O Tatalo a se Tina Fou

Krystal Baker Chipman

Iuta, ISA

I le avea ai ma se tina mo le taimi muamua mo se tamaitiiti laitiiti ma ulavale, ou te lagona i nisi taimi le i ai i lo’u olaga o sina mea e sili atu nai lo le suiga o napekini ma le faatulagaina o taimi mo le fafagaina

Ao tau faamasani i le tulaga faatina, sa ou le amanaiaina o’u manaoga faaleagaga. Nai lo le faitau o tusitusiga paia, e masani lava ona faanana ai i totonu sina moe e matuai manaomia lava po o le toe tasi lava se uta tagamea. O tatalo e masani lava o ni aioiga faatatope i lo’u Tama oi le Lagi ina ia moe la’u tama ma moe ai pea, po o le fesoasoani mai ia ou onosaia le aso.

Ina ua fa masina o la’u tama, na ou iloa le vaivai o lo’u tulaga faaleagaga ua i ai. Ua faaitiitia lo’u naunau e faamalosia la’u molimau. Sa ou le’i lagona le fia nofo i le tolu itula o le lotu, ma o isi tiutetauave i le fale ma le lotu na foliga mai ua le o toe i ai sou taimi po o le malosi mo ia mea. Sa ou toe fia lagonaina le malamalama o le talalelei, peitai sa ou vaivai ma leiloa po o fea e toe amata mai ai. I se tasi po sa ou tatalo faatauanau atu ai mo se fesoasoani.

O le taeao na sosoo ai, sa ou fosia ai a’u lava e alu i le lotu. Ao faalogologo ai i le lesona i le Aualofa, sa ou vaaia se pepa lautele o i ai se savali o loo faailoa mai ai le faamoemoega o le Aualofa. Na ou vaai i le pepa i Aso Sa uma, ae ou te lei mafaufau muamua lava i lana savali. Na tau mai ai o le faamoemoega o le Aualofa o le fesoasoani lea i tamaitai “ia faateleina le faatuatua ma le amiotonu o le tagata lava ia, faamalolosia auaiga ma aiga, ma sailia ma fesoasoani ia i latou e le tagolima.”

Sa ou toe faitauina. O le taimi lava lea sa taulai atu lo’u mafaufau i le “faateleina le faatuatua ma le amiotonu o le tagata lava ia.” Na manino mai ia te au o le taimi muamua e mafai ona ou faataunuuina o’u valaauga ma auauna atu ma le mataalia i isi, sa manaomia lo’u tausia o lo’u lava soifua maloloina faaleagaga. Sa ou amata i le tuueseina o le taimi i aso taitasi e faitau ai ia tusitusiga paia. Sa ou galue foi ina ia manatunatu loloto pe a ou tatalo.

A o amata ona ou fafagaina lou lava faatuatua ma le amiotonu faaletagata lava ia ma saili le taitaiga mai le Tama Faalelagi, sa ou lagona le toe faamalosia o lo’u alofa mo le talalelei toefuataiina a Iesu Keriso. O le auauna atu i valaauga, asiasi i o’u uso a Aualofa, ma le ai ma le inu i le faamanatuga i vaiaso taitasi na amata ona toe anoa i lo’u olaga. Ma o mea na ou mafaufau ua le o toe i ai sou taimi ma le malosi e fai ai, ua avea nei ma se faamafanafanaga ma malosiaga ia te a’u ma lo’u aiga.