Mataupu Faavae mo le Auaunaga
Atinaeina o Fegalegaleaiga Aoga
E faateleina lo tatou gafatia mo le tausiga o isi pe a i ai se tatou fegalegaleaiga anoa ma i latou.
Ata mai le Getty Images
O le valaaulia e auauna atu i isi o se avanoa lea e fausia ai ni fegalegaleaiga alofa ma i latou—o le ituaiga fegalegaleaiga lea o le a faatoafimalie ai i latou i le talosaga mai mo se po o le taliaina o la tatou fesoasoani. Pe a tatou faia se taumafaiga e atiae lena ituaiga o fegalegaleaiga, o le a mafai ona suia e le Atua olaga i itu uma o le fegalegaleaiga.
“Ou te matuai talitonu e leai se suiga taua e aunoa ma ni fegalegaleaiga taua,” na saunoa ai Sharon Eubank, Fesoasoani Muamua i le Au Peresitene Aoao o le Aualofa. Ma mo a tatou galuega o le auauna atu ina ia avea ma suiga i olaga o isi, na ia saunoa ai, e tatau ona “mauaa i le naunau faamaoni e faamalolo ma faalogo ma felagolagomai ma faaaloalo.”1
O fegalegaleaiga anoa e le o ni togafiti. E fausia i latou i luga o le agaalofa, taumafaiga faamaoni, ma le “alofa faamaoni” (MF&F 121:41).2
Auala e Fausia ai ma Faamalosia Fegalegaleaiga
“Tatou te fausia [fegalegaleaiga] i le tasi le tagata i le taimi,” na saunoa ai Elder Dieter F. Uchtdorf o le Korama a Aposetolo e Toasefululua.3 Ao tatou taumafai e fausia ni fegalegaleaiga anoa ma i latou tatou te auauna atu i ai, o le a mafai ona taitaia i tatou e le Agaga Paia. O fautuaga nei o loo faavae i luga o se mamanu na ofoina mai e Elder Uchtdorf.4
-
Aoao e uiga ia i latou.
Na aoao mai Peresitene Ezra Taft Benson (1899-1994), “E le mafai ona e auauna lelei atu ia i latou e te le iloa lelei.” Sa ia fautuaina le iloaina o igoa o tagata taitoatasi o le aiga ma ia nofouta i mea taua e tutupu e pei o aso fanau, faamanuiaga, papatisoga, ma faaipoipoga. O lenei mea e saunia ai le avanoa e tusia ai se tusi po o le faia o se valaau e faamalo atu ai i se tagata o le aiga i se ausiga taua po o ni mea na faataunuuina.5
-
Faaalu faatasi le taimi.
O se fegalegaleaiga e alu ai se taimi e atiae. Vaavaai mo avanoa e faatumau ai se fesootaiga. Ua faaalia e suesuega o le faailoa atu i tagata e te popole ma alofa i ai e taua mo fegalegaleaiga maloloina.6 Asiasi soo atu ia i latou ua tofia oe e te auauna atu i ai. Talanoa ma i latou i le lotu. Faaaoga po o le a lava ni auala faaopoopo e aoga—e pei o le imeli, Facebook, Instagram, Twitter, Skype, valaau i le telefoni, po o le auina atu o se kata. Na saunoa Elder Richard G. Scott (1928–2015) o le Korama a Aposetolo e Toasefululua e uiga i le mana o ni faalauiloaga faigofie ma fatufatuai o le alofa ma le lagolago: “E masani lava ou te tatalaina a’u tusitusiga paia, … ae ou maua ai se fasipepa faamalosiau ma le agaalofa mai [lo’u toalua o] Jeanene, ua sulu i itulau. … O na faamatalaga tusitusiga taua … e faaauau pea ona avea ma se oa e le mafaatauina o le mafanafana ma le faananau.”7
Ia manatua foi, e manaomia i se fegalegaleaiga ni tagata se toalua. E mafai ona e ofoina atu le alofa ma le faauooga, ae o le a le mafai ona tuputupu ae se fegalegaleaiga sei vagana ua taliaina le ofo ma toe foi mai. Afai o le isi tagata e foliga mai e le taliaina, aua le faamalosia le fegalegaleaiga. Tuu atu ia te ia se taimi e vaai ai i au taumafaiga faamaoni, ma pe a talafeagai ai, fefautuaaina ma ou taitai pe mata e foliga mai e i ai pe leai foi se faamoemoega o se fegalegaleaiga anoa.
-
Fesootai atu ma le alofa.
