Fakaʻilekitulōnika Pē: Kakai Lalahi kei Talavou

ʻOku Lahi ʻa e Founga ki Hono Ako e Folofolá

Fai ʻe Marissa Widdison

Ngaahi Makasini ʻa e Siasí

Neongo kapau ʻoku ʻikai ke ke manako laukonga, ʻoku lahi e ngaahi founga ki hono ako e folofolá.

ʻOku ou saiʻia ʻi hoku uiuiʻi lolotongá ko ha taha tā piano ʻi he Palaimelí. ʻI he ngaahi uike siʻi kuo hilí, naʻe ako ʻe he fānaú ha foʻi hiva. Ne u ongoʻi e Laumālié ʻi heʻenau hivá:

Kumi, fifili, mo lotu
Kuo pau ke fai ʻeni. 
ʻE tataki ʻe he Laumālié, pea ʻe ongo moʻoni 
 ʻOku ou ʻilo ʻoku moʻoni e ngaahi folofolá.1

Ka naʻe fakafokifā ʻeku fakakaukau ki ha fehuʻi. Fēfē kapau ʻoku ʻikai ke ke—hangē ko e fokotuʻu mai ʻa e veesi ʻuluaki ʻo e hivá—“manako he lau e folofolá”? Ne kiʻi fuoloa e toka ʻa e tefiito ko ʻení ʻi hoku ʻatamaí kimuí ni mai koeʻuhí kuo tokolahi hoku kaungāmeʻa kuo nau vahevahe mai ʻenau faingataʻaʻia ʻi he laukongá. Pea ʻoku tokolahi ha niʻihi ʻoku ou ʻilo ʻoku ʻikai ke nau saiʻia ʻi he laukongá! ʻOku ʻi ai nai ha founga ke mahuʻingamālie ʻenau aʻusia ʻi he folofolá pea fakatupulaki ha “fakamoʻoni ʻoku moʻoni”?

ʻOku hangē ʻoku ako lelei ange ʻa e kakaí ʻi hono fakahoko ʻo e fakamatalá ʻi ha ngaahi founga kehekehe, ʻi heʻenau mamata ki aí mo e leá fakatouʻosi, pea mo hono toutou fakahoko ʻo e ngaahi lēsoní. ʻI he fakakaukau ko iá, ne u feinga ke fakakaukau ki ha ngaahi founga kehekehe ki hono ako ʻo e folofolá. Ka neongo iá, he ʻikai pehē ko e meʻa kotoa pē ʻi he lisi ko ʻení ko ha fakakaukau lelei mo loloto ki he folofolá ʻi hono akoʻi ʻe he kau palōfitá ʻoku mahuʻinga ki heʻetau fakamoʻoní—ko e niʻihi ko ha ngaahi fakakaukau vave mo fakafiefia—ka ne u pehē te nau ueʻi ʻiate koe ha ngaahi fakakaukau foʻou . Tau ako ʻa e ongoongoleleí ʻaki hotau lelei tahá ke tau lava ʻo aʻusia ʻa e fakamatala e hivá, “feinga ke ʻiloʻi” fakataha!

