Ol Aposol Oli Serem Ol Mesej blong Hop
Ol lida blong Jos oli givim sam niu tingting abaot fasin blong stap kolosap long God, givhan wetem lav, mo gat longfala tingting mo muv fored long taem blong wol sik ia.
Foto i kam long Getty Images
Blong fesem vaeres we i stap goraon long wol, ol ofisol oli stopem ol pablik kam tugeta mo oli stat blong yusum ol kwarantin rul. Skul i klos, ol eklesiastik lida oli kanselem ol miting blong jos, mo olgeta we oli wantem wokbaot aotsaed oli mas werem ol fes mask blong protektem olgeta.
Yia ia i 1919 mo bigfala nogud flu we i kam wan wol sik, i bin stat long yia bifo mo i tekemaot ol ten blong ol milian laef blong man.1 Niufala profet blong Jos, Presiden Heber J. Grant (1856–1945), oli setem apat long Novemba 1918 be bae oli no sastenem hem kasem Jun 1919 from se oli bin pusumbak Epril Jeneral Konfrens.
Long taem blong seves blong hem, afta long olgeta dei ia mo ol nara dei blong jalenj, Presiden Grant i bin givim wan kaonsel we i stret long taem blong yumi tedei taem hem i bin talem: “Yumi bin kam long wol ia blong kasem save, waes, mo eksperiens, blong lanem ol lesen, blong safa ol sobodi, mo stap strong tu long ol temtesen, mo winim ol viktri blong laef long wol ia.” Aot long save we hem i bin kasem tru long plante bigfala eksperiens blong hemwan, hem i ademap: “!Mi save se long taem blong agens, bae ol Lata-dei Sent oli kasem kamfot mo blesing, mo givhan long tingting blong olgeta i bitim eni nara pipol!”2
Long taem blong “samting we i kam agensem yumi” wetem niufala korona vaeres ia, yumi karem kamfot mo givhan long tingting long gospel ia we i kambak blong Jisas Kraes. Save blong yumi se Papa long Heven i lavem ol pikinini blong Hem, mo se Hem i bin singaotem ol profet mo ol aposol long taem blong yumi blong soem rod long yumi tru long ol strong win blong taem long wol ia, hem i wan bigfala blesing.
Aot long kaonsel we oli serem long samfala las intaviu, samfala memba blong Kworom blong Olgeta Twelef Aposol oli mekem yumi tingbaot se yumi save filim glad, mo yumi save lukluk i go long fiuja i nomata wanem i stap hapen raon long yumi.3
Foto i kam long Welden C. Andersen
Wok Ia I Stap Go Fored
Elda Bruce R. McConkie (1915–85) long wan taem, i bin komperem Jos long wan “bigfala haos trak” we i stap muv i go fored i nomata wanem i kam agensem hem.4 Elda David A. Bednar i talem se sapos haos trak ia i save stap muv i go fored oltaem, i from Jos i rere, mo from histri we Jos i gat wetem fasin blong samting we i kam agensem hem oltaem.
“‘I no gat rabis han we i save stopem wok ia blong muv fored,’5 mo bae i no gat eni wol sik we bae i stopem wok ia blong muv i go fored tu,’ hem i talem. ‘”Long medel blong evri jalenj we yumi stap fesem from vaeres ia, wok ia i stap go fored. … Mifala i no save se bae i tekem hamas taem, be bae yumi win. Mo maet bae yumi no save gohed long nomol laef blong yumi bifo, stret olsem we yumi bin save long hem, be plante long ol samting we yumi stap stretem yumi folem mo plante long ol jenis ia, bae oli ol gudfala samting.”
Elda Quentin L. Cook i talem se fasin blong Jos i rere, we i kam tru long insperesen, oli ol gudfala eksampol we oli kam long stret taem, blong tokbaot bigwan moa fasin blong kipim Sabat dei i tabu, mekem ol kworom blong Melkesedek Prishud mo ol Rilif Sosaeti oli kam strong moa, mekem jenis long wok blong givhan, mo statem Kam Folem Mi, ol vidio blong Buk blong Momon, mo program blong Ol Pikinini mo Ol Yut.
“Bambae yumi luklukbak long hemia olsem wan stamba taem blong stap rere, mo i no jes wan samting we yumi mas stap strong tru long hem,” hem i talem.
Presiden M. Russell Ballard, Akting Presiden blong Kworom blong Olgeta Twelef Aposol, i agri. I nomata we ol tempol mo ol mitinghaos oli klos blong sot taem, ol memba blong Jos oli gat ol tul long saed blong spirit, we oli nidim blong gohed blong muv fored i go.
