O Le Ala na Mafai ai e le Lē Fanau ona Faamalosia Lau Molimau O le Aiga O Se Folafolaga
O le fanauina o fanau e le’i avea lava ma se faamuamua sili mo a’u, ae ina ua faafuaseia ona feagai ma le ono lē mafai ona mauaina ni fanau, na matua suia atoa ai lo’u loto.
Na ou auai i le Ekalesia i le 16 o o’u tausaga ma i le 17 o tausaga, i le matuā tele o luitau, na tuua ai Egelani mo Amerika e sola ese mai se olaga o le mativa. Sa na’o a’u lava ma sa ou fefe, ae sa ia te a’u le naunauta’i. Sa ia te a’u se fuafuaga e tasi: ia avea ma se mauoa ma ia lauiloa. I nai tausaga na muamua atu, na ou matamata ai i se ata o tala moni e uiga i tamaiti ua leai ni matua i Romania lea na i ai sona aafiaga loloto i lo’u loto malosi talavou. E le’i fou ia te a’u ni aafiaga a’o tamaitiiti, o lea na ou faatuina ai se sini ia maua ia lava tupe e faatupeina ai se nofoaga mo fanau ua leai ni matua ma ia faia se eseesega i le lalolagi.
Ou te le’i iloa i le taimi lena le ala o le a sili ona ese lo’u olaga e o’o i ai. Sa ou faaipoipo i le 25 o tausaga, ma na vave ona auai lo’u toalua i le Ekalesia. I le taimi lena ua mafai ona manuia a’u taumafaiga, ae sa ou sailiili pea lava mo le “manuia” moni (po o le mea sa ou manatu o le manuia i lena taimi: lauiloa ma le mauoa). Sa ou moomoo ina ia faia se eseesega tele. O le mea uiga ese, ou te le’i mana’o ia ou ma’i tō, ae na ou lagonaina malosi e faapea e le tatau ona ma faia se mea e puipui mai ai le ma’i tō. Sa iloa ane, e sa’o o’u lagona ona i le mavae ai pe a ma se tausaga, sa leai lava se mea na tupu.
Feagai ma le Lē Fanau
I lo’u tuputupu a’e, sa ou alofa lava i tamaiti, e ui lava o a’u fuafuaga e le’i aofia ai le mauaina o le sili atu ma le tasi pe lua o la’u lava fanau i se taimi mamao lava i le lumanai. Ou te le’i manatu o le a ou le fiafia tele pe a le mafai ona ou fanauina ni fanau, ae ina ua faateia i le feagai ai ma le moni o le oo mai o lena tulaga, sa sili ona ou faanoanoa.
I le lua tausaga na sosoo ai, sa oo mai ia te a’u le ita, tiga o le loto, ma le le mafaia o se mea. O le mea malie, “O le Aiga: O se Folafolaga i le Lalolagi” na oo mai i le taimi na ou faaipoipo ai, ma na faatupulaia ona aafia a’u i lena savali i se ala le lelei ona na ou lagonaina e le mafai ona ou faataunuuina lo’u tiute o le mauaina o fanau. Ina ua ma asiasi atu ma lo’u toalua i foma’i, na latou le mafai ona maua se mafuaaga mo le le fanau. Sa foliga mai o se mea sili na le talafetaui. Sa ou tau mafaufau pe aisea ua faia ai e le Atua lea mea ia te a’u. Sa itiiti lo’u iloa, ua amata suia lo’u loto. Sa ou matua taula’i atu i taimi uma i le manuia, ae i le taimi nei, mo le taimi muamua i lo’u olaga, sa mana’o lo’u loto i se pepe e sili atu nai lo se isi lava mea.
A o agai pea i luma le taimi, na faaopoopo pea na ou lagona ua faagaloina a’u, sili na mo’omo’o, tuuatoatasi … lafoaiina e le Atua. Na ou faapipiiina se ataata fiafia, ae e leai se tasi na malamalama i le mea o loo ma savalia ma lo’u toalua. I se tasi aso, sa ou talanoa atu ai i le tina matua o lo’u toalua, o se e sili le atamai ma faaleagaga. A o o’u faasoa atu o’u lagona ia te ia, na ia faapea mai, “E te iloa, e tele isi ala e mafai na avea ai ma tina.” Na ou lagonaina le ati o ana upu i le taele o lo’u loto. Sa faalotomaulaloina a’u. Na ou iloaina ai o se tali lea mai le Tama Faalelagi. Sa na o lo’u taula’i atu lava i le mauaina o se pepe e ala mai i lo’u lava tino. Ua mataali mai se faamoemoe a o ma manatunatu i isi ala. Ua avea ma’ua ma matua fai.
