Naʻe ʻi ai ha Vaka ke u Foʻu

Fai ʻe ʻEletā Juan Pablo Villar

ʻO e Kau Fitungofulú

Naʻe tokoni e aʻusia ʻa Nīfaí ke u vakai ki he founga te u lava ʻo fehangahangai ai mo e ngaahi faingataʻa ʻi heʻeku moʻuí.

Ngaahi tā fakatātā ʻa Axel Rangel

ʻI he taimi naʻá ku talaange ai ki heʻeku ongomātuʻá ʻoku ou fie ʻalu ʻo ngāue fakafaifekaú, naʻe ʻikai ke na fiefia. Ko au pē mo hoku taʻokete ko ʻAivení ʻi homau fāmilí naʻe kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne u kau ki ai ʻi hoku taʻu 18, pea ko e hili ʻeni ha taʻu ʻe taha mei ai, ne u fakakaukau ke u ngāue fakafaifekau taimi kakato. Neongo ne faifai pea loto ʻeku ongomātuʻá ke tuku ke u ʻalu, ka naʻe fakatokanga mai ʻeku Tangataʻeikí ko e taimi te u foki maí, he ʻikai ke ne lava ʻo fakapapauʻi mai te ne kei totongi ʻeku akó.

Ka neongo ia, naʻá ku ʻiloʻi kapau te u ngāue, ʻe tokoniʻi au ʻe he ʻEikí.

‘I heʻeku ngāue fakafaifekaú, naʻá ku fiefia ʻi heʻeku vakai ki he tali ʻe he kakaí e ongoongolelei ʻo Sīsū Kalaisí mo nau tupulaki ki he fakamoʻuí. ‘I heʻeku foki ki ʻapí, ne toe kamata ʻeku akó. Ka naʻe ʻikai fuoloa, kuo talamai ʻe heʻeku tangataʻeikí ʻo hangē ko ʻene fakatokangá, “He ʻikai ke u toe lava ʻo totongi.”

ʻOku malava fēfē ʻeni? Ko ʻeku fakakaukaú ia. Naʻá ku ngāue fakafaifekau. Naʻá ku fai e meʻa naʻe finangalo e ʻEikí ke u faí. Ko e hā ʻoku hoko mai ai ʻeni kiate aú?

Ako pea Ngāue

Naʻá ku manatuʻi leva ʻeku laukonga ʻi he Tohi ʻa Molomoná. Naʻe fekauʻi ʻa Nīfai, ʻa ia naʻá ne tauhi kotoa e ngaahi fekaú, ke ne foʻu ha vaka, ko ha meʻa naʻe teʻeki ke ne fakahoko kimuʻa (vakai, 1 Nīfai 17:8, 49–51). Ne u ongoʻi hangē naʻe ʻi ai ha “vaka” ke foʻú. Ko ha fuʻu palopalema lahi ia ne ʻikai ke u ʻilo e founga ke fakaleleiʻi ʻakí, ko ia ne u lotua ha tataki fakalaumālie.

Ne ʻikai fuoloa mei ai ne talanoa mai ʻa ʻAiveni. Naʻá ne pehē, “Sione Paula, ʻoku ou fanongo he ʻikai totongi ʻe heʻeta tamaí hoʻo akó.”

Naʻá ku tali ange, “Ko e moʻoni ia.” “ʻOku ou fakakaukau he ʻikai te u toe lava ʻo fai ha meʻa!”

Naʻe mahino-ngofua e tali ʻa ʻAivení, ka naʻá ne ueʻi ai au. Naʻá ne pehē, “ʻOkú ke ʻilo te ke lava ʻo ako mo ngāue fakatouʻosi? Te ke lava ai ʻo totongi hoʻo akó.” Ko e fuofua taimi ia ne u fakatokangaʻi ai te u lava ʻo fakahoko fakatouʻosi ia! Ne ʻikai fuoloa naʻá ku maʻu ha ngāue fakataimi naʻe malava ai ke hoko atu ʻeku akó.

Naʻá ku toe fakakaukau kia Nīfai mo e vaká: “Ko ʻeni ko au, Nīfai, naʻe ʻikai te u … foʻu ʻa e vaka ʻo hangē ko e founga ʻa e tangatá; ka naʻá ku ngaohi ia ʻo fakatatau ki he founga kuo fakahā kiate au ʻe he ʻEikí” (1 Nīfai 18:2).