Presiden Ballard i tingbaot olsem wanem hem i bin filim taem hem i bin kambak hom long 7 Disemba 1941 blong faenemaot se oli bin atakem Perl Haba mo Yunaeted Stet i stap rere blong joenem Seken Wol Wo. Olsem plante pipol tedei, hem i bin wari abaot fiuja mo i bin askem hemwan sapos fiuja blong hem i bin lus.
“Be i no hemia i hapen,” hem i talem. Semmak olsem ol fri pipol blong wol ia oli bin winim wol ia, bae wol ia i win agensem korona vaeres. “Evri samting bae i go oraet nomo taem yumi tanem hat blong yumi long Papa long Heven mo lukluk long Hem mo long Sevya olsem Ridima blong evri kaen man,” hem i talem.
Wan nara wei we Jos i muv fored, hem i tru long misinari hadwok, we oli stap jenis long semtaem we ol situesen blong wol oli stap jenis. Elda Dieter F. Uchtdorf i bin talem se ol lida blong Jos oli bin stap stadi long ol niu wei blong stap serem gospel iven bifo KOVID-19 i stap blong spolem misinari wok. Wei we i spolem misinari wok, i luk we plante taosen blong ol misinari oli mas gobak long ol hom kantri blong olgeta, sam oli rilis eli, mo sam oli singaotem olgeta long ol nara ples.
“KOVID-19 i spidim wei blong yumi tingting abaot hemia bigwan, mo i bin openem ae blong yumi,” hem i talem. Risal blong hem, teknoloji mo sosol media oli stap openem ol doa we, bifo, ol komuniti oli bin klosem i stap, mo tu ol hom mo ol bilding apatmen.
“Misinari wok bambae i gohed blong muv fored i nomata long wol sik ia,” Elda Uchtdorf i ademap. “Yumi stap gohed blong lanem olsem wanem blong mekem misinari wok i kam antap, naoia mo long fiuja. Lod i bin promesem yumi blong mekem wok ia blong Hem i go hariap blong save blesem evri pikinini blong God (luk long Doktrin mo Ol Kavenan 88:73). Mi filim se yumi stap long medel blong rod ia, mo semtaem, stap laef tru long taem ia blong jalenj. Ol misinari blong yumi oli ol paeonia blong taem blong yumi, we oli stap serem mesej blong gospel long sam niu wei we i stret long ol situesen blong yumi blong mekem se Jos Ia blong Jisas Kraes bae i gohed blong go fored kasem taem i fulumap ful wol ia’” (Doktrin mo Ol Kavenan 65:2).
Ol niu janis blong stap serem gospel oli no ol samting ia nomo we rod blong ol oli stap open. Ol hat blong yumi tu i stap open from ol hadtaem ia we plante taem i putum tingting blong man i stap daon mo i tanem tingting blong olgeta i go long God, Elda D. Todd Christofferson i talem.
“Oli open moa blong save tingting: ‘Ating mi nidim sam samting moa bitim bank akaon blong mi. Mebi i gat moa samting long laef bitim wanem mi bin stap mekem long laef blong mi,’” hem i talem.
Elda Christofferson i stap leftemap tingting blong ol memba blong Jos blong lukaotem ol janis blong mekem misinari wok, olsem blong stap serem ol mesej blong gospel mo ol toktok blong gospel tru long sosol media, mo blong toktok wetem ol fultaem misinari abaot fasin blong help blong stap felosip long ol pipol we oli stap tijim onlaen, mo blong stap gohed blong toktok wetem ol pipol we oli no save luk olgeta oltaem.
Stap Putum Sosol Spes mo Putum Spes long saed blong Spirit
Wan nara wei we Jos i muv fored i tru long wei we ol Lata-dei Sent oli stap fesem ol jalenj long saed blong laef ia olsem KOVID-19. Blong stap protektem yumi long saed blong bodi, yumi stap putum moa spes bitwin yumi mo ol narawan, be blong protektem yumi long saed blong spirit, yumi go kolosap moa long Papa we i stap long Heven mo Pikinini blong Hem. KOVID-19 wol sik ia, i bin givim plante moa janis long ol memba blong Jos blong kam antap blong protektem olgeta long saed blong spirit taem oli bin folem kaonsel blong Presiden Russell M. Nelson blong stap harem Lod.
