Kakai Lalahi Kei Talavoú
Ko e Hoko ko ha Kau Tauhi Lelei Ange ʻo e Māmani Naʻe Faʻu ʻe he ʻOtuá Maʻatautolú
Fai ʻe ʻEletā Marcus B. Nash
ʻO e Kau Fitungofulú
Mei ha lea naʻe fai ʻi he Konifelenisi fakataʻu hono 18 ʻo e Senitā Stegner ʻi he ʻUnivēsiti ‘o ʻIutaá ʻi Sōleki Siti ʻi he ʻaho 12 ʻo ʻEpeleli 2013.
Ko e lelei ange ʻetau tokangaekina e māmani ko ʻení mo e meʻa kotoa ʻoku ʻi aí, ko e lelei ange ia ʻene poupouʻi, fakalotoa, fakaivia, fakaake mo fakafiefiaʻi hotau lotó mo hotau laumālié.
Ko hoku manakó ʻa natula, ʻo tatau ai pē pe ko e kaka moʻunga, sikī, ʻaʻalo pōpao ʻi tahi, heka pasikala, pe fononga he toafá. ʻI heʻeku kei siʻí, ne u manako ke u fononga ʻi he vao ʻakaú pea mo ongoʻi e fakamoʻoni vanavanaiki mo mahino ʻo e Fakatupú naʻe fakahaaʻi ʻe he ʻuluʻakau lalahi mo lanu matá. ʻI heʻeku tupu ʻo matuʻotuʻa angé, kuó u ʻilo ʻi he akó mo e tuí kapau ʻe mahino kiate kitautolu hotau tuʻungá, taumuʻa ʻo e moʻuí, mo e ʻuhinga naʻe fakatupu ai e māmaní—pea manatua ʻa e ngaahi meʻá ni—te tau tokangaekina e māmaní pea mo e meʻa kotoa ʻoku ʻi aí ʻi ha founga māʻolunga mo fakaʻeiʻeiki ange.
Ko e Taumuʻa ʻa e ʻOtuá ʻi hono Fakatupu ʻo e Māmaní
Kuo feinga ʻa e ʻEikí, ʻo fakafou ʻi Heʻene kau pālofita he kuohilí mo e lolotonga ní, ke tokoniʻi ke mahino kiate kitautolu mo tau houngaʻia ʻi he meʻaʻofa ʻo e moʻui ʻi he māmani fakaʻofoʻofa ko ʻení. ʻI he Fuakava Motuʻá, naʻe fakakaukau ʻa Tēvita ki he ngaahi fakatupu fakangeingeia ʻa e ʻOtuá pea fifili leʻolahi ki he ʻuhinga ʻoku tokanga ai e ʻOtuá ki he tangatá—ʻi he lotolotonga e ngaahi meʻa fakaofo kehé (vakai, Saame 8:4). Naʻe pehē ʻe Tēvita ʻoku makehe e faʻahinga ʻo e tangatá, “ʻo maʻulalo siʻi pē ʻi he kau ʻāngelo” (Saame 8:5).
Naʻe toe mamata ʻa Mōsese ʻi ha vīsone ki ha ngaahi māmani taʻefaʻalaua1 peá ne pehē, “Ko ʻeni, koeʻuhi ko e meʻá ni ʻoku ou ʻilo ko e meʻa noa pē ʻa e tangatá, ʻa ia ko ha meʻa naʻe teʻeki ai te u fakakaukau ki ai” (Mōsese 1:10).
ʻI he fakatōkilalo ʻa Mōsese ki he fungani ʻo e ngaahi fakatupu ʻa e ʻOtuá, ne ʻikai ai ke mahino kiate ia ha moʻoni maʻongoʻonga. Ko ia naʻe toe fakahā ʻe he ʻEikí kiate ia ʻEne ngaahi fakatupu taʻe fakangatangatá peá Ne fakahā mahino ko Iá—ko e ʻOtuá—naʻá Ne ngaohi e ngaahi fakatupú ni “ke fakahoko ʻa e moʻui taʻe–faʻa–mate mo e moʻui taʻengata ʻa e tangatá” (Mōsese 1:39). ʻOku fakataumuʻa ʻa e māmaní—ʻa e meʻa kotoa naʻe fakatupú—ke tokoniʻi kitautolu ke maʻu e moʻui taʻe‑faʻa‑maté mo e moʻui taʻengatá.
