Ua Na’o Tusiga Faatekinolosi: Talavou Matutua

Sa Ou Filifili e Nofo. O Le Auala Lenei e Mafai Ona E Fesoasoani Ai i Se Tasi ia Nofo Foi

Saunia e Shantelle Avery

Sa ou tauivi ma le atuatuvale ma maufaufauga o le pule i le ola. Ma o auala nei na fesoasoani moni ai tagata ia te a’u ia ou nofo.

Faamanatu a le Faatonu: O le pule i le ola o se mataupu lotovaivai ma maaleale i tagata taitoatasi ma aiga i soo se mea. Ua tuuina atu e lenei tagata tusitusi fautuaga o auala na fesoasoani ai isi e tau lana taua ma le atuatuvale ma mafaufauga o le pule i le ola. E ui lava o nei fautuaga e fesoasoani i le auauna atu ia i latou o e o loo tauivi, e taua lava le manatua pea pe afai na maliu se tasi e te alofa i ai i le pule i le ola, e le’o oe e tatau ona tu’uaia.

Faa Sefulufa.

O le faa sefulufa o le aofai lea o taimi e gausia ai se mea i lo’u faiai, lea e mafua ai ona ou mafaufau faapea ou te le mafaia le faaauau pea. O ia taimi uma taitasi o se taimi o le tiga tele, ae na faatumulia i vavega o le faasaoina o le ola.

O se tasi o fesili masani sili e fesiligia e tagata pe a latou iloa la’u tauiviga o le, “O le a se mea e mafai ona ou faia e fesoasoani ai?” I se taumafaiga e taliina lenei fesili ma ina ia fesoasoani i isi i a latou taumafaiga o le auauna atu, ou te manao e faasoa atu lenei lisi o mea e 14 aupito sili na faia e tagata mo a’u lea na tuuina mai ai ia te a’u le malosi ina ia ou nofo.

1. Siaki lo latou saogalemu i le taimi lea. Pe a ou aapa atu mo se fesoasoani, e tali vave mai tagata e ala i le fai mai o fesili e pei o le: “O na’o oe i le taimi nei?” “Pe o e mafuafau e faia se mea?” “E mafai ona ou alu atu e talanoa ia te oe?” O nei fesili e mafai ona faatagaina i latou e iloilo po o le a le mea o loo tupu ma filifili pe manaomia ona latou faasalaveia.

2. Ia faamautinoa lelei lava e le o tuua na’o i latou. I le nofo toatasi e mafua ai na faasolo ina faigata mafaufauga ma lagona se’ia oo lava ina foliga mai ua le gafatia. O taimi ou te vaivai ai, e tula’i mai ai aiga ma uo, a le o le omai i lo’u fale ma nonofo ma a’u, po o le pikiina a’u ina ia faatasi ai ma i latou.

3. Faaali atu le alofa. O upu e tolu faigofie, “Ou te alofa ia te oe” o loo faapea mai ai, “Ou te mana’omia oe ma mana’o ia te oe e te nofo. Afai ua e alu, o le a ou tiga, o lea faamolemole faatali mai.” O nei upu na aumaia ia te a’u le malosi ma faaopoopo mai i lo’u gafatia ia tumau.

4. Folafola atu ia i latou e faapea o le a faasolo ina sili atu. I o’u taimi sili na pogisa, ua faapogisaina atoa a’u e le atuatuvale. Na faamanatu mai e se tasi ia te a’u e faapea o loo i ai le faamoemoe, e faapea o le ala o loo ou lagonaina i le taimi lenei, e le o le ala lea o le a ou lagona ai i le faavavau, e aumaia ia te a’u se mea e toe uumau atu i ai. Ou te le malamalama faapea soo se mea e mafai ona faasolo ina sili atu, ae e mafai ona ou faatuatua i se faamoemoe a se isi.

5. Tuuina atu ni opo mafanafana. O lena ituaiga o fesootaiga agaalofa faaletino e aumaia ai i le taimi lava lea le faamafanafanaga i lo’u loto mafatia. Ou te lagonaina le opo saogalemu ai i aao o se isi ma le faavaivaiina o le faanoanoa ma le fefe mo se taimi itiiti lava.

6. Fesoasoani atu ia i latou ina ia ausia o latou manaoga faaletino. I taimi o le lagonaina e faapea o mea uma i lo’u lalolagi ua pei o le a taape uma ese atu, ua faigata ona faamalieina o’u manaoga patino. Ua saunia mai e lo’u toalua a’u meaai, faamanatu mai ia te a’u e inu vai, ma fesoasoani mai ia te a’u e faia mea e manaomia mo se moe lelei i le po. O nei manaoga patino e fesootai sa’o lava i le tausia lelei lea o lou soifua maloloina faalemafaufau.

7. Toe fai, “O le a le muta lava lo’u alofa ia te oe. E le o oe o se avega mamafa ia te a’u.” I taimi pito faigata na, e le lava na ou faalogo faapea o le a le malaia se tasi o loo siomia ai a’u pe a ou talosaga mo se fesoasoani.

8. Ia avanoa e faalogo ma talanoa. I taimi o loo siomia ai a’u i le pogisa, e miliona mafaufauga o loo taamilomilo i totonu o lo’u mafaufau. I nisi taimi, o le talanoa e mafai ona faatagaina ai a’u e iloa e faapea o mafaufauga na e le talafeagai. I isi taimi, o loo i totonu o tali a isi e mafai ona ou maua ai le manino ma le filemu.

