O le Tusi a Mamona Tuai

Dan Hobbs

Idaho, ISA

I ni nai tausaga ua mavae, sa ou maua ai se meli faaleo i lau telefoni: “Po o Dan Hoobs lea o lo o nofo i Idaho Falls ma auauna atu i se misiona i Uasigitone i le 1974? O Toma Janaky lea. Ou te manatu sa e aoaoina lou tina ma lou tama.”

Sa ou tei. Sa ou faamisiona i Texas, ISA, ae le o Uasigitone, ae ou te iloa le igoa. Na vave ona ou mafaufau i le tusi i luga o lau kapoti—o se lomiga o le 1948 o le Tusi a Mamona. Sa ou tatala atu i se savali na tusilima i le faavaa o le itulau: “Ia faatasi le Atua ma oe. Ia faamanuia oe e le Atua! Frank ma Virginia Janaky, 1974.” Na faataalise ona toe foi lou mafaufau i tua i le 35 tausaga.

Sa 21 ou tausaga ma ua latalata i le faaiuga o lau misiona i Houston, Texas. Sa ma talai ma lau soa e aunoa ma se manuia tele ina ua ma tuitui atu i se faitotoa na tali mai ai se alii ma valaauina ma le fiafia i maua i totonu. Sa ia faailoa mai o ia o Frank Janaky ma faailoa atu maua i lona toalua o Virginia. Sa puupuu la ma asiasiga ia i laua.

I asiasiga na sosoo ai, sa maua aoao atu ai i laua i le talalelei. Sa le mananao i laua ina ia papatiso, ae sa faauo mai pea i laua. I se tasi o lesona, na ou iloa atu ai se kopi tuai o le Tusi a Mamona i luga o le fatatusi. Na ou le manatua pe faapefea ona iai ia i laua le tusi, ae ou te manatua ona faapea atu ou te fiafia tele iai.

E le i umi se taimi ae ou te le i toe foi atu i lou aiga, sa ma afe iai ma lau soa e faatofa iai. A o le i o ma o ese, na saini e Frank le Tusi o Mamona tuai ma tuuina mai ia te au o se meaalofa faamavae. Sa ia fesili mai pe mafai ona ou saini i le Tusi Paia a lo latou aiga ma lou igoa ma le tuatusi. O le taimi mulimuli lena sa ou vaai ai i le aiga o Janakys, ae sa ou tausia lelei la latou meaalofa.

Sa ou tali atu le valaau mai i le telefoni i lena afiafi. Na toe fesili mai Toma ia te au pe na fai sau misiona i Uasigitone i le 1974. Na ou faiatu ia te ia sa ou talai i Texas ma fesili iai po o ona matua ia Frank ma Virginia.

Sa ia faimai o ona matua sa siitia mai Texas i Uasigitone. Na ia manatu e faapea o faifeautalai na asiasia ona matua sa i Uasigitone. Sa fai mai o ia sa ia mauaina lou igoa ma le tuatusi i totonu o le Tusi Paia a le aiga.

“Ou te telefoni e tau atu ia te oe e faapea o maua ma lou uso ua uma ona papatisoina, ona o le lelei o faifeautalai i ou matua,” sa ia faimai ai. Sa fiafia tele i laua i faifeautalai uma sa fesootai atu ia i laua i le tele o tausaga.”

Ona tau mai lea e Toma ua maliliu uma i laua.

“Ae o lea ua maea ona matou faia o laua galuega i le malumalu,” sa ia faimai ai.

Ma loimata i ou mata, sa ou faafetai ia Toma mo lana valaau ma.

Mo ni tausaga sa ou lagona ai e faapea o lau misiona sa tau leai ni faamanuiaga. O nisi o taimi sa ou faapea ifo ai pe na ou pai atu ea i se olaga o se tasi a o ou auauna atu. O le telefoni mai a Toma o se alofa mutimutivale mai le Alii. Ou te faafetai mo lau misiona ma se vaega laiitiiti sa ou faia i le aumaia o le talalelei i le aiga o Janaky.