Naʻe folofola ʻe he ʻEikí ʻi Haʻane toe folofola kau ki he taumuʻa ʻo e māmaní, “Te tau ngaohi ha māmani ʻa ia ʻe lava ke nofo ai ʻa kinautolu [ko e ʻuhinga kiate kitautolu]; pea te tau siviʻi ʻa kinautolu ʻi he meʻá ni, ke vakai pe te nau fai ʻi he ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú” (ʻĒpalahame 3:24–25; vakai foki, veesi 26). ʻOku ʻomi ʻe he moʻui ʻi he māmaní, fakataha mo e meʻafoaki ʻo e tauʻatāina ke fili ʻi he angatonú, ʻa e faingamālie ke tau fili ke fekumi pea maʻu ʻi ha ʻaho ʻa e meʻa kotoa ʻoku foaki ʻe he ʻOtuá.2
ʻI he ʻosi hono fakatupu ʻo e māmaní, naʻe hōifua ʻa e ʻOtuá koeʻuhi naʻá Ne ʻafioʻi ʻe tokoni ia ki Heʻene taumuʻa maʻatautolu ko ʻEne fānaú.3 Ne ʻikai ʻomi noa pē e ngaahi foha mo e ngaahi ʻofefine ʻo e ʻOtuá mo e ngaahi fāmili ʻoku nau faʻú ki he māmani ko ʻení; ka ʻoku nau mahuʻinga ki hono taumuʻá.4
Ke Tau Hoko ko ha Kau Tauhi Lelei
Ko e moʻui ʻi he māmaní ko ha tāpuaki mo ha fatongia. ʻOku folofola ʻa e ʻEikí, “Vakai, ko e fanga manu ʻo e vaó mo e fanga manupuna ʻo e ʻataá, pea mo ia ʻoku tupu mei he kelekelé, kuo tuʻutuʻuni ke fakaʻaongaʻi ʻe he tangatá ki he meʻakai mo e kofu, pea ke ne maʻu ia ʻo lahi” (Tokāteline mo e Ngaahi Fuakava 49:19). Ka neongo ia, koeʻuhi ko e māmaní mo e meʻa kotoa pē ʻoku ʻi aí ko e “ngāue ia ʻa [Hono] nimá” (Tokāteline mo e Ngaahi Fuakava 29:25), ko e meʻa kotoa pē ʻoku ʻAʻana ia.5 Koeʻuhi ko e kau nofo fakataimi pē kitautolu ʻo e māmaní, ko e kau tauhi pē kitautolu—ʻoku ʻikai ʻatautolu ha meʻa. ʻI heʻene peheé, ʻoku tau haʻisia ki he ʻOtuá—ko e maʻu tofiʻá—ki he meʻa ʻoku tau fakahoko ʻaki ʻEne fakatupú: “He ʻoku taau mo au ko e ʻEikí, ke u fokotuʻu ʻa e tangata kotoa pē ke ne fakamatala ki heʻene hoko ko e tauhi ki he ngaahi tāpuaki fakamāmaní, ʻa ia kuó u ngaohi mo teuteu maʻa hoku kakaí” (Tokāteline mo e Ngaahi Fuakava 104:13).
Ko e founga ʻoku tau tokangaekina ʻaki e māmaní, founga ʻoku tau fakaʻaongaʻi mo fevahevaheʻaki ai ʻa hono ngaahi mahú, pea mo e founga ʻo ʻetau tauhi e meʻa kotoa pē kuo tokonaki maʻatautolú ko ha konga pē ia ʻa hotau siviʻi ʻi he moʻui ní. ʻOku fie maʻu ke tau fakaʻaongaʻi lelei e ngaahi meʻa kuo tokonaki ʻe he ʻEikí, fakaʻehiʻehi mei hono maumauʻi ʻo e ngaahi meʻa moʻuí mo e ngaahi maʻuʻanga tokoní, pea fakaʻaongaʻi e mahu ʻo e māmaní ke tauhi ʻaki e masivá.6 ʻOku mātuʻaki tokanga mai ʻa e ʻEikí ki he moʻui kotoa pē kae tautautefito ki Heʻene fānaú, pea te tau haʻisia ki he meʻa ʻoku tau fili ke fakahoko (pe ʻikai fakahoko) ʻaki e ngaahi mahu ʻo ʻEne fakatupú.