9. Faamanatu ia i latou e faapea e na’o na manaomia lava ona latou faia mai lea aso i lea aso po o le mai lea minute i lea minute. I taimi e matua sili ona ou atuatuvale ai, e le mafai ona ou tumau ai i le taimi lea po o le a lava le tele o au taumafaiga. O mea uma e tatau ona ou faia i le lumanai e faatumulia ai lo’u mafaufau i le taimi atoa e tasi. I le i ai o se tasi e faamanatu ia te a’u e faamatuu ese na mea uma e faamamaina mai ai nisi o na popolega.

10. Ia tuu atu ia i latou e folafola mai ia te oe e faapea o le a latou nonofo ma o le a faaauau pea ona aapa atu. E malosi tele folafolaga. O le fai leotele atu, “Ou te folafola atu o le a ou le faia se mea” e aumaia ai se malosi maoa’e. E faamaoni lava le faigata tele o le fai atu o na upu i taimi aupito sili na faigata, ae e maea loa ona ou faia, ou te iloa e manaomia ona ou tumau ai. Ou te iloa e le mafai ona ou faaleaogaina la’u folafolaga.

11. Fesoasoani ia i latou ia maua le fesoasoani faaletino, faalelagona, faalepolofesa, ma faaleagaga lea e latou te manaomia, e aofia ai le mauaina o se faamanuiaga faaleperisitua, feiloai ma lo latou epikopo, vaai se fomai po o se faufautua, po o le alu i le falemai, pe a manaomia.

12. Faasoa atu ia i latou lou talitonuina o i latou. Na fai mai se tasi ia te au, “Sa tele taimi na e oo ai i le tele o mea aupito sili ona faigata muamua, ma na e toe tula’i ane i luga i taimi uma. E mafai ona e toe faia lena mea.” Na faamautinoa mai e se isi uo ia te a’u i se taimi ua tuanai, “O le a e le faia lava se mea. Ua e mauaina lenei mea.” O lo latou faatuatuaina o a’u na aumaia ai ia te a’u le malosi. E fesoasoani lea ia te a’u ia iloa e faapea ou te malosi atu nai lo le atuatuvale.

13. Faamanatu ia i latou e faapea, o le a e faanoanoa pe afai e latou te le toe i ai. E fesoasoani lea ia te a’u ia mafaufau i fafo atu o a’u ma manatua i latou o e sili ona ou alofa i ai, ma le sili ona tiga o le a ia i latou pe a ou le toe i ai.

14. Fesoasoani ia i latou ia iloa o le faamaloloina e mafai i taimi uma. O se tasi o mea sili ona maua ai le faamafanafanaga na fai mai ai se tasi ia te a’u, “E le’i mamao atu le mea ua e o’o i ai. E le mafai ona e mamao atu pe afai o loo e i ai pea iinei.’’ Ou te mafaufau soo i lena mea i le taimi nei, aemaise lava pe afai e ta’u mai e pepelo o loo i totonu o lo’u mafaufau ia te a’u faapea ua ou matuai malepelepe lava mo se faamalologa.

E ui lava i nai tausaga ua tuanai atu na tofotofoina ai lo’u faatuatua ma faaloaloa lou agaga, na ou vaaia foi vavega. Ua suia faafia i le tele o taimi lo’u olaga e faataitaiga malolosi ua ou vaaia o le “faanoanoa faatasi ma e faanoanoa … ma faamafanafana i e ua tatau i ai le faamafanafanaga” (Mosaea 18:9). Ua ou mauaina le alofa ma le malamalamaaga a o vaaia e o’u mata luitau o isi ma pei na ou fesootai atu i o latou loto nutimomoia i auala matagofie. Ou te aveina le faamoemoe o loo i upu a Tuafafine Reyna I. Aburto, “Ou te molimau atu ia te outou e ‘ala i mala ma manū,’ o le a faatasi le Alii ma i tatou, o o tatou ‘puapuaga [e mafai ona] tofatumoanaina i le olioli ia Keriso,’ ma ‘e faaolaina i tatou i le alofa tunoa, pe a uma mea uma e mafai ona tatou faia’” (“I Mala i Manū, Iesu, Afio Mai!‘’ Ensign po o le Liahona, Nov. 2019, 59).

Ua ou molimauina le mana faamalolo a Iesu Keriso ua galueaiina i totonu o lo’u olaga, ua tuuina mai ia te a’u le malosi e tumau ai ma le gafatia e saili ai le faamalologa. E mafai ona avea oe ma se fesoasoani i se isi ia maua lena malosi ia nofo ai.

O Shantelle Avery o le toalua tuuto ma le tina e nofo-i-le fale . E fiafia o ia e kolosē, aoao ma faataitai galuega o le pu’eata, ma savaliga sopo i mauga matagofie o Idaho i matu faatasi ma lona toalua ma le la fanau laiti e toalua. Ua ia maua le faamoemoega sili ma le malosi i le faasoa atu i ana tauiviga ma le atuatuvale i se taumafaiga e fesoasoani i isi.

O Le A se Mea e Mafai Ona Ou Faia?

Afai e te iloa se tasi o loo tauivi ma le atuatuvale, aapa atu ma ofo atu lau lagolago. E mafai foi ona e aoao atili i luga o le upegatafailagi o le Church’s suicide prevention .

Suesue Atili

E mafai ona e maua nisi tusiga e uiga i le soifua maloloina faalemafaufau i le vaega a le autalavou matutua o Setema 2020 o le Liahona.

O lenei vitio Savali Musuia o loo tautalagia ai le mataupu puipuia o le pule i le ola, faamatala le tala o se alii talavou o le na filifili e nofo.

Siaki le AM Faalevaiaso, o loo i le vaega o Talavou Matutua i le polokalama o le Gospel Library, mo nisi anotusi fou, ma musuia mo le autalavou matutua i vaiaso taitasi.

E mafai ona e auina mai au lava tala, manatu, ma manatu faaalia i le liahona.ChurchofJesusChrist.org. Matou te fia faalogo atu ia te oe!