O Le Vaaia o le Aao o le Alii i Lo’u Olaga
E le’i umi ae o’o mai ia i ma’ua Peniamina, la ma pepe fai muamua. O lo’u sootaga ma ia sa i ai se aafiaga sili, ae sa ou lagonaina se musumusuga vaivai e faapea o le a le ia i ma’ua o ia e faavavau. Sa nutimomoia lo’u loto i le mafaufau o le a ia tuua ma’ua. Ma sa sili ona ou moomoo mo se pepe e mafai ona ou tausia. Sa fesoasoani le Auaunaga mo Aiga o le Ekalesia i ulugalii mo le vaetamaina i lea taimi, o lea sa ou alu ai i la’u epikopo ina ia maua ni faamatalaga. I le vaiaso na sosoo ai na ou maua ai se valaau mai se tagata galue agafesootai o le sa vaai mo se aiga e vaetamaina pe fai ma tama fai. O se musika lea i o’u taliga. E ui lava i le i ai o le avanoa e ono i ai ni aafiaga faaletuputupua’e o le pepe, na ma lagonaina le aao faatonutonu o le Alii ia i ma’ua ma sa ia i ma’ua le faatuatua e agai ai i luma. O le a ou le pepelo---sa ou fefe. Ae sa sa’o le lagona, ma na momoli atu pepe Tanielu i lo ma fale i lena lava po.
I totonu o ni nai aso na sili ona ma’i o ia, ma nofo ai i le falemai, ma sa tuuina atu i ai le avanoa e 50 pasene e ola ai. Sa ou nofo i autafa o lona moega pepe mo le 11 aso i le faasologa o le tatalo ma tagi ai i ona luga. Ou te le’i alu ese lava ma le falema’i. Ina ua o mai matua na fanauina Tanielu e vaai o ia (e le’i mae’a lava le vaetamaina), sa ou i ai iina, ma o le vaaiga atoa ua pei o se faalavelave! A e sa la foliga e le fesootai i ai ma e la te lei faaalia lava ni lagona aafia ina ua la vaai ia te ia.
O le taimi taua o le “iloa” tele lea mo a’u. Na ou iloa ai iina e faapea o a’u moni lava le tina o Tanielu! E le afaina pe ou te le’i fanauina o ia---na fuafuaina lava o ia mo a’u. Na tele ni mea sa ou aoaoina e uiga i le tulaga faatina i totonu o na aso e 11. Ou te faia lava soo se mea mo ia.
Sa faasaoina le ola o Tanielu. Na toe foi Peniamina i lona aiga na fanau mai ai. Ae sa i ai pea le Alii i o ma autafa. Talu mai lena taimi, ua ma vaetamaina nisi tamaiti e toaono ma mauaina ofoofogia le toalua o la ma’ua lava fanau. Ou te ono valaau mai le tumutumu o fale e uiga i vavega ua ou molimauina i lo’u olaga. O loo ia te a’u se molimau o folafolaga a le Tama Faalelagi ia i tatou e faapea e mafai ona tatou maua faamanuiaga tatou te mananao i ai, e oo lava i ala tatou te lei mafaufauina muamua pe na mafaufau i ai (tagai 2 Nifae 10:17; Alema 37:17).
E Tofu i Tatou ma se Nofoaga i Lana Fuafuaga
O le i ai o ni tamaiti e toaiva e faigata i nisi o taimi. O le fai tagamea faifaipea, e eseese uiga patino, ma o tamaiti taitoatasi e o’o mai ma mataupu eseese. Ae ou te iloa na auina mai le lagi i latou uma. I le faamaoni lava, e lagonaina faapei o la’u miti o le faia o se eseesega ma le umiaina o lo’u lava fale mo tamaiti ua leai ni matua ua faataunuuina moni lava!
O lo’u tofotofoga o le le fanau na taitaia a’u i o’u faamanuiaga silisili. Na ou lagonaina e tatau ona ou lotomaualalo moni lava ina ia mafai ai ona ou usitai i le finagalo o le Atua nai lo lo’u lava loto. Na ou maua aafiaga e faapea “suiga tele o le loto” (tagai Alema 5:13). Ma e ala atu i lenei ituaiga o le loto i ai, na Ia taitaia a’u. Ua Ia faamanuiaina a’u i miti, faaaliga, ma vavega ia na taitai atu ai a’u i tamaiti taitasi. O loo i ai pea Lana fuafuaga mo a’u! E ui lava na ou lagonaina ua faagaloina a’u, sa i ai lava o Ia iina.
O le le fanau e mafai ona matuai pogisa ma tuuatoatasi. Ou te toe to manatu i na aso i taimi na faigata ai le alu i le lotu e aunoa ma fanau---i le taimi na oona ai le tui o le aiga o se folafolaga. Sa le’i mafai ona ou iloa i lena taimi le mea ua ou iloa nei. O upu alofa o loo i le folafolaga e faatatau pea ia te a’u. Po o le a lava lo tatou siosiomaga, e iai mo i tatou taitoatasi se nofoaga i totonu o le fuafuaga e faavavau a le Tama Faalelagi.