ʻOku talaʻofa mai ʻe he ʻEikí kiate kitautolu kapau te tau muimui ʻiate Ia pea ngāue fakapotopoto ʻaki e ngaahi maʻuʻanga tokoni ʻo e māmaní ʻi he fakafetaʻi mo e fakaʻapaʻapa, ʻoku “[tau] maʻu ʻa e mahu ʻo māmaní, ʻa e fanga manu ʻo e vaó mo e fanga manupuna ʻo e ʻataa. … Pea ʻoku fiefia ʻa e ʻOtuá ʻi heʻene foaki mai ʻa e ngaahi meʻá ni kotoa pē ki he faʻahinga ʻo e tangatá; he ko hono ʻuhinga ʻeni naʻe ngaohi ai iá, ke fakaʻaongaʻi ʻi he fakapotopoto, kae ʻikai ke fuʻu hulu, pea ʻikai foki ʻi he fakamālohi” (Tokāteline mo e Ngaahi Fuakava 59:16, 20).
ʻOku fie maʻu ke fakaʻaongaʻi ʻa e ngaahi maʻuʻanga tokoní ʻi he fakapotopoto mo e loto-houngaʻia, mo e taumuʻa ke tokoniʻi e niʻihi kehé—ʻi he lolotongá, kuohilí, mo e toʻu tangata ka hoko maí—ke nau maʻu e ngaahi tāpuaki ʻoku finangalo ʻa e Tamai Hēvaní maʻa ʻEne fānaú.
Sio ke fakalaka atu ʻIate Kitautolu
Meʻapangó, ʻoku tau moʻui ʻi he ʻaho ní ʻi ha māmani ʻoku fili ai ʻa e fakafoʻituituí ke siʻaki ʻa e ʻOtuá pea taʻetokaʻi ʻEne fakatupú. ʻI he taimi ʻoku hoko ai ʻení, ʻoku mamahi ʻa e ʻOtuá pea mo e meʻa naʻá Ne fakatupú.
Ne lekooti ʻe ʻĪnoke naʻe tutulu ʻa e ʻOtuá koeʻuhi ko e ngaahi fili taʻefakapotopoto mo siokita ʻa ʻEne fānaú.7 Naʻe kikite ʻa Molonai ʻi he ngaahi ʻaho fakaʻosí ʻe ʻi ai ʻa e “ngaahi afí, mo e ngaahi afaá, mo e ngaahi kohu ʻo e afi … [mo e] ngaahi meʻa fakalielia ʻi he funga ʻo e māmaní,” pea ʻe hoko fakataha e ngaahi tūkunga ko iá mo e “faʻahinga anga-fakalielia kotoa pē; ʻi he taimi ʻe ʻi ai ha tokolahi te nau pehē, Fai ʻeni, pe fai ʻena, pea ʻoku tatau ai pē” (Molomona 8:29, 31). ʻI he taimi ʻoku fakaʻuliʻi fakalaumālie pe fakatuʻasino ai ʻe he tangatá ʻa e māmaní, ʻoku ʻikai ngata pē ʻi he [mamahi ʻa e] ʻOtuá ka ʻoku toe mamahi foki mo natula!8
Ko e meʻa mahuʻingá, he ʻoku maʻu ʻe he ngaahi tāpuaki mo e mālohi ʻoku lava ke fou mai ʻi he Siasi ʻo e ʻEikí mo e ongoongolelei kuo fakafoki maí ʻa e ivi malava ke fakalahi mo liliu e laumālie ʻo e tangatá ʻo ope atu ʻi he meʻa te ne malavá, ke fakalotoa ʻa e ʻofa ʻa e ʻOtuá mo ʻEne ngaahi fakatupú, pea mo tokoniʻi kitautolu ke tau fakakaukau ki he lelei ʻa e niʻihi kehé mo faʻa fakakaukau ki he ngaahi fiemaʻu ʻa e toʻu tangata ka hoko maí.
ʻOku ʻOmi Kitautolu ʻe Natula ke Tau Ofi Ange ki he ʻOtuá
ʻOku maʻongoʻonga ange ʻa e māmaní mo e meʻa moʻui kotoa pē ʻi ha ngaahi meʻa pē ke fakaʻaongaʻi mo/pe maluʻi; ʻoku ʻi ai foki mo ha ngaahi meʻa ai ʻoku totonu ke fakatolonga! Ko e natula kei haohaoá mo e “ngaahi meʻa kotoa pē ʻoku tupu mei he kelekelé … kuo ngaohi ia ke ʻaonga … [ki] he faʻahinga ʻo e tangatá, ke fakamānako ki he matá pea fakafiefia foki ki he lotó … pea fakaake ʻa e laumālié” (Tokāteline mo e Ngaahi Fuakava 59:18–19).