Ngaahi Fakakaukau ki Hono Ako ʻo e Folofolá

ʻIloʻi ʻa e ngaahi foʻi lea ʻoku toutou hā ʻi ho tāpuaki fakapēteliaké pea kumi ʻa e ngaahi foʻi lea tatau ʻi he folofolá.
ʻI hoʻo akó, tā fakatātaaʻi hoʻo ngaahi fakakaukaú ʻi ha tohinoa ako pe ʻi he tafaʻaki ʻo hoʻo tohi lēsoni Haʻu, ʻo Muimui ʻIate Aú .
Langa ha kiʻi sīpinga fakatātā ʻo ha talanoa he folofolá.
Tā ki ha kāinga ʻoku nofo mamaʻo pea mo laukonga fakataha ʻi he telefoní.
Hiki ha lisi ʻo haʻo ngaahi fehuʻi ki he ʻOtuá pea kumi ʻa e ngaahi talí ʻi hoʻo laukongá.
Mamataʻi ha vitiō ʻi he BookofMormonVideos.org pe BibleVideos.org.
Fakaava ʻa e folofolá ki ha faʻahinga vahe pē pea kamata laukonga.
Hivaʻi ha himi pea kumi ʻa e ngaahi folofola ʻoku lisi ʻi he fakaʻosinga ʻo e foʻi hivá.
Kumi ki he topics.ChurchofJesusChrist.org pea ako ha meʻa te ke saiʻia ai.
Vakai ki he ngāue fakaʻaati ʻi he ʻinitanetí ʻokú ne fakatātaaʻi ʻa e talanoa fakafolofola ʻokú ke akó.
Lau pē ʻa e ʻuluʻi fakamatala ʻo e vahe ʻo ha tohi.
Tā ha mūsika fakanonga meʻalea ʻataʻatā pē lolotonga hoʻo lau leʻo lahi e tohí.
Kumi ha ngaahi founga ʻoku fekauʻaki ai ʻa e vahe takitaha ʻo e folofolá ki he temipalé.
Kapau ʻokú ke faʻa ako ʻa e tatau fakaʻilekitulōnika ʻo e folofolá, ʻahiʻahi lau folofola mei he tatau kuo pākí pe mei he pākí ki he fakaʻilekitulōniká.
Tā valivali pe tā fakatātaaʻi ha konga ʻo e folofolá pe ko ha talanoa.
ʻAi ke hangē ne vahe atu ke ke lea ʻi ha tefito ʻi he lotú, pea ako ki ai.
Hili hono lau ha vahe mei he folofola ʻokú ke saiʻia aí, toe tohi ia ʻi he fakalea pē ʻaʻau.
Lau e ngaahi folofola ʻi he futinouti ʻo ha veesi ʻokú ke saiʻia ai, pea hoko atu ki he ngaahi futinouti ʻo e ngaahi veesi ko iá, pea muimuiʻi e ngaahi futinouti ko iá ʻo pehē ai pē.
Taufetongi mo e ngaahi kaungāmeʻá ʻi hono lau leʻo lahi ʻo e ngaahi vēsí pea talanoa fekauʻaki mo e laukonga naʻa mou fakahokó.
Fakaʻaongaʻi ʻa e Fakahinohino ki he Ngaahi Folofolá ke ako ki ha foʻi lea pe tefito.
Kumi ʻa e ngaahi folofola kotoa ʻi he maʻuʻanga fakamatala he fakaʻosinga ʻo ha lea ʻi he konifelenisi lahí.
Tuku e folofolá ʻi ha feituʻu te ke ala sio ki ai he ʻaho kotoa pē pea feinga ke ako maʻuloto ia ʻi he uiké ni.
Tohi ha ngaahi kaati ki he kakaí mo ha ngaahi folofola fakafiemālie.
Ngāueʻaki e Gospel Library ke fanongo ai ki he ngaahi folofolá ʻi hono lau leʻo lahi atu kinautolú.
Tā ʻa e fakahokohoko ʻo e ngaahi meʻa ʻoku hokó ʻi hoʻo lau ʻa e Tohi ʻa Molomoná.
Kumi ha “kaungā lau folofola” pea mo fepōpoaki text ha veesi ʻi he pongipongi takitaha.
Kamata laukonga mei he vahe fakaʻosi ʻo e Tohi ʻa Molomoná ki hono kamataʻangá.
Lau ʻa e ngaahi potufolofola ʻoku ʻi ai ha fakamoʻoni, pea tohi hoʻo fakamoʻoní.
Kapau ʻokú ke tā meʻalea, ʻahiʻahi faʻu ha foʻi hiva ʻokú ne maʻu e ongo ʻo ha foʻi veesi.
ʻEke ki he kau mēmipa ʻo e fāmilí pe kaungāmeʻá pe ko e hā e ngaahi veesi folofola ʻoku nau saiʻia aí.
ʻI hoʻo laukongá, tā ha fakatātā ʻo e ngaahi meʻa ʻoku fakamatalaʻí, hangē ko e kaufana ʻa Nīfai ne motú.
Lau mo ako maʻuloto ʻa e ngaahi veesi ʻoku fakaʻaongaʻi ke akoʻi ʻa e ngaahi lēsoni fakafaifekaú, ʻoku hā ʻi he vahe tolu ʻo e Malangaʻaki ʻEku Ongoongoleleí.
Lau ha tohi mei he Tohi Tapú ne teʻeki ke ke laukonga ai kimuʻa.
Fakatotolo ki he moʻui ʻa ha moʻungaʻi tangata ʻi he folofolá pea hiki ha lipooti ʻo hono piokālafí.
Fakafaivaʻi ha talanoa ʻi he folofolá ko ha konga ʻo e efiafi fakafāmilí pe ko ha ʻekitivitī faka-Siasi kehe.
Kumi ha kupuʻi lea mei ha taki faka-Siasi ke ʻalu fakataha mo e vahe takitaha kuó ke ʻosi laú.
Lau ʻa e ngaahi tokoni ki he folofolá, hangē ko e Talateu ki he Tohi ʻa Molomoná pe Fakahinohino ki he Ngaahi Folofolá.
Tuku ha taimi ke ke nofo ai ʻi tuʻa pea fakakaukau ki he fekauʻaki ʻa e meʻa ʻokú ke mamata ki aí mo e ongoongoleleí, pea kumi ha veesi fekauʻaki mo e meʻa naʻá ke akó.

ʻOku ʻi ai haʻo ngaahi fakakaukau pē ʻaʻau? Vahevahe ia ki ho ngaahi kaungāmeʻá!