iTabagone Qase Cake
E Tautauvata Beka na Vakatotogani kei na Veisaqasaqa?
E vakaitikotiko mai Texas, Amerika, o koya e vola.
Na kena kilai vakamatata cake ni vakatotogani e rawa me vukei keda meda nuitaka tiko ni, ena dua na siga, na Turaga ena sereki keda mai na veivakabobulataki.
Ena noda vuravura lutu tani oqo, na vakatotogani e ka vakatuburarawa ka dau moica dina na bula vei ira na so. Ni da vakayagataka vakasivia e dua na ka meda drotaka kina na bula, me vakataka na kakana, wainimate vakavuniwai, itukutuku raraba, kakase, iyaloyalo vakasisila, lasu, veimau ilavo, se vakaukauwa yago ena rawarawa sara meda sa coriti tu ena dua na cowiri ni vakatotogani.
Niu mai vakaraici ira toka na tamata totoka, lomani, era voliti au tu era vakaleqai tiko ena vakatotogani - sega walega ni ra rawai ena digidigi cala - au dau rai yani ki na ivolanikalou kei na vakadidike nikua baleta na vakatotogani meu kila vinaka kina na veituvaki ni vakasama ni gagadre totolo kei na veivakasaurarataki oqo.
Na Co Ca ni Vakatotogani
Na vakadikevi ni vakatotogani sa vaka na kena qaravi tiko e dua na iteitei. Eda sega ni wereca ga vakadua ka namaka me sa taucoko kina. Eda sa kila tiko ni levu na co era na tubu tale mai, koya gona eda sa qai cavuraka vakavinaka ka vakawasoma na co ca mera taqomaki kina na itei.
Kevaka eda vakaleqai tiko ena vakatotogani, eda na rawa ni yalolailai ena gauna eda cakava tale kina ni oti mada ga noda veivutuni ka vakasaqara na veivuke. Eda na rairai kurabui ka nuiqawaqawa ni o ira na veitemaki oqo era dau kaukauwa mai ni oti na noda veigauna marau levu se rarawa ca ena noda bula. (Me vaka ga na co ca era tubu vakalevu tale mai ni oti e dua na uca veivakabulabulataki se dua na cava bibi.)
Na Vakatotogani kei na Veisaqasaqa Lomadina
Au sa raica rawa ni dau vakayagataka o Setani na vakatotogani me “ivakadinadina” ni da sa dau gadreva na veika butobuto, ni da sa rusa tu ga mai na ivakatekivu, se sa biuti keda vakadua na Turaga. Na tevoro e vakayagataka na madua me vakayalolailaitaki keda, ka dusia tiko ni se cava ga na levu ni gauna eda veivutuni kina, na veitemaki ena yaco tikoga mai.
E vuqa tu na vuna era sa dau rawai tu ga kina na tamata ena vakatotogani, ia na vakatotogani sa dau tekivu ena sasaga me rawati na vakacegu “ni gagadre titobu ka se bera ni sotavi.”1 Vakakina ni veisaqasaqa e rawa ni kauta mai na vakatotogani kei na vakatotogani e rawa ni vakavuna na ivalavala ca, era sa dau kaburaki yani se vakalevulevui ena malumalumu ka sega ni veisaqasaqa ena lomadina.2
Eda vakavinavinaka, eda sa kila ni malumalumu e rawa ni solia vei keda na madigi meda vulica kina na loloma soli wale ka vakatorocaketaka na noda vakabauta vakatitobu na nona kaukauwa ni veivakabulai o Jisu Karisito.3
Me Yacova Ni sa Sereki mai na Tiko Vakavesu
Eda sa kunea eso na raiyawa ena kena vaqarai ka rawa me levei na dai ni itovo veivakatotogani mai na rua na ilawalawa tamata ena iVola i Momani: na tamata i Limiai kei ira na tamata i Alama.
