E Dua na Raivotu ka Tuberi i Au ki na Dina
Au a raitayaloyalotaka beka li na ivakatakarakara?
Ena vica na yabaki sa oti, au a sota kei ira na daukaulotu, kau a tauvimate voli tiko. Au a vuturi voli , kau a vinakata ga meu vakila eso na veituberi ena noqu bula.
Au a sega ni vakila na nuidei se marautaka e dua na ka, vakabibi na Lotu oqo ka ratou tukuna tiko na daukaulotu. Ia , au digitaka ena vuturi meu lako ga ki na soqoni ni sakaramede ena imatai ni gauna.
Keirau salavata mai kei na tinaqu, ia ni keirau sa yacova yani na vale ni lotu, ea kida na utoqu niu raica e dua na matakau taliva koula e doka ni vale. Esa bau dua na irairai totoka dina duadua au se qai raica! E rairai vakacegu dina na vale oqo ka veisureti ka vukica taucoko na vu ni yaloqu , kau curu ki loma ena nanamaki.
Ena gauna ni sakaramede, au a kabulu, ka a rairai ki na noqu vakasama e dua na iyaloyalo kei Jisu. Niu a tubu cake tiko, au sa dau kilai Jisu tu ga, ia au a sega ni taleitaki koya me yacova mai e dua na gauna lekaleka oqo. Au a se sega vakadua ni wilika na iVolatabu. Kau e se sega dina ni kila e dua na ka baleta na vu ni mate nei Jisu Karisito ena kauveilatai se na cava e lewe tinikarua kina na Nona iApositolo se na vuna era vakatavuvulitaki Koya kina e vuqa na parofita.
Ia ena gauna o ya, au vakila niu sa semati Vua. A sa yaco me rairai ni dina vei au. Au vakila niu luvuci ena dua na yalo cecere ni loloma kei na gagadre meu vuli vakalevu sara. Au vakabauta ni sai Koya na ivurevure ni dina kei na loloma au vakasaqara voli tiko.
Ni oti e vica na siga, au a tarogi tinaqu me baleta na ivakatakarakara au a raica. Vaka me veilecayaki vakalailai o koya ka kaya ni sega ni raica rawa e dua na ivakatakarakara, ia ea vinakata me draiva sivita tale na vale me raica ni oti noqu vakamacalataka na kena totoka.
Ia ni keirau sa yacova yani na valenilotu, e sa yali na ivakatakarakara au a qai raica ga ena vica na siga sa oti. Au sega ni vakabauta rawa! E dua sa kautatani beka ?
E valenilotu ena macawa ka tarava, au a taroga e dua me baleta na ivakatakarakara. E veilecayaki ko yalewa ka kaya ni se sega vakadua ni dua na kena ivakatakarakara na vale. Ia niu vakamacalataka na irairai ni ivakatakarakara, e qai tukuna, “Oi! O tukuna tiko beka na ivakatakarakara kei Moronai? Era sega ni tiko ena veivale ni lotu, ia na kena ivakatakarakara e tu ena vuqa sara na valetabu.” A tukuna vei au ni o Moronai e dua na parofita ena iVola i Momani ka vakaitavi talega ena Veivakalesui mai.
Au sa kila niu a raitayaloyalotaka na ivakatakarakara. Ia au a vakasaqaqara ena iVola i Momani me tukuni Moronai. Au vulica ni a yali na nona matavuvale kei na itokani, ni a mosita na ivalavala ca kei vuravura, ia ni tu na ka kece oya, e se muria tikoga na ivakaro ni Kalou me taqomaka na dina. Au a vulica talega ni a rairai o koya kivei Josefa Simici ena vuqa na gauna me solia vua na itukutuku eso mai vua na Tamada Vakalomalagi. Na vulici Moronai kei na nona ivakavuvuli kei na nona lomasoli cecere me muri Karisito ka maroroya na dina e vukei au meu saumaki ena yaloqu taucoko ki na kosipeli.
Ena gauna sa rawa kina meu laki sikova na valetabu e Sapporo Japani, au qai raica na ivakatakarakara dina kei Moronai ena imatai ni gauna. Oqo na ivakatakarakara vata ga au a raica ena doka ni noqu vale ni lotu. Ia na kena au a raica ena siga o ya ea caudre ena iserau ka uasivita na vuravura oqo. Au vakabauta ni “ivakatakarakara makawaliliva” oya e dua na raivotu mai vua na Tamada Vakalomalagi, ka sureti au meu kunea na Nona loloma kei na dina ni kosipeli vakalesuimai i Jisu Karisito. Meu vulici ira na parofita ena gauna e liu me vakataki Moronai ena nona vakadinadinataki Karisito kei ira na parofita bula era sa kitaka me vakakina. Meu kunea na veidusimaki au a vakasaqara vagumatua tiko.
Au kila ni Turaga sa vakalesuya mai na kosipeli i Jisu Karisito ki vua na parofita o Josefa Simici ka tiko na parofita bula edai ka ra dusimaki mai Vua me ra kauta mai na dina ka vukei keda me da lesu tale ki vua na Tamada Vakalomalagi. Au kila ni o Jisu Karisito na ivurevure ni vakacegu kei na reki ena bula oqo vakakina na kena e tarava.
Na rarama ni nona kosipeli vakalesui mai kei na veivakalougatataki e solia taucoko sara na veisau ni noqu bula, ka vaka talega kina na imatai ni siga oya ni lotu, au kila ni na dusimaka na noqu bula na Tamada Vakalomalagi niu dau muri Koya kei ira na Nona italai.