“Papa blong yumi long Heven i save se, taem tingting we i no sua long samting mo fraet i raonem yumi, wanem we bae i helpem yumi aot long evri samting, hem i blong harem Pikinini blong Hem.” Toktok ia Presiden Nelson i bin talem long taem blong Epril 2020 jeneral konfrens. Hem i ademap: “Olsem ol disaepol blong Jisas Kraes, ol hadwok blong yumi blong stap lisin gud long Hem i mas kam wetem moa tingting. Hem i minim se yumi hadwok wetem tingting, oltaem, blong fulumap evri dei laef blong yumi wetem ol toktok blong Hem, ol tijing blong Hem, mo ol trutok blong Hem.”6
Mifala i no laekem tumas we ol miting blong Jos oli stop smol taem, mo ol tempol oli klos, o man i lusum wok, be blong spendem moa taem long hom i givim yumi “janis blong tingting blong stap wekap long God” (luk long Alma 5:7), Elda Cook i talem. “Maet ol samting we oli stap hapen oli wan alam klok long saed blong spirit we i mekem ol tingting blong yumi i lukluk nomo long ol samting we oli moa impoten. Mo tu, bae i wan bigfala blesing long taem ia blong lukluk moa long ol samting we yumi save mekem i kam gud moa long laef blong yumi, mo olsem wanem nao yumi save blesem laef blong ol narawan taem we yumi stap wekap long God mo muv i go folem kavenan rod ia.”
Elda Jeffrey R. Holland i ademap: “Ol kaen taem olsem oli stap invaetem yumi blong lukluk insaed long sol blong yumi blong luk sapos yumi laekem wanem we yumi stap luk long ples ia. Hem i long ol taem olsem nao we yumi stap tingting abaot huia i rili yumi mo wanem nao i rili impoten.”
Ol kaen taem olsem oli stap invaetem yumi tu blong kam antap long fet blong yumi, long seves, mo long fasin blong stap talem tangkyu, we i pusum yumi blong “skelem hamas yumi dipen long God mo ol blesing we oli kam long Hem we plante taem, yumi tekem oli nating nomo,” Elda Holland i talem. “Yumi talem tangkyu long Papa we i stap long Heven sapos yumi gat moa hat, moa fasin blong talem tangkyu, mo gat moa fasin blong tingbaot olsem wanem plante problem oli finis from God, ol enjel, ol promes blong kavenan, mo prea.”
Long medel blong fasin blong talem tangkyu, hem i blesing blong stap tingting “hamas sore Lod i bin gat long ol pikinini blong ol man, stat long taem we hem i mekem Adam we i kam daon kasem taem we bae yufala i kasem ol samting ia” (Moronae 10:3). Ol memba blong Kworom blong Olgeta Twelef Aposol oli talem se long eni taem we yumi mas stap haed samples, yumi save folem eksampol blong Nifae mo Alma mo stap tingbaot se Hem, we yumi trastem Hem, Sevya Jisas Kraes, bambae i stil mekem yumi kam fri.” (2 Nifae 4:19; Alma 36:27). Mo yumi tingbaot, olsem we Aposol Pol i bin tijim, se i no gat wan samting i save “seperetem yumi long lav ia blong Kraes” (luk long Rom 8:35).
Lod Jisas Kraes i stamba man blong lukaotem yumi (luk long Ol Sam 61:1–4), Elda Holland i talem. “I nomata wanem nara samting i save hapen, bambae yumi neva seperet long lav mo kampani blong Sevya, iven sapos yumi no luksave hemia long tetaem ia. Spirit, i nogat wan vaeres i save blokem hem, o i no ol baondri blong wan kantri o ol medikol stadi we bae i blokem hem.
Foto i kam long Getty Images
“Mekem Ol Samting we Oli Kaen”
I no longtaem i pas, taem mi bin stap ridim wan ripot we Jos komiti i bin putumaot, Elda Christofferson i wari long saed blong wanem “fasin blong fos blong stap yuwan” i save mekem long ol singgel memba blong Jos—olgeta we oli olfala mo yangfala.
“Fasin blong fos blong stap yuwan, i save lidim man blong filim se hem i stap hemwan, mo fasin blong filim se yu stap yuwan i save spolem helt blong bodi mo helt blong tingting,” hem i talem. “Blong faet agensem hemia, samfala we oli stap difendem pablik helt oli talem se, olgeta ia we oli filim se oli stap olgetawan, oli mas lukaotem ol wei blong ‘mekem ol samting we oli kaen’ long wan narawan.”
“Ol Lata-dei Sent oli save faenem ol wei blong givim seves, help, mo givhan long ol narawan, speseli long olgeta we oli stap filim se oli stap olgetawan,” Elda Christofferson i talem, “mo olgeta we oli givim seves long ol narawan oli save daonem tingting blong olgeta se oli stap olgetawan.
“Lukluk nomo long wok blong givhan,” hem i talem. “I gat plante we yumi save mekem long wanwan long yumi blong save filim se yumi pat blong wan grup mo filim se yumi ol brata mo sista. Hemia i wan taem we kworom blong ol elda mo Rilif Sosaeti oli rili save kam blong save huia stret ol brata mo sista blong olgeta, mo givim wanem we olgeta nomo oli save givim olsem wan oganaesesen.”
