Sa Digital Lamang: Mga Young Adult

Paghimo og Sagrado nga Buhat panahon sa Quarantine

Ni Kaith Ashley Moran

Samtang sirado ang mga templo, makapadayon kita sa pagtabang sa mga sagrado nga buhat gikan sa panimalay.

Ang tagsulat nagpuyo sa Manila, Pilipinas.

Wala ko magdahum nga makadungog og mga pulong sama sa gisulti sa Unang Kapangulohan nga gipakigbahin sa miaging bulan: “Human sa mainampingon ug mainampuong konsiderasyon, ug uban sa tinguha nga mahimong responsabling mga lumulupyo sa tibuok kalibutan, kami nakahukom nga ihunong ang tanang mga kalihokan sa templo.”¹

Tingali sama nako, naglibug kamo kon unsaon sa pag-atubang ang lisud nga mga panahon karon kon wala kining balaang mga dapit sa kalinaw. Dinhi sa Pilipinas, ang templo sirado na bisan sa wala pa giimplementar ang pag-quarantine sa komunidad, mao nga nangandoy ko nga makabalik sa balay sa Ginoo sa dili madugay.

Apan nakaamgo ko og butang nga importante samtang anaa ubos sa quarantine. Bisan og ang mga templo sirado, ang buhat sa pag-andam sa mga ordinansa dili sirado. Ang atong mga katigulangan anaa gihapon sa pikas bahin sa tabil, naghulat nga kita masayud pa og daghan mahitungod kanila. Kon nagpangita kamo og mga paagi alang sa pagdapit og sagradong mga pagbati sa pagserbisyo sa templo diha sa inyong balay, aniay pipila ka mga ideya:

• Suhira ang inyong family tree sa FamilySearch.org.

• Sulayi ang pag-indexing. Siguradong mas magantihon kini kay sa mga video games!

• Gamita ang teknolohiya sa pagpakigsulti sa buhing mga kaliwat.

• Isulat ang kaugalingon ninyo nga sugilanon sa pamilya.

Akong nakita sa unsang paagi kini nga mga kalihokan “pabalikon ang [mga] kasingkasing” sa mga sakop sa akong pamilya, sigun sa gihulagway diha sa Malaquias 4:6, ug mihaw-as kanato gikan sa kasagmuyo, kapuol, ug kawalay paglaum. Ug bisan ang pagka-quarantine dili makapahimuot, mapasalamaton ko sa oportunidad nga nahatag niini kanako aron makatabang niini nga homework sa templo.

Mahimo kining usa ka sagrado nga panahon sa atong kinabuhi. Tingali kining sakit nga mikatap sa tibuok kalibutan [pandemic] makapahinumdom nato unsa ka importante ang mga templo. Tingali mas mahatagan nato og kahulugan ang kahigayunan nga makabisita sa templo labaw pa kay sa atong nahimo kaniadto. Sigun sa gipahibalo sa Unang Kapangulohan, “Usa kini ka temporaryo nga kausaban, ug magpaabut kita sa adlaw nga ang mga templo ablihan pag-usab.”²

Mahinamon ako sa adlaw diin kita makapahigayon na usab sa makaluwas nga mga ordinansa sa atong mga katigulangan! Hangtud nianang mga adlawa, adunay daghan pa kaayong buluhaton nga atong mahimo.

Mga Panalangin sa Pagpang-ayo

Si Elder Dale G. Renlund sa Korum sa Napulog Duha ka mga Apostoles miingon nga “samtang kita moapil sa family history ug buhat sa templo karon, kita…makapangangkon sa mga panalangin sa ‘pagpang-ayo’ nga gisaad sa mga propeta ug mga apostoles… Kining taas nga lista naglakip niining mga panalangin:

• Dugang nga panabut bahin sa Manluluwas ug sa Iyang maulaon nga sakripisyo;

• Dugang nga impluwensya sa Espiritu Santo aron mobati sa kalig-on ug direksyon sa kaugalingon natong kinabuhi;

• Dugang nga pagtuo, aron ang pagkakabig ngadto sa Manluluwas magkalawom ug magpadayon;

• Dugang nga abilidad ug kadasig sa pagkat-on ug paghinulsol tungod sa panabut kon si kinsa kita, diin kita gikan, ug mas tin-aw nga panan-awon kon asa kita padulong;

• Dugang nga makahapsay, makabalaan, ug makapakalma nga impluwensya sa atong kasingkasing;

• Dugang nga kalipay pinaagi sa paglambo sa abilidad nga mobati sa gugma sa Ginoo;

• Dugang nga mga panalangin sa pamilya, bisan unsa pay atong kasamtangan, nangagi, o umaabut nga sitwasyon o bisan unsa kadili hingpit sa atong family tree;

• Dugang nga gugma ug pasalamat para sa mga katigulangan ug buhing mga paryente, aron dili na kita mobati nga nag-inusara;

• Dugang nga gahum sa pag-ila sa butang nga nagkinahanglan og pagkaayo ug, uban sa tabang sa Ginoo, makaserbisyo sa uban;

• Dugang nga proteksyon batok sa mga tintasyon ug sa nagkagrabing impluwensya sa kaaway; ug

• Dugang nga tabang sa pag-ayo sa nahasol, naguba, o nabalakang mga kasingkasing ug pag-ayo sa samaran” (“Buhat sa Family History ug sa Templo: Pagsilyo ug Pagkaayo,” Liahona, Mayo 2018, 47).

Pagdiskobre pa og Dugang

Alang sa mga kalihokan sa family history nga pweding himoon sa inyong pamilya bisan anaa sa pagka-quarantine, bisitaha ang FamilySearch.org/discovery.

Susiha ang YA Matag Semana, nga makit-an diha sa seksyon sa mga Young Adult sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kang mosumiter sa imong kaugalingon nga mga istorya, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kaninyo!

Mubo nga mga sulat

1. “Ang Unang Kapangulohan Temporaryong Mipasirado sa Tanang mga Templo,” Mar. 25, 2020, newsroom.ChurchofJesusChrist.org.

2. “First Presidency Temporarily Closes All Temples,” [Ang Unang Kapangulohan Temporaryong Mipasirado sa Tanang mga Templo] newsroom. ChurchofJesusChrist.org.