Naʻe Akoʻi Au ʻi Heʻeku Feʻiloaki mo e Palōfitá ke Taʻofi ʻEku Fakakaukau Tōtuʻa ki he Ongoongoleleí
ʻOku tau faʻa fakafihiʻi ʻa e ongoongoleleí, kae hili ko iá ʻoku faingofua moʻoni pē ia.
ʻOku nofo ʻa e tokotaha naʻá ne faʻú ʻi Niu Sauele, ʻAositelēlia.
ʻI heʻeku feinga ke fekumi ki he ʻOtuá ʻi heʻeku kei siʻí, ne matuʻaki faingataʻa ke tui ʻoku ʻi ai haʻatau kau palōfita ʻoku nau moʻui ʻi he māmaní he ʻahó ni. Ne u ongoʻi faingataʻaʻia mo puputuʻu. Ka ʻi he hili ha meimei taʻu ʻe ua mei ai, ʻi heʻeku hoko ko ha papi ului mateaki ki he Siasí, ne faingataʻa ange ke u tui ʻoku ou kau ʻi he kakai lalahi kei talavou ʻe toko 15 ʻi Senē, ʻAositelēlia ne fili ke fakataha mo Palesiteni Lāsolo M. Nalesoni ki ha fakataha fehuʻi-mo e-tali.
Ko ha aʻusia ia ʻokú ne ʻomi maʻu pē ha fofonga fiefia mo e loʻimata ʻo e fiefia ʻi he taimi kotoa pē ʻoku ou fakakaukau ki aí.
Ne mau vekeveke ke feʻiloaki mo ia pea toe tailiili lahi ange ke fanongoa ʻene lea kiate kimautolu ko e kakai lalahi kei talavoú. Naʻá ku fakakaukauloto ko e tali te ne foaki mai ki heʻemau ngaahi fehuʻí ʻe loloto mo fakamatala mahino, pea naʻá ku fifili pe kuó u mateuteu nai ke fanongo mo maʻu ha mahino ki heʻene ngaahi leá. Koeʻuhí ko ʻemau tailiilí, ne mau fakakaukau kotoa ke fai ha lotu ke tokoniʻi kimautolu ke mau fiemālie ange pea mo fakaafeʻi ʻa e Laumālié.
Ko e taimi ne hū mai ai ʻa Palesiteni Nalesoni ki he lokí ne hangē ia ha misí. Kuo akonekina maʻu pē kitautolu ʻoku maʻu ʻe he kau palōfitá ʻa e fakahā mei he ʻOtuá pea ʻokú ne vahevahe ia ki he māmaní, ʻo ne tokoni ai ki he tokotaha kotoa ke nau haʻu kia Kalaisi. ʻOku tau mātā kinautolu ʻi heʻenau lea ʻi he konifelenisi lahí. Ka ko ha aʻusia makehe ia ke mātātonu mo talanoa mata ki he mata mo ia.
Naʻá ne ʻi heni—ko ha palōfita loto-fakatōkilalo mo loto-ʻofa ʻa e ʻOtuá. Naʻe mālohi ʻaupito ʻa e Laumālie naʻá ne ʻomi ki he lokí. Ne mau tuʻu fakalongolongo kotoa, ne mau momou ke malimali pe lea, ka ʻi heʻene lue mai mo fofonga malimalí peá ne talamai ʻene fiefia ke feʻiloaki mo kimautolú, ne mau fonu ʻi he fiefia mo e nonga. Ne u ongoʻi ʻene loto-fakatōkilalo moʻoní mo ʻene ʻofa kiate kimautolu kotoá ʻi heʻene lulululu ki homau nimá mo fofonga malimalí.
