Ayaw Sipyata Kini nga Debosyonal
Mga Pakigsaad, mga Buaya, ug Ikaw
Gikan sa pakigpulong nga gihatag ngadto sa mga estudyante sa Ensign College sa Siyudad sa Salt Lake, Utah, USA, niadtong Oktubre 13, 2020. Basaha ang kompletong teksto sa ensign.edu.
Si Sister Sharon Eubank mipakigbahin unsaon sa paglikay nga luwas ra sa mga buaya nga nagpahipi sa kinabuhi, ug unsaon usab sa pagtabang sa uban nga makalikay niini.
Usahay kon mobiyahe ko, ang mga tawo mohatag kanako og usa ka butang nga importante ngadto nila. Ako bag-ohay lang nga mibisita sa panimalay sa usa ka tawo, ug ila kong gihatagan isip gasa og usa ka kahoy nga buaya nga ilang kinulit. Gipintalan kini sa maanindot nga paagi. Kini adunay mga kuko ug puti nga mga mata ug hinimo gikan sa kahoy nga gitina og berde.
Ako kining gibutang diin ako kining makita kada adlaw. Sultihan ko kamo nganong akong gitipigan kadto nga buaya. Nagpahinumdom kini kanako og usa ka butang nga makahuluganon ngari kanako, ug hinaot nga kini makahuluganon usab diha kaninyo.
Pag-atubang sa mga Buaya sa Kinabuhi
Pipila kaninyo tingali nasayod sa Mara nga Suba sa Kenya. Daghang mga matang sa ihalas nga hayop motabok sa suba sa piho nga mga panahon sa tuig aron moadto sa matam-is nga mga sagbot sa pikas nga bahin.
Apan ang suba mao usab ang panimalay sa mga Nile nga buaya nga adunay 15 ka pye(5m) nga gitas-on. Ang mga buaya ganahan sa paglalin sa mga panon ug sa kanunay maghulat alang sa sunod nila nga pagkaon.
Sa kasagaran, ang walay kasinatian nga mga hayop sama sa usa ka antelope dili mobati nga ang mga buaya, tungod sa ilang kalma nga kinaiya, makabutang nila sa pilegro. Sila molantaw sa suba ug makakita og usa ka inosenteng tan-awon nga hayop nga naglutaw taliwala sa mga tanom, busa sila moambak ug magsugod sa pagtabok sa suba. Dili nila matag-an ang kapaspas sa lihok sa mga buaya ug kon unsa kakusgan ang mga apapangig niini kon makapaak na og usa ka butang.
Usahay kita ang antelope ug si Satanas mao ang buaya. Sa atong kawalay kasinatian sa pagtabok sa tubig, kita makakita og mga buaya sa suba, apan dili nato sila maila nga peligro. Kita mobaliwala sa mga buaya ug deretso nga motabok sa sulog.
Ug sa kasagaran, usa ka panon ang mosunod kanato sa pagtuo nga kong kita moubog sa tubig, siguradong walay kuyaw kon sila usab moubog. Si Satanas maghulat hangtod ang tanan moabot sa lawom nga tubig, ug dayon siya moatake.
Ang atong Langitnong Amahan nasayod nga kita walay kasinatian ug bisan pa niana kinahanglan kitang motabok og mga suba, sa pasumbingay nga pagkasulti, sa atong mga kinabuhi. Dili kay Iyang kuhaon ang mga buaya gikan sa atong kinabuhi, apan Siya mohatag kanato og tabang aron makaabot sa pikas nga bahin sa suba.
Karon gusto kong maghisgot mahitungod nianang tulo ka mga tabang gikan sa Langitnong Amahan.
Sinati nga mga Zebra ug mga Wildebeest = Ang mga Kasulatan
Ang unang tabang nga Iyang gitanyag kanato mao kadtong kinsa malamposong nakatabok sa suba nga nag-una kanato. Kasagaran makakita kamo og mga antelope nga magsibsib sa daplin sa suba uban sa mga zebra ug mga wildebeest. Ang mga zebra ug mga wildebeest mas kadaghan motabok sa suba kay sa mga antelope. Kon sila makaistorya sa mga antelope, sila adunay daghang maistorya, apan ang mga antelope tingali dili kanunay nga interesado.
Asa man nakasulat ang mga kasinatian sa mga tawo kinsa malamposong nakatabok sa suba? Diha sa mga kasulatan.
Sige, tingali kamo moingon, tinuod kana, Sister Eubank, apan ang mga kasulatan wala maghisgot sa mga butang nga nahitabo sa akong kinabuhi.
