tupe faaleoleo e ala i le teuina e le aunoa o se vaega o a latou tupe maua.”13
O lenei lava mataupu faavae o le sauniuni faaletino ua faaaogaina foi i le tulaga aoao o le Ekalesia. Mo se faataitaiga, o fale e teuina ai le sana ma faleteuoloa ua faatumulia i mea manaomia autu mo faalavelave faafuasei ua uma ona faatuina i Amerika i Matu atoa. Ua mulimulitaia tonu foi e le Ekalesia le faatinoga o le tuuese o se vaega o ona punaoa i tausaga taitasi e sauniuni ai mo soo se mea manaomia e tulai mai i le lumanai.
O tupe ua tuuese e faaopoopo i le teugatupe faaleoleo a le Ekalesia. Ua teuina faaagaga i oloa ma tupeteu; o le tele lava e fiafia i pisinisi e totogi ai lafoga (o nisi e oo atu i le talafaasolopito o Iuta i le amataga o le Ekalesia); o pisinisi, falegaosi oloa, ma fale nofomau; ma mea e fiafia i ai tau faatoaga. O tupe faaleoleo a le Ekalesia ua pulea e se vaega o tagata faigaluega atamamai ma faufautua i fafo atu. E eseese ia tulaga lamatia, e ogatusa ma mataupu faavae mo tausimea atamamai ma faautauta ma le puleaina o teugatupe o nei onapo.
I le faataoto o taleni, o le matai lea na talosagaina se lipoti mai ana auauna sa aoaiina le tasi lea na te lei galueaina le tupe na tuuina atu ia te ia ae nai lo lena sa ia nanaina lena tupe i le eleele. Sa ia faamatalaina le auauna o se [tagata] “leaga ma paie”14 mo le le galueaina o lena tupe mo le toe maua ai o nisi tupe. O le ogatusa ai ma lenei mataupu faavae faaleagaga, e le o tuuina ia tupe faaleoleo a le Ekalesia i ni teugatupe e le o faagaoioia ae o loo faagalue i mea e mafai ona toe maua mai ai se tupe faasili.
O nei tupe galue e mafai ona faaaoga i taimi faigata ina ia faamautinoa ai le faaauau ai pea ma le le faalavelavea o le galuega o misiona, polokalama, ma le faagaoioiga o le Ekalesia ma ia taulimaina manaoga tautupe mo faalavelave faafuasei. Ua manaomia foi tupe ina ia tuuina atu ai punaoa tautupe faaopoopo e lagolago ai le misiona a le Ekalesia ia saunia mo le Afio Faalua mai o le Alii. O le a latou fesoasoani e lagolago le tuputupu ae o le Ekalesia ao faataunuuina ia valoaga faapea o le a aoao atu le talalelei a Iesu Keriso ma faatuina le Ekalesia i atunuu uma o le lalolagi. Matou te faamoemoe o le a faataunuuina se vaega tele o lenei tuputupu ae i atunuu tau atiae ma toatele o le lalolagi. O le a manaomia pea tulaga o le faateleina o mea tautupe e saunia ai le fiaafe o faletapuai, malumalu faaopoopo, ma isi punaoa taua e faamanuia ai olaga o tagata i soo se nofoaga o latou i ai. I se faapuupuuga, e leai lava se isi mafuaaga ua ala ai ona i ai nei tupe nai lo le lagolagoina o le misiona paia ua atofaina a le Ekalesia.
Mataupu Faavae e Fa: I Le Ala Lava a le Alii
Sa lapataia e Paulo le Au Paia i Korinito ina ia “le i ai lo [latou] faatuatua i le poto o tagata, a o le mana o le Atua.”15 Sa oo ina ou malamalama lelei atili i le taua o lenei mataupu faavae ina ua valaauina a’u e auauna atu i le Au Epikopo Pulefaamalumalu o le Ekalesia.
I le avea ai ma se Au Epikopo, sa matou fefautuaai faatasi e suesue ai i faafitauli, faaaoga o matou talaaga faaletagata lava ia, poto masani, ma vaega e atamamai ai. Ae o le iuga lava, o a matou faaiuga e faia i le agaga o le tatalo ma le saili e le aunoa o faaaliga e faatatau i le finagalo o le Alii. Ao matou mafaufau i mea e pei o faailo o le tamaoaiga lautele ma sailiiliga o mea tautupe, o la matou sini tupito lava o le faataunuu o o matou tiutetauave i se tulaga o le a faataunuu ai ia mamanu a le Alii ma le misiona paia a le Ekalesia o le valaaulia o tagata uma ia o mai ia Keriso. O lenei sini e na o musumusuga ma le mana o Lana perisitua e mafai ona ausia ai ma faatinoina ai. O le mauaina o le faatonuga ia faia mea i le ala lava a le Alii, o lenei valaauga ua faatumulia ai a’u i le lotomaualalo i aso taitasi.
Faaiuga
O nisi tagata e faamatalaina i lea taimi ma lea taimi le Ekalesia i lenei vaitaimi o se faalapotopotoga malosi ma faamanuiaina. Atonu e moni lenei mea, ae o le malosi o le Ekalesia e le mafai ona fuaina i le na o se fuainumera po o le matagofie o ona fale pe e ala i ana meatotino tautupe ma fanua. E pei ona saunoa Peresitene Hinckley i se tasi taimi, “Pe a uma ona tautalagia ma faia mea uma, na o le pau lava le tamaoaiga moni o le Ekalesia e i ai lea i le faatuatua o ona tagata.”16 O le ki o le malamalama i le Ekalesia “o le vaai i ai e le o se kamupani i le lalolagi atoa, ae o se faitau miliona o tagata faamaoni i le fiaafe o aulotu i le salafa o le lalolagi o loo mulimuli ia Keriso ma fetausiai i le tasi ma le isi ma o latou tuaoi.”17
I se isi faaupuga, o le Ekalesia o mea uma lava e mo tagata. E faatatau lava i tagata taitoatasi o e ua noatia faatasi e ala i talitonuga ma feagaiga lautasi. O ona malosiaga ma lona lumanai. Ou te matuai faafetai mo faaaliga na tuuina mai e le Alii i le vaitaimi o le popofou o le Toefuataiga e faatatau i le tulafono o le sefuluai, ola tutoatasi ma le saoloto, ola faautauta lelei, ma le foai atu mo le Au Paia i le ala lava a le Alii. Ou te molimau atu o nei mataupu faavae o se puna o faamanuiaga maoae faaleagaga ma faaletino mo tagata o le Ekalesia, o latou aiga, ma le Ekalesia atoa. O nei mataupu faavae o le a faaauau pea e taialaina ai o tatou laasaga ma lagolago ai le misiona a le Ekalesia seia oo i le toe afio mai o le Faaola.