Kapau ne u fai pē ki heʻeku laú, naʻá ku mei tukuange ʻeku akó. Ka naʻe ueʻi au ʻe he ʻEikí, ke u hoko atu ʻo fakafou ʻi he ngaahi lea hoku taʻoketé. Ko e taimi ʻe niʻihi ʻi heʻetau fehangahangai mo e faingataʻa ʻi heʻetau moʻuí, ʻoku tau fakakaukau ʻoku ʻikai tāpuekina kitautolu ʻe he ʻEikí. Ka ʻoku ou lava ʻo sio lelei ki he founga naʻá Ne tāpuekina ʻaki au ha faingamālie ke fakalakalaka mo tupulaki.

ʻOua ʻe Holomui!

ʻI heʻeku kei akó, naʻá ku mali foki. Pea, ʻi he ofi ke fakakakato hoku mataʻitohí, ne u fakatokangaʻi ai ne ʻikai ke u fuʻu saiʻia ʻi he meʻa ne u akó. Naʻá ku mei loto-foʻi. Ka naʻe talamai ʻe hoku uaifí, “He ʻikai te ke lava ʻo holomui. ʻOku ʻikai ke ke ʻiloʻi e meʻa kuo teuteu ʻe he ʻEikí maʻaú, ko ia ai kuo pau ke ke fakakakato ia.”

Naʻá ku toe fakakaukau kia Nīfai. Neongo hono ngaohikovia ia ʻe hono ongo taʻoketé, ka naʻe ʻikai ke ne holomui. Ka naʻe hanga ʻa Nīfai ki he ʻOtuá mo fakahīkihikiʻi Ia. Naʻá ne pehē, “Naʻe ʻikai te u lāunga ki he ʻEikí koeʻuhi ko hoku ngaahi faingataʻaʻiá.” Pea ne faifai pea fakatauʻatāinaʻi ia, pea “naʻe hoko ʻo pehē ko au, Nīfai, naʻá ku fakaʻuli ʻa e vaká, ke mau toe folau atu ki he fonua ʻo e talaʻofá.

“Pea naʻe hoko ʻo pehē ʻi he hili ʻemau folau ʻi he ngaahi ʻaho lahi, naʻa mau tau ki he fonua ʻo e talaʻofá” (1 Nīfai 18:16, 22–23).

ʻI heʻeku fakafanongo ki he faleʻi ʻa hoku uaifí, ne u fakakakato hoku mataʻitohí. Ka naʻe kamata ke u ngāue ʻi ha tafaʻaki kehe.

Hili ha ngaahi taʻu mei ai, ne u maʻu ha ongo mālohi ne fiemaʻu ke fakalakalaka ʻeku akó, pea ne u ongoʻi ʻoku totonu ke u hoko atu ʻo ako ke maʻu hoku M.A. ‘I heʻeku kamata fakafonu e kole huú, ko e taha ʻo e ngaahi fuofua meʻa ne fehuʻi maí pe naʻe ʻi ai haʻaku mataʻitohi B.A. ‘I he momeniti ko iá, ne u manatu vave ai ki he ngaahi lea ʻa hoku uaifí: “ʻOku ʻikai te ke iloʻi e meʻa kuo teuteu ʻe he ʻEikí maʻaú, ko ia ai kuo pau ke ke fakakakato ia.” Kapau naʻe ʻikai ke u fakakakato hoku mataʻitohi B.A., he ʻikai ke u lava ʻo maʻu hoku mataʻitohi M.A.

ʻOku Tataki Kitautolu ʻe he Kau Palōfita

Ko e taimi kotoa ʻoku ou lau ai e Tohi ʻa Molomoná, ʻoku ou fehuʻi loto, Ko e hā ʻoku loto ʻa e palōfita ko ʻeni mei he ngaahi taʻu ʻe lauafe kuohilí ke u ʻiloʻi pea fakaʻaongaʻi ʻi heʻeku moʻuí mo e moʻui hoku fāmilí? Hangē ko ʻení, naʻe akoʻi au ʻe Nīfai ʻoku fie maʻu ke tau mateuteu ʻi he taimi ʻoku ui ai kitautolu ʻe he ʻEikí, ke tau falala kiate Ia, pea tauhi faivelenga kiate Ia.

ʻOku ou ʻiloʻi taʻetoeveiveiua ʻi he taimi ʻoku ui ai koe ʻe he ʻEikí, te Ne teuteu ʻa e halá, ʻo hangē ko ia naʻá Ne fai maʻa Nīfaí (vakai, 1 Nīfai 3:7).