Na o Polokalama Faaeletonika
Sa Ia Manaomia se Faamanuiaga Faaleperisitua. Pe Mafai Ona Ou Faia?
Sa matuai ou fefe lava i taimi uma e tuuina atu faamanuiaga faaleperisitua. Afai e oo mai lena taimi, mata o le a ou saunia?
I se tasi aso, sa ma tietie atu ai ma lou tina i le fale ae sau loa se alii i se uila vilivae i lalo o se mauga laitiiti. Sa faafuasei ona mimilo e le tagata tietie uila [le uila] ina ia aloese ai mai le feto’ai ma se loli o loo sau. I se va o sekone sa lagona e pei o le faavavau, o le malosi o le mimilo sa mafua ai ona le mafai e le alii ona faatautaia lana uila, lele i luga o le ave o le uila, ma tau ai lona ulu i le auala. Sa vave ona ma faatafa i tua. Ma le popole, sa ou alu i fafo mai la’u taavale ma faananati atu i ona autafa. Sa mamafa lana manava, ae sa lei malamalama o ia.
Sa vave ona ou iloaina o lenei tagata na manaomia se faamanuiaga faaleperisitua, ae sa le mafai ona aveesea mai lo‘u mafaufau le manatu faapea: e mafai ona ou faia?
I lena taimi, sa ou toe manatua ai le faalogo atu i upu a Elder Jefferey R. Holland a o avea au ma se talavou e umia le Perisitua Arona: “Alii talavou, o le a e aoao, pe afai tou te lei mauaina, i le taufaamata’u, e oo lava i taimi faigata, o lo outou faatuatua ma lo outou perisitua o le a manaomia le mea e sili e te mafaia mai ia te oe ma le mea sili e mafai ona e valaau atu ai mai le lagi. . . .
“. . . Atonu o le a oo mai le aso — ioe, ou te mautinoa o le a oo mai — i se tulaga e lei faamoemoeina po o se taimi o se manaoga taua, o le a faapea ona taia e uila, ma o le a i ai le lumanai i o outou lima. Ia saunia pe a oo mai lena aso “(“Faapaia I Tatou Lava,” Ensign, Nov. 2000, 39, 40; Liahona, Ian. 2001, 47, 49).
Faatoilaloina o Lo’u Fefe
A o talavou, sa matuai gotouga ifo i lo‘u loto nei upu ma fesoasoani ai e saunia a‘u ia avea ma se alii agavaa e umia le Perisitua Mekisateko. Ae mo le tele o tausaga talu ona mauaina le perisitua, sa le mafai ona ou tuuina atu a‘u lava e tuuina atu faamanuiaga faaleperisitua i isi, ma o le mafuaaga tele lava o le fefe.
Sa ou fefe ou te le agavaa pe atonu o le a le sa‘o upu ou te fai atua. O lenei fefe na taofia ai a‘u mai le faaaogaina o le pule o le perisitua, lea na faatuatuaina ai a‘u, ina ia valaau atu i mana o le lagi e faamanuia ai isi. Ae na loloto lo’u iloa e faapea afai e manaomia lo‘u faalauteleina o le perisitua, e manaomia ona suia o‘u lagona. Sa manaomia ona ou faatoilaloina ou popolega ma le lē mautonu e uiga i le faaaogaina o le mana o le Atua e faamanuia ai isi.
E ala i le faatinoina o le faatuatua i le Alii ma le galue i fautuaga musuia a Ana auauna, sa ogatasi ai lo‘u olaga ma mea e sili ona vavalalata ma Ana aoaoga. Sa ou faaaluina le taimi e sasaa atu ai lo‘u agaga i le tatalo i aso uma, ma sa ou tatalo ina ia faamalosia faaleagaga a o o‘u suesue i tusitusiga paia. Sa ou faasoa atu ni fuaiupu o mau i soo se tasi na oo mai i lo‘u mafaufau a o o’u faitauina. Sa ou faalogologo i lauga o konafesi aoao. Sa ou faasoa atu la‘u molimau o le talalelei i isi. Ma sa ou anapogi i le taimi na ou manaomia ai se malosi faaopoopo.
A o o‘u mulimuli i nei faatonuga faavae ma se naunautaiga e faaogatasi lo‘u loto ma le Atua, sa faateleina lo‘u lagonaina o le Agaga Paia, sa faateleina lo‘u gafatia faaleagaga, ma sa faamalosia ai lo‘u sootaga ma mana o le lagi. Mulimuli ane, sa ou maua le lototele e tuuina atu ai se faamanuiaga o le faamafanafanaga ma le taitaiga.
Ou te manatua le lagona o le fefe i le taimi muamua ma le popole mo sa’u tala e fai atu. Peitai ina ua oo mai le Agaga ia te a‘u, sa leai so’u fefe, ma sa suia lo‘u popole i upu tonu lava e tatau ona ou fai atua! Sa lagonaina le sa’o, e pei sa i ai se vaega o a‘u na misi i le taimi atoa!
Talu mai lena taimi ua valaauina a‘u e tuuina atu ni faamanuiaga se tele atu nai lo le mea e mafai ona ou faitauina, ma ou te fiafia lava i ai! O taimi uma lava ou te tuuina atu ai faamanuiaga a le Alii i Ana fanau, ua matua faamanuiaina lava a‘u. O se faamanuiaga faaleperisitua e faamanuiaina ai tagata uma ua aafia ai.
Valaau Atu I le Mana o le Alii Pe A Ua Taua Tele
E pei lava ona sa valoia e Elder Holland, sa emo vili lena aso i luga o le auala e ala i le lavea faafuasei o se tagata tietie uila. Ana ou le galue ma le Alii i le aluga o tausaga na muamua atu e faatoilalo lo‘u fefe e tuuina atu faamanuiaga i tulaga o le saogalemu, semanu o le a le aogā uma i ma’ua i lenei tulaga e ono lamatia ai le ola. Ae o le faatasi mai o le Atua e taialaina ma faamalosia a‘u, sa ou tootuli ai i ona autafa ma musumusu lemu atu upu na ou lagonaina e tatau ona fai atu a o o‘u faamanuiaina o ia.
Ina ua uma na ou faia le faamanuiaga, sa ou tepa ae i luga ma o loo tu le taitai lagolago o leoleo i o‘u tafatafa. Sa tu i o matou tua i le taimi atoa ma sa valaau atu mo se taavale a le falemai. Ae na vave lava ona toe malamalama le tagata sa manu’a, ma ia finau mai ua manuia o ia, ma tietie ese atu i lana uila vilivae, ma pasia le taavale o le falemai i le auala. E ui ou te malamalama e le o faamanuiaga uma faaleperisitua e maua mai ai na taunuuga vave, o se aafiaga lea o le a le galo lava ia te a‘u. Ou te matua faafetai lava ina ua oo mai lena taimi, sa ou saunia.