Ua Na’o Tusiga Faatekinolosi: Talavou Matutua

Puleaina O Ou Tuinanau: Auala e Faaogatasi ai Mafaufauga ma Lagona Taufeusuai i Faamoemoega a le Alii

Saunia e le aufaigaluega a le Liahona ma Tautua mo Aiga

O le aveesea o lagona feusuai talafeagai e le o le finagalo lea o le Tama Faalelagi mo i tatou. E finagalo o Ia ia tatou aoao e pulea i latou, ina ia latou aumaia le olioli nai lo le faanoanoa.

Atonu e te le manatua se mea se tele e uiga i le aoao e savali. I le amataga, atonu ua faatele ona e pa’ū i lalo. Ae ina ua e pa’ū, e lei otegiaina oe. E foliga mai, o se tasi e alofa ia te oe sa pikiina oe i luga ma toe faamalosiau atu ia te oe e faaauau pea ona taumafai! I le aluga o taimi, o le tuu ai o le vae e tasi i luma o le isi ua avea ma se mea masani. O lea la ua mafai ona e aloese mai le tele o tulaga o le a e pa’ū ai.

Maimau pe ana mafai ona tatou tausia i tatou lava ma le onosai pe a tatou aoao i auala e taulima ai isi vaega o o tatou tino faaletino, e aofia ai le auala e taulima ai lagona feusuai.

E mafai faapefea ona tatou “Pulea o Tatou Tuinanau”?

O le toatele o i tatou na i ai ni aafiaga i lagona feusuai e avea o se vaega o lo tatou aafiaga i le olaga nei. E ui o nei lagona ua tuuina mai e le Atua o se vaega taua o lana fuafuaga mo lo tatou fiafia, ua tatou lagonaina i le tele o taimi le le manao e faatino i ai i se auala e le ogatusa ma Ana poloaiga.

E ala atu i o tatou tausaga talavou ma le avea ma se tagata matua talavou, ua toatele ai i tatou ua aafia i luitau e oo mai i le aoaoina pe faapefea ona faaleleia lagona feusuai lea e oo mai ma se tino faitino faatasi ai ma faamoemoega a le Alii i le auala tatou te faaaogaina ai lenei meaalofa.

O nisi o i tatou e faaalu le tele o lo tatou malosi faaleagaga e taumafai ai e aveesea lagona feusuai talafeagai. Ae o le aveesea ai, e le o le mea lea o loo finagalo ai lo tatou Tama Faalelagi mo i tatou! Ae, e finagalo o Ia e fesoasoani ia i tatou ia iloa ma puleaina o tatou manatu feusuai ma amioga. O le atiina ae o lenei tomai o le a aoga ia i tatou i le taimi a o le’i faia ma le maea ai o le faaipoipoga.

Sa aoao mai Alema, “Ia pulea … o ou tuinanau, ina ia faatumuina oe i le alofa” (Alema 38:12). E lei faapea mai lava Alema e aveesea ou tuinanau—ona e le faapea e leaga tuinanau. Nai lo lena, na ia uunaia i tatou e taofiofi pe pulea i latou ina ia mafai ona faatumulia i tatou i le alofa.¹

E mafai faapefea ona tatou puleaina o tatou tuinanau? O nisi nei o mea e mafai ona fesoasoani ia te oe a o e aoao e “savali” i lenei faigamalaga taua.

