Tubu vaka Daukaulotu ena gauna ni COVID-19

Mai vei Abril Islas

Na nomu vakanamata ena vu ni veisau taucoko.

Kevaka e dua ea tarogi au ena vica na vula sa oti na cava au raitayaloyalotaka ena noqu kaulotu, au na sega ni rawa ni tukuna na ilakolako a waraki au tu. Ia e dua na ka e tautauvata: Au se daukaulotu tikoga ena Na Lotu i Jisu Karisito ni Yalododonu Edaidai—ia oqo au sa daukaulotu talega ena gauna ni matedewa.

Ia na cava na kena ibalebale oqo?

E kena ibalebale me vinakata me cakava na loma ni Turaga ena sala e titobu sara. E kena ibalebale me tovolea me qarava na Turaga kei ira na Luvena ni sotava tiko na veisau tikoga. E kena ibalebale me da vulica vakatotolo me vuki vata kei na ituvaki vovou eso. E kena ibalebale me da vulica me levu cake na noda rawanimoici, yalorawarawa, dauvosota, ka dau loloma ena veisiga.

E kena ibalebale talega na noda sotava e levu na veilecayaki ka taroga e levu na taro vakaoqo:

“Ena rawa beka ni sa na vakau i vale ni mataka na noqu itokani?”

“Keimami na rawa beka ni toki ki na dua na vanua duidui ena vuku ni virus?”

“Na cava ena yaco vei ira na tamata eda vakavulica tiko ni da sa biubiu?”

Keirau sa tomana tiko na neirau veivakavulici ni kosipeli ena itukutuku raraba, ia e sega ni dau rawarawa—ia e sega sara ga ni kaulotu ka dua vei keda ea raitayaloyalotaka mai. Veitalia mada, eda se tu ga oqo, tudei ena vakatulewa me veiqaravi ena vanua cava ga, me qarava na Turaga se cava ga na ituvaki se na sala ni noda cakava, me da tara na yalodra na Luvena.

Na cava na vuna au se digitaka tikoga kina me veiqaravi?

Io, na dredre ni bula vakadaukaulotu era vakayago, vakasama, ka vakayalo—eda sa curuma taucoko e dua vei ira. Io, eda sa sotava tiko e levu na dredre ka na yaco me da sotava na ikuri ni bolebole eso, ia vakavinavinaka vei Jisu Karisito, ka solia na Nona bula ena vukuda, eda kila ni sa yaga na ka kecega.

Au sa qai kila ni sa kauwaitaki keda kece sara na Tamada Vakalomalagi. Sa kila tu oKoya ni na sega ni rawa vei ira eso na daukaulotu mera curuma na valetabu se butuka na loma ni koronivuli ni kaulotu ni bera ni ra biubiu yani ki na nodra kaulotu. E kila oKoya ni ra tiko na itabagone ka ra na sega ni rawa ni veiqaravi ena vanua era kacivi kina. Ia o ira na daukaulotu oqo era kila ni Turaga e lomani ka taqomaki keda me vaka ga ea dau cakava tu ga. Ka ni sa rauti keda na noda sasaga ena Nona rai. Eda sa vulica vakaidina sara ni rawa ni da qarava na Turaga ka wasea na nona kosipeli ena vanua kei na ituvaki cava ga. Ia e yaga sara.

Na cava e dau tosoi au tikoga ki liu?

Ena siga dredre, au sa kila kina ni rua na sala me saravi kina na gauna oqo:

Ena itutuniyalo vuturi, ka wawa vakariri me lesu tale na veika me davomatau.
Se ena dua na rai vou, vakarautaki ni takete, tuvatuvanaki taudonu ka vakaitaukei, ka taurivaki na ituvaki oqo me madigi ni caka veisau e gadrevi vakabalavu tu mai ia e dau lokuyarataki tu.

Au tovolea meu digitaka na ikarua ni digidigi. Niu vakasamataka na ituvaki ni bula ena gauna oqo, au vakasamataka ke rawa ni dua na madigi na COVID-19 me vukei keda meda marautaka vakalevu cake na noda veiwekani se vakauqeti keda meda dolava na yaloda vua na noda Dauniveibuli ka tuvakarau meda vakarorogo Vua. Ka meda vakaliuca vakalevu cake na kosipeli mai na noda dau cakava eliu.

Oqo e sega ni gauna dredre walega vei ira na daukaulotu—e dredre vei keda kece. Ia me vaka ga na nona kacivi ira eso o Kavetani Moronai me ra duavata ena sagai na bula galala (raica na Alama 46), eda sa kacivi talega meda tucake ka kakua ni rere. Ka kila ni dau tiko dina ga kei keda na Tamada Vakalomalagi, ka na vukei keda meda veiqaravi ena yaloda, igu, vakasama, kei na kaukauwa taucoko, se vakacava ga (raica na Vunau kei na Veiyalayalati 4:2).

Ni da sa daukaulotu ni Turaga, sa dodonu meda vakanamata tikoga vua na noda iVakabula kei na noda lalawa tawamudu. Meda nanuma tiko ni Tamada Vakalomalagi e lomani ira kece na Luvena ka gadreva meda lesu rawa Vua.

E dina ga, me vaka ni dredre na daukaulotu ena gauna COVID-19, e rawa ni da cakava na gauna oqo me dua ka vinaka duadua ni noda bula. E dina taucoko, sa yaco oqo vei au! Ia sa baleta ga na noqu vakanamata, baleta niu dau tovolea meu nanuma tiko na noqu lomana na Tamada Vakalomalagi kei na noqu gagadre meu vukei Koya me vakasoqoni ira vata mai na Isireli era sa veiseyaki tu. Kau kila ni na solia vei ira yadua na nona daukaulotu na loloma cecere ena noda cakava na noda vinaka taucoko me da vakayacora na veikacivi oqo sa solia vei keda oKoya.