Na ilawalawa ruarua oqo era a tiko vakavesu ena dua gauna. Rau sa qai kila ni “sa sega ni tiko e dua na sala me ra sereki ira mai kina” mai na vesuki tu (Mosaia 21:5). Oi rau ruarua, ena kena gauna, a vuki vua na Turaga mera veivuke.
A vakabobulataki ena vuku ni ivalavala ca na tamata i Limiai. Era a sega ni vakasaqara na veivuke ni Turaga, ka ra valuti ira vakatolu na nodra dauveivakasaurarataki “ena cudru.” Era a druka mai na ivalu yadua. Ni ra sa tekivu me ra vakayalomalumalumutaki ira, “sa berabera ni rogoca na Turaga na nodra tagi … [ia o Koya] sa qai rogoca na nodra tagi ka vakamalumalumutaka na lomadra na Leimanaiti ka sa tekivu me ra vakamamadataka na nodra icolacola”(Mosaia 21:15; vakamatatataki). Era a vakalougatataki kina ni ra sa yalomalumalumu cake tikoga, ia a “sega ga ni vakadonuya na Turaga me sa tei vueti ira mada mai na nodra vakabobulataki” me yacova dua na gauna mai muri.
Era a tiko vakabobula na tamata i Alama dina ga ni ra buladodonu tiko, ia a “tagi vakaidina vua na [Kalou] na yalodra.” Dina ga ni sa kila tu na nodra gagadre savasava, a vakatara na Kalou e dua na gauna ena tadrua ni nodra tiko bobula kei na nodra sereki. Ni ra sa tomana tiko nodra vakararavi Vua, sa yalataka o Koya ni na “vakamamadataka na icolacola dou sa vakacolati kina, mo dou kakua ni vakila e dakumudou, ena nomudou [se] tiko vakabobula.” Me idole, era sa qai “soli ira ena yalomarau kei na yalo vosota ki na nona inaki na Turaga” (Mosaia 24:12, 14, 15).
Rau sa qai sereki sara na ilawalawa e rua. Sa yalataki talega vei keda kevaka eda na gole vua na Turaga ena noda tiko bobula, eda sa “kena ivakadinadina [baleti Koya] ka lako yani” ka “mo dou kila, ni koi Au na Turaga na Kalou, [sa] dau sikovi ira na [Nona] tamata ena nodra vakararawataki” (Mosaia 24:14)—kei na nodra vakatotogani!
Dou Vakacegu
Kevaka o vakaleqai tiko ena vakatotogani, mo nanuma tiko ena veivuke ni Turaga, ena gauna oqo o sa na qele bulabula me teivaki kina na itovo i Karisito. Ni levu cake na nomu yalomalumalumu, sa na rawa mo vulica na dauvosota, na yalololoma, na vosota vakadede, kei na yalomalua.
Sota vata kei ira na nomuni iliuliu ni matabete kei ira e rawa ni ra veitokoni, ka vakayagataka e vuqa na iyaya ni cakacaka e sa vakarautaka tu na Tamada Vakalomalagi me vukei iko mo kunea na bula galala. Vakararavi vua na Turaga; ni ko muri Koya vagumatua, ena rawa ni veisautaka o Koya na bolebole oqo e veivakayalolailaitaki ka vakatuburarawa ki na dua na madigi kaukauwa sara me baleta na veivakavoui vakayalo.4
E dua na Yalododonu Edaidai taumada e Ositerelia, ni veidutaitaki vata na nona gauna e liu kei na kena nikua, a kaya kina: “Na noqu bula taumada [a] dua na lekutu ni co ca, ka sega sara ni bau Maliwai ira e dua na senikau. [Ia] sa takali oqo na co ca, kei na senikau era sa Tubu cake ena nodra vanua.”5
Ni vakawasoma nodaru wereca na noda iteitei ka gole vua na Turaga ena noda vakatovolei, eda na ciqoma na yalayala a soli vei ira na tamata i Alama: “Dou vakacegu, ni ena mataka au na vueti kemudou kina mai na nomudou vakabobulataki” (Mosaia 24:16)
Mo werewere tikoga—na tatamusuki sa yaga sara!