Malamalama i Aafiaga

Muamua, e aoga le malamalama i nisi o mea o loo uunaia ai lou tomai e pulea manaoga feusuai. O le malamalama i nei tulaga e mafai ona fesoasoani e te faafoeina ai ou lagona feusuai:

Paiolo: E maua e tino taitasi tulaga eseese o nai vailaau (chemicals) e aafia ai le manao i feusuaiga. O se taunuuga, atonu o le a eseese ai le faigata o tagata taitoatasi.
Mausa: Afai sa e i ai i le mausa o le galue i mafaufauga feusuai ma manaoga, atonu e sili atu ona faigata ona sui. O le suia o nei mausa i ni mea lelei o se taumafaiga e umi se taimi. E tatau ona e tautino e toe oso i luga—ma faamagalo ia te oe lava—a o e faagasolo ai i lenei faagasologa. I nisi o tulaga, e mafai e se taitai o le Ekalesia po o le tagata faigaluega o le mafaufau ona fesoasoani ia te oe e agai ai i luma mai mausa le lelei.
Lagona faigata: O nisi tagata e faia mafaufauga faalefeusuaiga ma amioga e taulima ai lagona e pei o le atuatuvale, tuuatoatasi, po o le faanoanoaga. Aoao e iloa na lagona. Mafaufau e faamalositino, faamaumauina i se api o talaaga, togafitiga faalemafaufau, po o se isi auala lelei e taulima ai nei lagona.
Manatu maualalo o le tagata ia te ia lava ia: O lagona o le mativa-faaletagata e masani ona faavaivaia ai lau tautinoga. Mafaufau e auai i auaunaga ma isi taumafaiga ia e fesoasoani e te maua ai ni lagona lelei e uiga ia te oe lava.
Sootaga faalemafaufau: O se mafutaga a se vaaiga faalemafaufau o le a le suia ai lava lou manaomia o se sootaga moni. Nai lo lena, galue i au tomai tau fesootaiga ma atiina ae ni faauoga lelei. Saili avanoa lelei faaagafesootai ma mea e fiafia i ai. O le fesootai ma isi o se ki lea i le manuia.

Aoao mai le faataitaiga a le Faaola

Ina ua mavae aso e 40 na ia anapogi ai, na faaosoosoina Iesu e Satani e faaliliu maa i le areto. Na fetalai o Ia: “Ua tusia, e le na o mea e ai e ola ai le Tagata, a o afioga uma e tulei mai i le fofoga o le Atua” (Mataio 4:4).

E lei finau le Faaola ma le faaosoosoga a Satani e ala i Lana fai mai e lei fia ai pe e lei fiafia o Ia i meaai Nai lo lena, na Ia taulimaina lenei faaosoosoga e ala i le tauina atu o se mafuaaga maualuga, faamamaluina mo le le manao e ai: manao e ola i afioga uma a le Atua. Sa Ia vaaia o Lana misiona na mamao lava mai manaoga faaletino.

Afai e te taumafai e faatalitonu lou mafaufau faapea e le o i ai ni ou lagona feusuai, o le a faamanatu atu e lou tino ia te oe e i ai, lea e mafai ona taitaiina atu ai oe i le lagonaina o le lofituina, atuatuvale, ma le lelava ai.

Ae afai e te taulimaina ou manaoga feusuai a o latalata atu le Faaola i le manao mo se meaai, e mafai ona e maua le faamanuiaina sili atu i le teenaina o ou lagona. Sa i ai i le Faaola se mafuaaga sili atu ona mamana e aloese mai ai nai lo le gauai atu i faaosoosoga, ma e faapena foi oe! Ua tuuina mai ia i tatou le tele o faamanuiaga i lenei olaga ma i le faavavau pe a tatou tausia poloaiga ma “o le ola ai i le tulafono o le legavia e valaaulia ai nisi o faamanuiaga silisili e mafai e alii ma tamaitai ona maua i le olaga faitino: talitonuga talafeagai faaleagaga i le afioaga o le aiga, uo, paaga i le lotu, ma i le iuga, o le Faaola.”²

Iloa e Mafai Ona e Manumalo

O poloaiga a le Alii o le a faamanuiaina ai lou olaga pe a e mulimuli i ai. O le poloaiga e pulea ou tuinanau e le o se mea e tuusaunoa: o a outou taumafaiga e usiusitai o le a aumaia ai le olioli tumau-faavavau. O le pulea o ou lagona feusuai atonu o se malaga i le olaga atoa o le aoaoina, ae o le Tama Faalelagi o le a i ai iina e fesoasoani ia te oe ia manuia! Afai e te faia ni mea sese, salamo ma toe taumafai. Aua le fiu. O se vaega lena o le faagasologa o le faamamaina i le olaga nei.

