Autalavou Matutua

O le Aoao Ia Fiafia A O Ou Nofofua

Saunia e Landon Hawes

Sa ou iloaina sa ou alu i tafaoga faamasani i le auala sese.

“Aisea e tafafao faamasani ai tagata uma ma fiafia?”

“Aisea ou te le i faaipoipo ai?”

“O le a le mea o faaletonu ia te au?”

Atonu ua fesiligia e le toatele o talavou matutua nofofua i latou lava i nei fesili ia le itiiti ifo ma le faatasi! O le luitau o le sailia o se soa faavavau e mafai ona avea ma toilalo i le faatuatua ma faamoemoe o e oo lava i le Au Paia o Aso e Gata Ai sili ona tuuto. Ioe foi, i lo’u tulaga, o tafaoga faamasani sa faapitoa lava le faigata.

O le faaipoipoga e foliga mai lava i taimi uma o se faigamalaga maoae ia te a’u, ma sa ou tulimatai atu i ai mai lava i lo’u laitiiti. Ae sa ou lotovaivai ina ua foliga mai ua ou toilalo i tafaoga faamasani i le taimi o o’u tausaga o le kolisi. E ui ina sa ou alu i le tele o tafaoga faamasani, i ai i ni mafutaga faamo’imo’i, ma feiloai i ni tamaitai atamamai ma tulaga ese, ae ou te lei faaipoipo. Ia te au la, o na mafutaga le faamanuiaina na pei o se faailo sa ou faatauvaa ma auleaga.

O o’u lagona i lo’u nofofua sa na ona faateteleina le leaga ina ua mavae nisi foi mafutaga faamutaina i le taimi na amata ai la’u matata. Sa faigofie ia te au ona ou fesili po o lea se mea na faaletonu ia te a’u ae ua sa’o i isi tagata uma ua faaipoipoina. O lo’u faamanuiaga faapeteriaka, faatasi ai ma nisi o faamanuiaga o le perisitua, na matuai faailoa mai ai ma le malosi ma le maoti o le a faamauina a’u i le olaga nei i se tamaitai amiotonu. Ae aisea la na le tupu ai?

Sa amata ona ou tuufesili, “Po ua ou faia ea se mea e faalavelave ai i le fuafuaga a le Atua mo a’u?”

Mulimuli ane, ina ua mavae le “fagatuaga” i luma o le Atua mo le tele o tausaga e ala i le tatalo, suesueina o tusitusiga paia, ma le auai atu i le malumalu, sa ou maua ai se faaaliga e faatatau i lo’u tulaga e ala i la’u uo ma le faufautua, o Brad (ua suia le igoa). I se tasi o a ma fonotaga faufautua, sa ia faapea mai ai: “O lou fiafia e faalagolago lea ia te oe lava ia—ae le o se isi tagata. A e fiafia pe a o e nofofua, e mafai ona e fiafia i soo se tulaga lava.” Sa faapena foi ona aoao mai Peresitene Russell M. Nelson, “O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga” (“Olioli ma le Ola ai Faaleagaga,” Liahona, Nov. 2016, 82).

Na suia la’u vaaiga atoa a o tamau e le Agaga nei upu i lo’u agaga. Ma sa ou iloa ai sa ou tafao faamasani i taimi uma lava ina ia faataunuu ai se manaoga—i lo’u tulaga, o le manaomia ona faaipoipo tau lava ina ia le tuua ai na o a’u.

Sa mautinoa lava e le o se manatu lea e taunuu atu ai i se soa alofa e faavavau! Na auala mai ia Brad, na aoao lemu mai a’u e le Alii e faapea, o Lana fuafuaga mo ona atalii ma afafine e le mo i latou ia faaipoipo e faavae i o latou manaoga po o uunaiga faaleaganuu po o le fefe. O le faaipoipoga e faavae lea i le alofa faaKeriso. Ona Ia aoao mai lea o au e faapea, o le tulaga o lo’u le toe faaipoipo e mafai ona faaauau pea ona aoao ai a’u e ola i le olaga ma saili le faaipoipoga e faavae i le alofa mamā ae le mo le faafaigofie ai o le olaga. . Ia saili atu i le faaipoipoga mo mafuaaga tonu.

E ala mai i lenei aafiaga, ua ou aoaoina ai ni upumoni se tolu ou te vaai i ai i soo se taimi lava ou te lagonaina ai le lotovaivai e uiga i tafaoga faamasani:

O lou taua e le faalagolago lea i lou tulaga faalefaaipoipoga. Na aoao mai Isaia “o manatu [o le Atua] e le o [o tatou] manatu ia” (Isaia 55:8). Sa ou manatu o le nofofua o se ata lea o le leai o so’u aogā. Ae peitai, na fesoasoani mai le Atua ia ou iloa o le nofofua o loo saunia ai a’u mo se faaipoipoga sili atu nai lo le mea na semanu ou te maua pe ana ou faaipoipo i la’u lava taimi faatulagaina. Sa le i i ai lava ma se mea e faatatau i lo’u taua.
O le sauniuni e aveesea ai le atuatuvale ma le popole. Ua fetalai mai le Alii ia i tatou “afai ua [tatou] saunia [tatou] te le matatau” (Mataupu Faavae ma Feagaiga 38:30). O le sailia ona mulimuli ai lea i le finagalo o le Atua ua fesoasoani ou te lafoai ai o’u atugaluga ma le le fiafia i lo’u tulaga faalefaaipoipoga. Ua fesoasoani foi ia te a’u e taulai atu ai i lo’u saunia o a’u lava mo soo se mea e oo mai i le lumanai.
E i ai le olioli i le nofofua. O le nofofua ua faamanuiaina ai a’u i avanoa fiafia e faimalaga ai, atinae ai faalegaluega, ma auala e auauna atu ai i le Ekalesia. A o ou moomoo loloto pea lava ma le naunautai i le faaipoipoga ma se fanau, ua fesoasoani mai le Atua ia te a’u ia ou talisapaia le tele o galuega e faia i Lona malo i le taimi lenei, pe o i ai sa’u soa i o’u autafa pe leai.

Ou te lei faaipoipo lava! E le i faamaneta la ona oo mai so’u toalua ona o lea ua i ai se suiga atoa o o’u manatu e faatatau i tafaoga faamasani ma le faaipoipoga, ma ou te iloa o le a ou le fiafia lava i nisi taimi i tafaoga faamasani i le lumanai. Ae o le tele o le fefe ma le popole e uiga i lo’u tulaga faalefaaipoipoga ua alu ese atu. Ma ua ou iloa nei e matua lelei lava le nofofua ao ma galulue faatasi ma le Alii e faataunuu ia folafolaga ma faamanuiaga e faavavau na Ia faia ia te au—i le olaga faaletino ma le faavavau.