Seia Tatou Toe Feiloai
Taumafai Pea
Mai le “Afai Tou Te Tutumau lelei,” Liahona, Ian. 1985, 20–22.
Ina ia avea ma se manumalo i le tuuga mo le ola e faavavau e manaomia ai le taumafai—galue pea lava pea, onosai, ma ia tutumau lelei ma le fesoasoani a le Atua.
Atapue mai le Getty Images
Ou te mafaufau i apoapoaiga a le Faaola ia faia ma le fiafia mea uma o lo o iai i lo tatou mana [tagai MF&F 123:17]. Ou te mafaufau i le tama o le atalii faamaumauoa. Na ootia le loto o le tama i le leiloa ma le amio a lona atalii faalogogata. Ae tatou te le faalogo lava i lona tagitui, “O fea le mea ua ou sese ai?” “O le a se mea na ou faia ua oo ai lenei mea ia te au?” Po o le, “O fea le mea ua ou toilalo ai?”
Ae o lea e foliga mai ua tutumau e aunoa ma se faanoanoa i le amio a lona atalii ma talia o ia i lona toe foi mai i le alofa. “Aua o lou atalii lenei, na oti, ua toe ola mai; na le iloa foi o ia, a ua maua. …” (Luka 15:24).
A tatou faanoanoa ona o ni tagata o le aiga, e ao ona tatou aoao aemaise lava ona tutumau. A faapea lava ua tatou tuuina atu le alofa, onosai, ma le malamalama, e tusa lava pe leai se alualu i luma ua faailoa mai, ua le toilalo lava i tatou. E tatau ona tatou taumafai pea. …
Ina ia avea ma se manumalo i le tuuga mo le ola e faavavau e manaomia ai le taumafai—galue pea lava pea, onosai, ma ia tutumau lelei ma le fesoasoani a le Atua. …
… O tiga ma toatuga o le a feagai ma i tatou uma. Atonu o le a tatou maua i le lototiga, faanoanoa, maliu, agasala, vaivaiga, mala, gasegase o le tino, tiga, atu o le mafaufau, faitioga le faavaea, nofo toatasi, po o le teena. O le auala tatou te faatautaia ai nei luitau e iloa ai pe o le a avea nei mea ma maa e ponatia ai po o poloka e atiae ai. Mo e lototoa o nei luitau e avea ma mea e alualu ai i luma ma atiinae ai. …
O nisi o taimi i le avea ai ma fanau sa tau mai ia i tatou o le a lelei mea uma. Ae le faapena le olaga. E le afaina po o ai lava oe, o le a maua oe i faafitauli. O mala ma lagona le fiafia o faalavelave e aunoa ma le iloa i le fuafuaga o le olaga. …
… O mea silisili e fuaina i le ala e tali atu ai se tagata i mea o tutupu i le olaga e foliga le talafeagai, le uiga, ma le tatau lava. …
…O Iesu o le Keriso. O se tasi o Ona faailoga o le silisili, Lona tutumau, e tulai o se faailoilo mo i tatou e faataitai iai. I le taimi o Lona aumau ai i le lalolagi sa Ia tutumau pea a o Ia mafatia i tiga ma le teena i lo latou loloto lava. Ou te tuuina atu lau molimau o le a fesoasoani mai le Atua ia i tatou e tutumau a o tatou taumafai e ola ai i Ana aoaoga, saili i Ana fautuaga, ma tausi i Ana poloaiga.