Si Alma Hapit Nahimong Pagkaon sa Buaya
Tugoti ko sa paghatag og pananglitan mahitungod ni Alma nga Batan-on. Iyang gigahin ang iyang pagkahamtong sa pagbuhat sa tukmang katugbang sa unsay gusto sa iyang mga ginikanan nga iyang buhaton. Misukol siya batok sa Dios, mihunong siya sa pagsunod sa mga sugo, ug siya midaog-daog ug mibugal-bugal sa maayong mga tawo. Ug dayon dunay usa ka butang nga nahitabo usa ka adlaw niana. Usa ka anghel nagpakita ngadto kaniya. Sa mga pulong ni Alma:
“Ako gisakit uban sa walay katapusan nga kahasol. …
“Oo, ako nahinumdom sa tanan kong mga sala ug mga kadautan, diin ako gihasol uban sa mga kasakit sa impyerno; oo, ako nakakita nga ako misukol batok sa akong Dios. …
“Oo, ug ako nakabuno sa daghan niya nga mga anak, o sa ingon naglingla kanila ngadto sa kalaglagan” (Alma 36:12–14).
Kon buot sabton, si Alma milukso paingon sa tubig isip usa ka ignorante nga antelope ug dayon mibugal-bugal sa ubang antelope kinsa nagduha-duha sa pag-ubog sa tubig uban kaniya. Ug sa dihang silang tanan natanggong na sa sulog, ang mga buaya miliyok kanila ug misugod sa pagpaduol. Si Alma nadakpan. Gamhanang mga apapangig mipaak kaniya. Wala nay panahon sa pag-atras. Pagkaon na siya sa buaya.
“Ug nahinabo nga samtang ako sa ingon gisakit uban sa kahasol, … ako nakahinumdom usab nga nakabati sa akong amahan nga nanagna … mahitungod sa pag-anhi sa usa ka Jesukristo, usa ka anak sa Dios, aron sa pag-ula sa iyang dugo alang sa mga sala sa kalibutan.
“Karon, samtang ang akong hunahuna naghinuktok niini nga panumduman, ako nangamuyo sulod sa akong kasingkasing: O Jesus, ikaw nga Anak sa Dios, malooy ka kanako. …
“Ug karon, tan-awa, sa diha nga ako naghunahuna niini, ako wala na mahinumdom sa akong mga kasakit; oo, ako wala na samoka sa panumduman sa akong mga sala” (Alma 36:17–19).
Ang mga leksyon gikan niini nga mga kasulatan nga may kalabotan sa matag moderno nga mga problema nga inyong giatubang mao kini: si Jesus makailog sa usa ka samaran nga antelope gikan sa mga apapangig sa usa ka buaya ug mopahiuli pag-usab niana nga antelope ngadto sa kahimsog ug kahilwasan.
Imposible kana, moingon ka. Dili kana mahitabo basi sa eksakto o praktikal nga panghunahuna.
Apan tinuod kini.
Nahitabo kini sa ako mismong kinabuhi. Aduna koy mga uwat, apan kompleto ko. Mao kini ang milagro sa paghinulsol ug kapasayloan. Mao kana ang tibuok katuyoan sa ebanghelyo. Kini nahitabo ni Alma, ug kini mahimong mahitabo kanimo. Ang Ginoong Dios dili na mohinumdom sa imong mga sala, ug ikaw mahimong gawasnon na. Dili pa gayod ulahi alang kanimo kon ikaw mohangyo ni Jesukristo aron malooy kanimo ug mobiya sa imong mga sala.
Kitang tanan kinahanglan nga mobasa sa mga istorya sa sumbingay nga mga zebra ug mga wildebeest ug sa naluwas nga mga antelope, ug kini gisulat alang kanato diha sa mga kasulatan. Nagkinahanglan kita niini tungod kay kita makahimo og daghan kaayong mga sayop, ug kini nagtudlo kanato ngadto sa paghinulsol ug kapasayloan diha ni Jesukristo.
Mga Sakayan = Mga Pakigsaad
Ang ikaduhang tabang nga gihatag sa Ginoo kanato sa paglatas sa tubig mao ang sakayan. Ang sakayan mopataas kanato gikan sa tubig, gilibotan sa manalipod nga bongbong aron dili kasulod ang mga buaya. Ang mga sakayan mahimong butangan og mga layag aron modakop sa hangin o mga makina aron mopadagan niini batok sa agos sa tubig, ug mga timon aron mahimong mas sayon ang pagpaliko.
Pipila ka tuig ang milabay, ako misakay og usa ka gamay nga kayak kuyog sa usa ka higala.
Ganahan mi nga motabok sa kadagatan diin nangisda og dagkong uwang ang mga sakayan ug mobisita sa usa ka gamay nga isla. Kami dili kaayo sinati sa mga sakayan, apan sa wala madugay among nadiskobrehan nga ang mga sikaranan sa sakayan maoy mopalihok sa usa ka gamay nga timon. Ang timon mao ang usa ka gamay nga kapay sa luyo nga maoy mopaliko sa kayak sa direksyon nga among gusto.
Kami miabot sa isla ug nalingaw kaayo sa among pagsuroy-suroy, ug dayon nagsugod ang ginagmay nga mga balod ug naghunahuna mi nga kinahanglan na kami nga mobalik sa dakong yuta [mainland]. Busa kami misakay na ug misugod sa pagbiyahe tabok niana nga agianan, apan sa kalit lang nahimong lisod na kaayo ang pagmaniho sa sakayan.