O le fausiaina o fegalegaleaiga anoa e manaomia ai le alu i tua atu o mea e le loloto. O fegalegaleaiga papau e tumu i talanoaga laiti e uiga i faatulagaga, o le tau, ma isi mataupu itiiti, ae e le o aofia ai le fefaasoaai o lagona, talitonuga, sini, ma popolega e manaomia ina ia anoa atili ai ia fesootaiga. Ua mamanuina e le Tama Faalelagi lenei ituaiga o fesootaiga sili ona anoa e ala i le faasoaina mai o Ona lagona ma fuafuaga ma Lona Alo (tagai Ioane 5:20) faapea ma i tatou e ala i Ana perofeta (tagai Amosa 3:7). O le fefaasoaai o mea e tutupu i lea aso ma lea aso ma luitau o le olaga ma le tasi ma le isi e pei ona taialaina e le Agaga, tatou te maua ai le talisapaiaga mo le tasi ma le isi ao tatou mauaina mea talitutusa e fiafia i ai ma aafiaga e fefaasoaai.
O le faalogo o se vaega taua lea o le fesootaiga faapea e te alofa.8 Pe a e faalogo ma le totoa, o le a faateleina lou avanoa e fesoasoani atu ai i isi ia o mai ia Keriso ao e maua le malamalama ma le malamalamaaga i o latou manaoga ma ao latou lagonaina le alofagia, malamalama, ma le saogalemu.
-
Ia talisapaia eseesega faapea foi ma mea e tutusa ai.
“[O] nisi e talitonu e faapea, e manao le Ekalesia ia faia tagata uma [o le Ekalesia] ia tutusa—e tatau ona foliga, lagona, mafaufau, ma amio tagata uma ia pei o isi tagata uma,” na saunoa ai Elder Uchtdorf. “O lenei mea o le a feteenai ma le poto o le Atua, o lē na foafoaina tagata uma ia ese mai lona uso, atalii uma ia ese mai lona tamā. …
“E manuia le Ekalesia pe a tatou faaaogaina lenei eseesega e faamalosiau ai e le tasi le isi ia atinae ma faaaoga o tatou taleni e siitia ma faamalosia ai o tatou uso a soo.”9
O le alofa atu i isi e pei o le ala o loo alofa mai ai le Atua ia i tatou e manaomia ai lo tatou taumafai ia vaai atu i isi i le ala o silasila atu ai le Atua ia i latou. Na aoao mai Peresitene Thomas S. Monson (1927–2018), “E tatau ona tatou atiina ae le malosiaga e vaai atu ai i [isi], e le o tagata o loo latou i ai i le taimi nei ae o tagata e mafai ona avea ai i latou.”10 E mafai ona tatou tatalo atu mo le fesoasoani ia vaai atu ai i isi i le ala o silasila mai ai le Atua. Ao tatou taulimaina isi i lo latou gafatia mo le tuputupu ae, atonu o le a mafai ona latou tulai ae i le tulaga.11
-
Auauna atu ia i latou.
Ia nofouta i manaoga a i latou e te auauna atu i ai ma ia naunau e tuu atu lou taimi ma taleni, pe o i taimi o manaoga pe ona e te alofa. E mafai ona e i ai iina e tuu atu le faamafanafana, lagolago, ma le fesoasoani e manaomia pe a i ai se faalavelave faafuasei, ma’i, po o se tulaga faanatinati. Ae i le tele naua o fegalegaleaiga tatou te tali vave atu lava i ai. Ua tuu mai e le Atua ia i tatou le faitalia ina ia tatou gaoioi nai lo le faagaoioi (tagai 2 Nifae 2:14). E pei lava foi ona aoao mai le Aposetolo o Ioane faapea tatou te alolofa i le Atua ona na muamua ona Ia alofa mai ia i tatou (1 Ioane 4:19), a lagona e isi le moni o lo tatou alofa e ala i a tatou galuega o le auauna atu, e mafai ona faamaluluina loto ma faateleina le alofa ma le faatuatuaina.12 O le a fatu e lenei mea se taamilosaga agai i luga o galuega agalelei lea e mafai ona fausia ai fegalegaleaiga.
Auauna Atu e pei ona Faia e le Faaola
Na fausia e Iesu Keriso ni fegalegaleaiga anoa ma Ona soo (tagai Ioane 11:5). Na Ia silafia i latou (tagai Ioane 1:47–48). Na Ia faaaluina le taimi ma i latou (tagai Luka 24:13–31). O Ana fesootaiga na oo i tua atu o mea e le loloto (tagai Ioane 15:15). Na Ia talisapaia o latou eseesega (tagai Mataio 9:10) ma iloa o latou gafatia (tagai Ioane 17:23). Na Ia auauna atu i tagata, e ui o Ia o le Alii o tagata uma, na fetalai mai na afio mai o Ia e auauna atu ae le o le auauna atu i ai (tagai Mareko 10:42–45).
O le a se mea o le a e faia e fausia ai ni fegalegaleaiga malolosi ma i latou ua tofia oe e te auauna atu i ai?