ʻOku ʻomi kitautolu ʻe natula ʻi hono tuʻunga haohaoá ke tau ofi ange ki he ʻOtuá, fakaʻataʻatā ʻa e ʻatamaí mo e lotó mei he longoaʻa mo e ngaahi fakahohaʻa ʻo e koloa fakatuʻasinó, hiki hake kitautolu ki ha tuʻunga māʻolunga ange, ivi tākiekina lahi ange pea tokoniʻi kitautolu ke tau ʻilo lelei ange ki hotau ʻOtuá: “ʻOku takai ʻa e māmaní ʻi hono ongo kapakaú, pea ʻoku foaki mai ʻe he laʻaá ʻa hono māmá ʻi he ʻahó, pea ʻoku foaki ʻe he māhiná ʻa hono māmá ʻi he poʻulí, pea ʻoku foaki mai foki ʻe he ngaahi fetuʻú ʻa hono māmá. … ʻIlonga ha [taha] kuó ne mamata ki ha taha pe ko e siʻi taha ʻo e ngaahi meʻa ní, kuó ne mamata ki he ʻOtuá ʻoku hāʻele ʻi hono ngeiá mo e mafimafí” (Tokāteline mo e Ngaahi Fuakava 88:45, 47).
ʻOku ou kei saiʻia pē ke kaka māʻolunga he ʻotu moʻungá ʻi he lotolotonga ʻo e ngaahi maka kalānite fakaʻofoʻofa mo lilifá. Neongo ʻoku longonoa, ka ʻoku nau lea ʻaki ʻa e mālohi mo e ngeia ʻo e ʻOtuá—pea mo e fakaʻofoʻofa ʻo ʻEne poto taʻe-mafakatatauá. Hangē ko e fakamoʻoni ʻa ʻAlamaá, “ʻOku fakahā ʻe he meʻa kotoa pē ʻoku ʻi ai ha ʻOtua; ʻio, naʻa mo e māmaní pea mo e ngaahi meʻa kotoa ʻoku ʻi hono funga ʻo iá, … ʻoku nau fakamoʻoni ʻoku ʻi ai ha Tupuʻanga Fungani Māʻolunga” (ʻAlamā 30:44).
ʻOku ou saiʻia ʻi he sio fetuʻu he poʻulí, ʻo feinga ke makupusi ʻe hoku ʻatamaí ʻa e lahi fau ʻo e fetuʻu ʻi he ʻataá ʻoku ou lava ʻo sio ki aí. ʻOku ou ofo maʻu pē ʻi he ʻilo ko ia ʻoku haʻu ʻi he ngaahi momeniti longonoa ko ʻení, he neongo e lahi fau ʻa e ʻunivēsí ka ʻoku ʻafioʻi ʻe he ʻEikí ʻa e taʻeʻiloa ko aú. Pea ʻokú Ne ʻafioʻi kitautolu fakafoʻituitui. ʻOku fakamoʻoni ʻa e fakatupú ki he Tokotaha Fakatupú, pea kapau te tau tauhi ʻa e ngaahi feituʻu makehe mo teʻeki maumauʻi ko ʻení, te nau fakamoʻoni mahino mo loloto ki hotau ʻOtuá mo fakalotoʻi kitautolu ke tau hokohoko atu.
Ko e lelei ange ʻetau tokanga ki he māmani ko ʻení mo e meʻa kotoa ʻoku ʻi aí, ko e lelei ange ia ʻene poupouʻi, ueʻi fakalaumālie, fakamālohia, fakaake, mo fakafiefiaʻi hotau lotó mo hotau laumālié—mo teuteuʻi kitautolu ke tau nofo fakataha mo ʻetau Tamai Hēvaní mo hotau ngaahi fāmilí ʻi ha nāunau fakasilesitiale, ʻa ia ʻe hoko ko e māmani ʻoku tau ʻi ai he ʻaho ní, ka ʻi ha tuʻunga nāunauʻia.9
Fakatauange te tau tokangaekina ʻi he loto-houngaʻia ʻa e māmani ko ʻení—ko hotau ʻapi lolotonga pea ʻe malava ke hoko ko hotau ʻapi ʻi he kaha‘ú.