Dugay-dugay kong nakaamgo nga nakalimot diay ko sa pagpaubos sa timon human sa among pagkanaog didto sa isla. Kini mipakita kanako kon unsa ka importante kadtong gamay nga kapay.
Ang atong mga pakigsaad sama sa mga sakayan. Kini nagpalibot kanato sa usa ka mapanalipod nga bongbong samtang kita motabok sa suba ug mopalayo nato gikan sa baloron nga tubig ug gikan sa mga buaya. Kon kita maningkamot sa pagtuman sa atong mga pakigsaad sa bunyag ug sa templo, ang Espiritu Santo (sama nianang gamay nga kapay sa luyo sa sakayan) makagiya kanato, modala kanato, ngadto sa kalma nga katubigan.
Apan kita kinahanglang mohinumdom sa Espiritu Santo ug dili malimot sa pagpaapil Kaniya sa atong mga kinabuhi. Ang atong pagpanaw makalilisang kon wala ang Iyang tabang.
“Salig sa Ginoo sa bug-os mong kasingkasing. Ayaw gayod pagsalig sa imong kaalam.
“Hinumdomi siya sa tanan mong buhaton ug tultolan ka niya sa matarong nga dalan.”
Mohangyo ko ninyo nga dili ibaliwala ang inyong mga pakigsaad. Kini mas gamhanan kaysa atong nahibaloan. Kamo mahimong magtuo nga ang inyong mga saad usa lamang ka gamay nga sakayan, apan sa kataposan kini motubo ngadto sa usa ka dakong barko sa kadagatan nga makaluwas sa gatusan ka mga tawo.
Sama nga ang inyong mga pakigsaad mahinungdanon kaayo alang kaninyo, kini usab mahinungdanon kaayo alang sa uban.
Ang Talan-awon ibabaw sa Suba = Mga Pulong sa mga Propeta
Ang ikatulo nga tabang mao ang talan-awon gikan sa ibabaw. Gikan sa atong panan-aw sa daplin sa suba, halos imposible nga makakita sa malinglahon nga mga buaya nga nagtago, apan gikan sa ibabaw, kini sayon nga makita.
Ang mga propeta mahimong sama sa usa ka gamay nga drone. Ang Ginoo mopakita kanila sa mga butang gikan sa lahi nga anggulo, ug sila makasulti kanato mahitungod sa mga dapit ug mga kalihokan sa mga buaya diha sa atong mga kinabuhi.
Ang Amos 3:7 tinuod kaayo sa atong panahon sama nga kini tinuod sa liboan ka mga katuigan: “Sa pagkatinuod, ang tanang himoon sa Ginoong Dios ipahibalo gayod niya sa iyang mga alagad nga mga propeta.”
Sa kinatibuk-ang komperensya, ang mga propeta mopakigbahin kanato sa talan-awon gikan sa ibabaw. Usa ka butang nga akong nadungog gikan ni Presidente Nelson sa miaging kinatibuk-ang komperensya mao nga ang Israel wala gitawag nga mahimong mas maayo pa kay sa uban, dili ang bugtong “gipili” nga mga tawo nga maluwas, apan hinoon sila gitawag nga mahimong usa ka bandila, usa ka timailhan ngadto sa ubang mga tawo sa pagpakita kanila kon asa ang Israel gipundok.
Tanan kadtong andam nga motugot sa Dios nga maoy mopatigbabaw sa ilang mga kinabuhi gipundok na aron makighimamat sa ilang Dios.
Si Jesus nagtawag sa tanan nga mga katawhan ngadto Kaniya: “Dali, sunod kanako.” Dihang kamo misulod sa tubig sa bunyag, dihang kamo miambit sa sakramento o midawat sa inyong pagtuga sa templo, kamo midala diha kaninyo sa ngalan ni Jesukristo. Kamo pweding mamahimo nga Iyang timailhan.
Ang inyong trabaho isip ang timailhan mao ang:
-
Pagtudlo sa mga tawo ngadto sa mga kasinatian diha sa mga kasulatan nga makatudlo nila kon unsay buhaton.
-
Pagtabang kanila nga maandam ug makahimo sa ilang kaugalingong mga sakayan sa pakigsaad.
-
Pagpaminaw sa mga direksyon nga nagagikan sa mas taas nga panglantaw.
Kini dili mahitungod lang kaninyo. Mahitungod kini sa tanang mga tawo nga inyong matabangan aron makalabang ngadto sa kahilwasan.
Ako mohatag sa akong personal nga pagsaksi nga ang Dios nakaila kaninyo; Siya nakaila sa inyong ngalan, ug sa inyong mga kahadlok, ug usab sa inyong mga paglaom ug mga kalig-on. Ako mopamatuod nga kamo adunay usa ka buluhaton nga kinahanglang lihokon. Barog ug pagmahimong usa ka timailhan ngadto sa mga nasod. Hinaot nga ang Ginoo mopanalangin kaninyo samtang kamo maningkamot.