O le Tama Faalelagi o se Tama alofa o le e popole ma ua saunia e fesoasoani ia i tatou, ae maise lava i lenei vaega paia o le olaga nei. Aua lava nei galo o loo ia aoaoina lagona o feusuaiga talafeagai i totonu ia te oe, ma e mafai ona Ia fesoasoani ia te oe e aoao pe mafai faapefea ona avea ma malosiaga mo le lelei i lou olaga e tusa lava po o a ou tulaga o i ai nei e ala i le fesoasoani atu e fesootai ma isi i auala lelei, ma tuuina atu ia te oe se lagona o le naunautaiga ma le maufetuunai, e taialaina ai oe i le manatu ia te oe lava ia, alofa ia te oe lava, ma le taliaina, ma aumaia ai oe e latalata atili atu ai i le Faaola i aso taitasi.

Ia manatua, e finagalo le Atua i lou fiafia. O Satani lea e manao ia e malaia, ma e faaaogaina le lotovaivai ma le taufaasese e vavaeese ai oe mai le Atua. O le gauai atu i faaosoosoga o feusuaiga i fafo atu o le faaipoipoga, o le a taitai ese atu ai oe mai faamanuiaga o le fiafia e faavavau ma agai atu ai i le faanoanoa. Ae o au taumafaiga ina ia malamalama, taitaia, ma pulea lou tulaga feusuai, e tusa lava pe o se taumafaiga i le olaga atoa, e mafai ona taitai atu ai oe i le fiafia, lotomaualalo, ma le alofa mama agai i tagata uma, e aofia ai oe lava.

E Faapefea ona Faamalosia Oe Lava i le Faaleagaga, Faalemafaufau, ma le Faaleamio

Faaleagaga:

Fausia lou sootaga ma le Tama Faalelagi ma le Faaola. E mafai ona latou taialaina oe ma tuuina atu ia te oe le poto, lototele, ma le mana e faamanuiaina ai.
“Ia faatumu o outou olaga i punavai lelei o le mana. E le lava le na o le taumafai e teena mea leaga pe faagaogao lou olaga mai le agasala. E tatau foi ona tatou faatumuina o tatou olaga i le amiotonu. E tatau ona tatou auai i gaoioiga e aumaia ai le mana faaleagaga” (Aoaoga Peresitene o le Ekalesia: Ezra Taft Benson [2014], 224).
Suesue i le ata o le faaolataga ma le tulafono o le ola mama. Aoao e uiga i faamanuiaga ua folafola mai ia i tatou i le faaaogaina ma le amiotonu o lenei mana.
Ia faatofu oe lava i tusitusiga paia i aso uma, tatalo mo le malosi ma le taitaiga, anapogi, faalautele lou valaauga, auauna atu, alu i le malumalu, suesue lou faamanuiaga faapeteriaka, ma talosaga atu mo faamanuiaga faaleperisitua. O nei faatinoga laiti faaleagaga e mafai ona avea ma punavai o se malosiaga taua (tagai Alema 37:6). Sa folafola mai e Peresitene Russell M. Nelson e faapea “a o e suesue ma le agaga tatalo i le Tusi a Mamona i aso uma, o le a e faia ni faaiuga sili atu — iaso uma” (“O Le Tusi a Mamona: Faamata e Faape’i Lou Olaga e aunoa ma Ia?” Liahona, Nov. 2017,62).
Afai e te faia se faaiuga e le o ogatusa ma poloaiga, ia e iloa e lei leiloloa uma le alualu i luma na e faia. Pe a e saili ma le faamaoni i le salamo, o le a mafai ona e toe taumafai i taimi uma (tagai Mosaea 26:29–30). Ia aua nei faatagaina ou tauiviga e te lagona ai le tuuesea mai le Atua. E alofa o Ia ia te oe. E te le tau ausia se fuataga o le agavaa e tatalo ai ma maua le alofa mai ia te ia.