Ne kamata ke mau fehuʻi kiate ia fekauʻaki mo e kakai lalahi kei talavou ʻi he Siasí, pea naʻe ʻi ai ha fehuʻi ʻe taha naʻe mahuʻinga taha kiate au. Ne mau fehuʻi ange, “ʻI heʻemau hoko ko e kakai lalahi kei talavoú, ʻoku mau faʻa faingataʻaʻia ke poupouʻi homau fāmilí mo e ngaahi kaungāmeʻá ke nau kau ki he ongoongoleleí. ʻE founga fēfē haʻamau vahevahe ʻa e ongoongoleleí mo kinautolu ke toe lelei angé?” Naʻe fakakaukau ʻa Palesiteni Nalesoni ʻi ha kiʻi momeniti siʻi peá ne lea mai ʻaki ha foʻi lea ʻe ua: ”Hā matamatalelei.” Pea naʻá ne hoko atu ʻo pehē: “Hoko ko ha faʻifaʻitakiʻanga pea tui faivelenga.”
Ko ia pē—ko ha pōpoaki faingofua ka naʻe fakatupu fakakaukau mo moʻoni. Naʻe tohitongi ʻene ngaahi lea mahinongofuá ʻi homau ʻatamaí mo e lotó. Naʻá ku fakatokangaʻi ʻi he momeniti ko iá ʻi heʻetau hoko ko e kakai lalahi kei talavoú, ʻoku tau faʻa hehema ke fakafihiʻi mo fakakaukau ʻo fuʻu tōtuʻa ki he ongoongoleleí, ka ko hono moʻoní ko e ngaahi fakahinohino mei he Laumālié mo ʻetau kau palōfitá ʻoku faingofua, fakapatonu, pea ʻoku lahi ai ha ngaahi talaʻofa ki ha ngaahi tāpuaki.
Naʻá ku fakatokangaʻi ʻi he momeniti ko iá ʻa e founga kuo hoko ai ʻa Palesiteni Nalesoni ʻo loto-fakatōkilalo mo fakalaumālié: mei heʻene moʻui ʻaki maʻu pē ʻa e ongoongolelei ʻo Sīsū Kalaisí. Pea ʻoku fie maʻu pē ke tau fai ʻa e meʻa tatau. Fai ʻa e fanga kiʻi meʻa iiki ko ia ʻokú ne tohoakiʻi kitautolu he ʻaho kotoa pē ke tau ofi ange ki he Tamai Hēvaní mo Sisū Kalaisí: ʻalu ki he lotú mo e temipalé, lau ʻa e folofolá, lotu ʻaki e loto-moʻoní, pea hiliō aí ʻa e angaʻofa mo e ʻofa ki he tokotaha kotoa pē ʻoku tau fetaulaki mo iá. Ko e fanga kiʻi tōʻonga fakaʻaho ko iá ko e kī ia ki hono maʻu ʻo e taukei ke hoko ko e ākonga moʻoni ʻo Kalaisí, ki hono fakamālohia hotau vā mo Iá, pea mo hono vahevahe ʻEne moʻoní mo e niʻihi kehé.
ʻOku totonu ke tau fāifeinga ke tau aʻusia hotau tuʻunga lelei tahá, pea ʻe fakaiku ʻa e fanga kiʻi meʻa iiki ko iá ki he ngaahi ola lalahi. ʻIo, ʻoku fihituʻu ʻa e māmaní, ʻio, ʻoku faingofua ke tau fakakaukau ʻo fuʻu tōtuʻa ki he ngaahi meʻa lahi ʻi he moʻuí, ka ko e palani ʻa e ʻOtuá ʻoku faingofua pē ia, pea ko e taimi te tau muimui ai ki aí, ʻe toe faingofua ange ai ʻa e moʻuí. ʻI heʻetau moʻui ʻaki ʻa e fakahinohino ʻa e palōfitá mo fai hotau lelei tahá ke hoko ʻo hangē ko hotau Fakamoʻui ko Sīsū Kalaisí he ʻaho kotoá, ʻe hanga heʻetau ngaahi sīpinga ʻo e tuí ʻo liliu e moʻui ʻa e niʻihi ʻoku tau feohí.