Aoao atu e faaaoga ai le tekinolosi: Faaaafiaina o le Autalavou i le Lalolagi o Masini FAATEKINOLOSI
Saunia e Brian K. Ashton
Fesoasoani Lua i le Au Peresitene Aoao o le Aoga Sa
E faapefea ona avea le tekinolosi ma fesoasoani ae le o se fili i le potuaoga?
A o ou asiasi atu i uarota ma siteki i le Ekalesia, e masani ona fesili mai faiaoga ma taitai o le autalavou, “E faapefea ona tatou tausia masini faatekonolosi mai le avea ma faalavefau i le vasega?” I le taimi lava e tasi, o le toatele o faiaoga lelei o le autalavou sa ou matauina e amata a latou vasega i le fasi fuaitau “Ave ae lau telefoni ma saili mai le …” O lea, ou te manao e faasoa atu ni nai mea sa ou aoaoina e uiga i fesoasoaniga i le autalavou e faaaoga tekinolosi i auala amiotonu ma le aoga i le potuaoga o le talalelei.
Valoaga e faatatau i le Tekinolosi
Ua saunoa mai perofeta ma aposetolo ia i tatou e uiga i faamanuiaga o le tekinolosi, ma tau mai ia i tatou le mafuaaga na tuuina mai ai e le Tama Faalelagi tekinolosi e fesoasoani ia tatou faaalualu ai i luma Lana galuega i se ala faateleina vave. I le 1862 na aoao mai Peresitene Polika Iaga (1801–77): “O mea fou uma ua maua i le saienisi ma faatufugaga, e moni lava ma aoga i le tagata na tuuina mai i faaaliga tuusao mai le Atua. … Na tuuina mai faatasi ma se vaaiga e saunia le ala mo le manumalo aiai i le upumoni, ma o le togiolaina o le lalolagi mai le mana o le agasala ma Satani. E ao ona tatou faaaoga lelei nei meafou sili ua maua … ma tuuina atu i a tatou fanau faamanuiaga o vaega uma o le poto aoga, e saunia ai i latou e laa atu i luma ma faia a latou vaega ma le atoatoa i le galuega sili.”1
Faaaogaina o Masini Faatekinolosi i Gaoioiga Amiotonu
I lou olaga, o lau sailiiliga o le talalelei sa matua faaleleia e ala i le faaaogaina o tusitusiga paia ma isi punaoa i luga o le polokalama feaveai o le Potutusi o le Talalelei.
Ua saunia o tatou talavou e suesue, aoao atu, ma talai atu le talalelei i aso uma o le olaga o ni faifeautalai faamisiona e faaaoga ai le tekinolosi i auala ua faatoa amata ona tatou iloa. Ona o lo o taumafai le fili e faaaoga mea lelei ma meafou aoga uma ua fausia mo ona faamoemoega leaga, o le mea lea e alagatatau ai ia i tatou o matua, taitai, ma faiaoga ona fesoasoani i talavou e aoao le faaaogaina o le tekinolosi i auala amiotonu ma le aoga a o laiti i latou.
O le aiga o le nofoaga sili lea mo le faataunuuina o lenei mea. (E ao i matua o lo o saili i punaoa fesoasoani ona faaaoga nisi o mea ua saunia e le Ekalesia o lo o lisi atu i le itupa o lo o tuuina atu.) E ofoina atu foi e le potuaoga o le talalelei avanoa taua e fesoasoani ai i le autalavou e faafesootai ai a latou masini faatekinolosi ma gaoioiga amiotonu ma lagonaina ai le Agaga Paia. O nisi nei o auala e mafai ona fesoasoani ai faiaoga ma taitai e faia lenei mea.
Faatutu ni Faamoemoega e faalagolago i Mataupu Faavae
Faatutu faamoemoega e faatatau i le faaaogaina o tekinolosi i le potuaoga e faalagolago i mataupu faavae. O se tasi o mataupu faavae autu o le “O lo tatou faamoemoega i le vasega o le aoao lea o le talalelei e ala i le Agaga Paia. O lo tatou faaaogaina o masini faatekinolosi e fesoasoani i lenei taumafaiga, ae le fai ma faalavelave ia i tatou.” E sili mamao atu ona aoga lenei nai lo se tulafono e pei o le “Tatou te le faaaogaina agafesootai i le taimi o le vasega.” E molimoli atu e lenei tulafono le feau e faapea o le agafesootai e leaga, ae o le mataupu faavae e aumai ai le avanoa e faaaoga ai le agafesootai i le vasega i auala talafeagai, e faapei o le aapa atu ia i latou ua le auai mai ina ia latou iloa ua misia i latou ma valaau atu ia latou auai mai i le vaiaso fou.
Ua tatou faaleagaina a tatou talavou i tulafono e faailoa mai ai o se amioga ua sese ae leai. Ua faatupulaia ai le le malamalama e tusa ai ma le faaaogaina o tekinolosi i isi tulaga ma misia ai le avanoa e aoao atu ai le faaaogaina tatau o tekinolosi. O faamoemoega ua tatou faatutu i le fesoasoani a le autalavou i a tatou vasega e tatau ona talafeagai ma o latou tausaga ma le matutua.
