Auala e Maua ai le Olioli i le Tulaga Faatina

Saunia e Meredith Burt

Mulimuli ane ua ou iloa le auala ou te alofa ai i le iai i le aiga ma lau fanau.

A o avea o se tina fou, sa ou lagona le lofia o au i le faasologa o aso taitasi i le tausia o tamaiti. Sa faigata ona vaai atu i lou toalua ma isi o tuliloa auala matagofie fou a o ou nofomau ai i lo matou fale pumoomoo i le aso atoa ma tausi tamaiti laiti e toalua. Sa ou manao e fiafia i le avea ai o se tina, ae sa ou le mautonu. Sa ou liliu atu i le Tama Faalelagi i le tatalo. Sa ou fesili atu ia te Ia e fesoasoani mai ina ia ou iloa ona sui lau vaai atu ma au lava. O tali na ou maua e faigofie ae ogaoga:

Faitau ou manuia; A ou taulai atu i mea lelei i lou olaga nai lo mea le lelei, ou te lagona le faafetai ma le fiafia.
Saili le matagofie ma le olioli i aso uma. Ou te maitauina o le tele o taimi e talie ai lau fanau e faaata ai foi ma au. Ou te fiafia i le mafai ona ou vaai i ai latou o tuputupu ae i aso uma. Na amata ona ou fiafia i le faataunuuina lelei o tiute i le fale, e oo lava i galuega ou te faia faafia i le aso. O se faamanuiga lenei o le Agaga ua ou maua mai le tatalo ma le taumafai.
Taaalo ma lau fanau. O le faaaluina o le taimi ou te taaalo ai ma lau fanau o se faamanuiaga tele lea. E fesoasoani ia te au e faatulaga lelei ai lou taimi ma faaitiitia ai mea e faalavelave ia te au, ma tau le maua ai se taimi e matamata ai lau fanau i le televise, faatupu faalavelave, ma taufaalili o le tasi i le isi! A ou taaalo ma lau fanau, e fiafia i latou, ma a fiafia i latou, ua ou fiafia foi. O le auai i a latou taaloga e fesoasoani ia te au e faatupulaia ai fegalegaleaiga malosi ma i latou ma maua ai e au le avanoa e vaai ai i le lalolagi e ala atu ia i latou. Ua faamanatu mai ai ia te au le mafuaaga o le taua o le ponatia faalematua.
Vaai i fafo atu o oe lava. Pe a ou taulai atu i isi, ou te le ola ai i ou lava faafitauli. E tuusaoloto mai ai au mai le lagona ponatia, faanoanoa, po o le loto vaivai ma fesoasoani ia te au e suia ia lagona i le alofa mama o Keriso. Ou te iloa le moni o lenei mea, ae ou te toe aoao iai nei mai lea taimi i lea taimi. Ou te le faia mea uma ou te faia mo au lava, ou te faia mo agaga taua ua tuuina mai e le Atua ou te tausia. Ua ou ola latalata lava e faapei o Ia pe a ou aoao i latou ina ia faapei lava foi o Ia.
Faatumau se vaaiga faaumiumi. Pe a ponatia au i galuega e foliga e le uma i ou luma, ou te faamanatu ia te au lava le taua ma le faapitoa o lenei taimi o le soifuaga. O le a ia te au lau fanau mo se taimi puupuu lava, ma e ou te faapelepele i le taimi ou te fesoasoani ai ia i latou e aoao ma vaai i lo latou ola tuputupu ae i ni tagata ofoofogia e finagalo le Tama Faalelagi ina ia avea ai i latou.

I le mulimuli ai i nei musumusuga ua suia atoa ai lau vaaiga i le tulaga faatina. I le taimi muamua, na ou lagona e faapei ua ou misia se faigamalaga matagofie o le soifuaga. Ae o lenei ua ou iloa o lau fanau o i latou o se faigamalaga matagofie. O le fiafia ma le faamoemoega sa ou fia maua sa iai i ou lava luma i le taimi atoa. Ua le na o au o se tamaitai teufale; o au o se faiaoga, o se faufautua, o se tagata faatuatuaina. O le tulaga faatina o se faamanuiaga sili ma se luitau sili foi, ma e ou te faafetai i auala ua faalauteleina ai au, aoao ai au, ma faamamaina ai au ina ia fai ma se tasi e silafia e le Tama Faalelagi e mafai ona avea ai au.