Faalemafaufau:

A oo mai ni manatu feusuai i lou mafaufau, vave ona faalavelave ia i latou. Aoao pe faapefea ona taitai ou manatu e ala i le faaaogaina o le faataitaiga lenei: fetaiai, luitau, ma suiga. A oo mai se manatu le talafeagai, e te faafetaiaia e ala i le faailoaina. E te luiina e ala i lou mafaufau po o fea o le a taitai atu ai oe pe a faaauau ona e mafaufau i ai. Ona sui lea o lou mafaufau i se mea lelei.
Aua nei lofituina oe i mea o loo e taumafai e suia. Taulai atu i mea e mafai ona e faia i le aso (tagai i le 2 Nifae 28:30; Mosaea 4:27).
Ia faamoemoe i ai. Vaai faalemafaufau pe o le a faapei ou lagona ma pe faapefea foi ona i ai lou olaga pe a e malosi atili lou puleaina.
Ia maua se malamalama sili atu e uiga i au punavai faalelagona o faaosoosoga. Pe o e vaivai pe a e lagonaina le teenaina, tuuatoatasi, faanoanoa, popole, le fiafia, atuatuvale, vaivai, po o le fiaai? E mafai faapefea ona sili atu lou taulimaina o nei lagona?
Aua e te talitonu o se tasi o tulaga o le toilalo e tatau ona e tuua le taumafai. O le a sili atu ona faamanuiaina oe i le fesili atu, “O le a se mea e mafai ona ese lou faia e faaleleia atili ai i le isi taimi?” Sui au sini ma agai atu i ni vaega laiti atu e tau le taufaafefe nai lo le sini taunuu.

Faaleamio:

Mai punaoa faatuatuaina, aoao atili i le auala e galue ai lou tino.
Aua nei faatagaina au mea sese e faamatala ai po o ai oe pe avea ai ma taulaiga e tasi i lou olaga. Ia manatua o oe o se atalii o le Atua ma e le o faamoemoeina e faia pea e le tagata lava ia mea sese. Afai e te faia se mea sese, fuafua le mea e tau atu i ai ma faia ni fuafuaga e fesoasoani ia te oe e faatoilalo ai luitau o loo e feagai ai.
Ia e tali atu ma ia faamaoni ia te oe lava ia.
Faasoa atu au tauiviga i se tasi e te faalagolago i ai o le a fesoasoani ia te oe e faatumauina oe i lau fuafuaga. Ia fai ma siaki ma i latou po o a mai.
Aua e te tuuina oe i tulaga lea e sili atu ai lou taliaina o le faia o se mea sese. Aloese mai ala o faasalalauga, tagata, po o siosiomaga e faigata ai ona maua se lagona o feusuaiga talafeagai po o le faaosofia o mafaufauga ma amioga le talafeagai o feusuaiga.
Ia faailoa ou lagona feusuai pe a i ai, ona filifili lea e fai se mea e ese mai ai. Faamalositino, talanoa i se uo, pe faataitai se mea e te fiafia i ai.
Saili ia salamo ma ia tuputupu ae ma atiina ae i vaega uma o lou olaga a o e galue i le faatoilaloina o lenei luitau. Manatua upu a Elder Ulisses Soares o le Korama a Aposetolo e Toasefululua: “A tatou taumafai e le aunoa e foia o tatou luitau, o le a faamanuiaina i tatou e le Atua i meaalofa o le faatuatua ina ia faamaloloina ma i latou e faigaluega i vavega. O le a Ia faia mo i tatou mea e le mafai ona tatou faia mo i tatou lava” (“Tauave Lo Tatou Satauro,” Liahona, Nov. 2019, 114).