Aoao i le Tekinolosi
Aua nei avea lou lava fefe ma le utiuti o lou malamalama e uiga i le tekinolosi e punitia ai le avanoa e faaaoga ai e le autalavou masini faatekinolosi i auala talafeagai. Na lipoti mai e se tasi uarota e faapea sa fai sa latou aoaoga mo faiaoga i auala e faaaoga ai masini faatekinolosi e suesue ai le talalelei. Na latou iloa ai a o faateleina le silafia e faiaoga i le faaaogaina o tekinolosi, ua faatupulaia foi lo latou fiafia e faaaoga masini faatekinolosi e aoao ai le talalelei, ma o le mataupu e uiga i le fai o le tekinolosi ma faalavelave i totonu o le vasega ua matua tea ese lava.
Fai Lesona Faagaoioi ma Fefaasoaai
Ua ou iloa o se auala silisili e fesoasoani ai i tamaiti e faaaoga le tekinolosi i le auala amiotonu o le faia lea o lesona ina ia faagaoioi ma fefaasoaai ma faaaofia ai le faaaogaina o masini faatekinolosi i le fuafuaga o lesona. E seasea ou maua ni tamaiti o faaaoga le talafeagai a latou telefoni feaveai i potuaoga o lo o tuuina atu ai e faiaoga fesili musuia, ua auai tamaiti i le lesona ma lagona le alofa o le faiaoga mo i latou, ma ua faatasi mai le Agaga Paia.
Pe a tupu lenei mea, e masani ona amata e le faiaoga le vasega e ala i le tuuina atu o se fesili musuia ona saili lea e le autalavou, e masani i ni vaega toalaiti, le tali i le fesili mai tusitusiga paia ma saunoaga a perofeta. I le taualumaga o le lesona, ua faaosofia e le faiaoga tamaiti e saili i tusitusiga paia, suesue i lauga o konefesi aoao, matamata i vitio ua saunia e le Ekalesia, ma talanoa i mea ua latou aoaoina. O le tele o le faaaofia o le autalavou i le faasologa o le aoaoga, o le tele foi lea o le avanoa o le a latou faaaogaina ai talafeagai masini faatekinolosi.
Ia Faapaleni
A o tatou faaaofia tekinolosi ia tatou lesona, e taua ona manatua o lo tatou faaaogaina o tekinolosi e manaomia ona faapaleni. E ao ona tatou faaeteete ina ia mautinoa ia le avea le tekinolosi e fai ma lesona pe faalavelave foi mai le lagonaina o le Agaga Paia.
Ma le isi mea, o nisi o tamaiti e leai ni a latou masini faatekinolosi ma ia aua nei lagona ua le amanaia i latou. E ese mai le matamata i vitio ua saunia e le Ekalesia, o gaoioiga e mafai ona faia i masini faatekinolosi i le potuaoga ia mafai foi ona faia i tusitusiga paia ma kopi lolomi o mekasini a le Ekalesia.
I le ma lenei, e iai taimi e le talafeagai ai ona faaaoga masini faatekinolosi. Mo se faataitaiga, afai ua tuuina atu molimau a tamaiti po o faiaoga, atonu e talafeagai i faiaoga ona valaau atu ma le alofa tamaiti e tuuese a latou telefoni feaveai ae tau lava ina ia lagona mea o lo o aoaoina ai i latou e le Agaga Paia.
Faaali mai le Onosai
O le mea mulimuli, mo nisi talavou, o le aoaoina o le faaaogaina talafeagai o masini faatekinolosi i le vasega atonu e alu ai se taimi. O faiaoga e faapei o Keriso i so o lava se potuaoga latou te faaali atu le onosai ma le alofa ia i latou e le o mautonu.
Tekinolosi: O se Faaleleia, E le o se Faamatau
O le fesoasoani i le autalavou e faaaoga talafeagai le tekinolosi o le a faamanuia ai i latou i o latou olaga, ma faaleleia ai a tatou vasega. E pei ona faasoa mai e Elder Richard G. Scott (1928–2015) o le Korama a le Toasefululua, “O le tekinolosi, pe a malamalama i ai ma faaaogaina mo faamoemoega amiotonu, e le tatau ona avea ma se mea taufaamatau ae o se faaleleia atili ai o fesootaiga faaleagaga.”2
I le avea ai ma le Au Peresitene Aoao o le Aoga Sa, matou te valaau atu i faiaoga e opogi le tekinolosi ia latou lesona ma fai mea uma e mafai e fesoasoani ai i le autalavou e faaaoga le tekinolosi mo faamoemoega amiotonu. Afai e te fesili atu i le Tama Faalelagi e fesoasoani i au taumafaiga, o le a Ia tali mai i na tatalo.