Mo sapos yu stap wokem sendem teks long wan, hem i talem, “mi ting se i helti tu blong ringim wan, mo yusum olfala teknoloji ia we oli singaotem telefon. Jes ring blong toktok mo storian. Letem olgeta oli harem wan voes.”
Ol smol hadwok blong helpem ol narawan i save mekem bigfala samting i defren, i save putum laet long dei blong wan long ol wei we maet yumi no save. “Wok blong yumi blong givhan, plante long ol pipol we oli stap longwe we oli no gat man raonabaot long olgeta, oli nidim,” Elda Cook i talem.
Elda Holland i givim tingting: “Yumi sapos blong dediketem, o givim wan pat blong dei blong yumi blong stap toktok long ol pipol we oli rili nidim. Yes i tru, yumi kasem smol paoa moa taem yumi stap mekem olsem, mekem se evriwan i kam antap (3 Nifae 27:14, 15), semmak olsem we Sevya i bin talem se Papa i sendem Hem long wol ia blong mekem olsem.”
Wan nara wei we yumi save leftemap yumiwan mo ol narawan, hem i blong rere from dei ia we bae tempol i open bakegen. Taem tempol i klos—from ol wol sik, from oli mekem gud bakegen, o blong klinap—“oli givim wan gudfala janis blong lanem moa abaot wok blong lukaotem famli histri, mekem indeksing, mo i givim wan janis blong lukaotem wei blong rere long plante, plante nem blong karem i go long dei we ol doa blong tempol oli open bakegen,” Elda Bednar i talem.
I nomata se ol tempol oli open o oli klos i stap, Elda Bednar i ademap, “ol memba blong Jos oli save traehad yet blong oli stap klin inaf mo holem wan tempol rekomen we i laef i stap.
Ol Lesen we Lod I Wantem Yumi blong Lanem
Olsem we Elda Bednar i poenemaot, i nomata se i no gat wan i wantem jusum blong fesem KOVID-19 wol sik ia, rabis sik ia blong taem tedei, i stap long yumi finis.
“Wetem lukluk we i go long taem we i no save finis we gospel ia we i kambak i givim, mo wetem gladhat we i kam long Atonmen blong Sevya, yumi save lanem ol lesen we oli kam long ol agens blong laef blong wol ia, we oli mekem yumi rere blong kasem ol blesing blong taem we i no save finis,” hem i talem. “Yumi mas prea. “Yumi mas lukaotem. “Yumi mas askem. Yumi mas gat ol ae we oli luksave mo ol sora we oli harem samting. Be yumi save gat blesing long ol gudfala wei blong lanem ol lesen we bae oli blesem yumi naoia, mo blong oltaem.”
Wetem bigfala rabis wok we hem i stap wokem insaed long ol famli raon long wol, KOVID-19 i bin tijim ol pipol blong soem moa kea long ol narawan, Presiden Ballard i talem.
“Yumi stap kam blong luksave hamas ol famli oli impoten, hamas ol neba blong yumi oli impoten, mo hamas nao ol fren blong yumi we oli memba blong Jos oli impoten,” hem i talem. “I gat ol lesen we yumi stap lanem naoia we oli stap mekem yumi kam ol pipol we i gud moa.”
Mo taem we ol strong win blong naoia oli pas i go, ?wanem nao yumi ting se bae i hapen afta? Ol semmak samting nomo, Elda Uchtdorf i talem. Ol pikinini blong God, we oli stap insaed mo aotsaed long Jos, bambae oli gohed blong fesem ol jalenj.
Hem i talem: “Yumi stap laef long wan taem we yumi nid blong mas lanem samting. Mo lesen we i moa impoten we yumi save lanem, hem i we, ansa long ol jalenj we oli stap kam, hem i ansa tu long jalenj ia blong tedei: we i gospel ia blong Jisas Kraes.
From se ol Lata-dei Sent oli gat gospel ia we i kambak, gospel ia blong Jisas Kraes, Elda Holland i talem se oli save lan blong oli gat wan maen we i luk gud saed blong ol samting mo oli gat hop, we oli stap mekem bes we oli save mekem mo trastem fulwan toktok blong Lod taem Hem i talem: “Bae yumi mekem, wetem glad hat, evri samting we i stap long paoa blong yumi; mo afta, bae yumi stanap kwaet, wetem bigfala tras evriwan, blong luk fasin blong God blong sevem man, mo blong Lod i soemaot han blong hem” (Doktrin mo Ol Kavenan 123:17).
Elda Holland i talem: “I gat plante samting blong yumi stap gladglad long hem taem yumi stap mekem fet blong yumi i strong moa, taem yumi trastem Lod moa, mo taem yumi luk merikel ia we i taem Hem i mekem yumi kam fri.”