Nahaunang Kababayen-an sa Pagpahiuli
Si Jane Nagmaya sa Tibuok Biyahe
Kita ba, sama ni Jane Manning James, determinado sa pagkompleto sa atong panaw inubanan sa hugot nga pagtuo?
Paghulagway pinaagi ni Toni Oka
Si Jane Manning James gikapoy sa paglakaw, apan midumili siya sa paghunong.
Ang iyang kinamagulangang anak, si Sylvester, igo na ang gidak-on nga naglakaw tupad sa karwahe. Apan ang batang si Silas, kinsa natawo diha sa agianan, kinahanglan gihapon nga kuguson. Sa 1847 kadto, ug ang pamilyang James sa wala madugay nakauban sa unang mga pioneer nga nangabut sa walog sa Great Salt Lake.
Si Jane dili na bag-ohay lang sa tag-as nga biyahe.
Sa nahaunang upat ka tuig. ang iyang pamilya mibiya sa ilang panimalay sa usa ka silangang siyudad aron sa pag-apil sa mga Santos sa Nauvoo, diha sa ngilit nga dapit sa kasadpan. Ang biyahe mokabat lang unta og pipila ka adlaw agi sa suba. Apan tungod kay daghang itom og pamanit nga mga tawo ang ulipon sa Estados Unidos niadtong higayuna, ang pamilya ni Jane sa kanunay gikinahanglan nga mopakita og daghang papeles sa pagmatuod sa ilang kagawasan. Ug ang ubang mga dapit adunay higpit nga mga balaod nga nagpugong sa itom og pamanit nga mga taso sa pagbiyahe latas sa dapit—lakip sa pagbayad sa kantidad nga $500 kada tawo aron makaagi.
Tingali tungod niining grabe nga bayad o tingali sa uban nga mga pagpihig, ang mga tripolante sa barko sa suba mibalibad sa pagpasakay ni Jane ug sa iyang mga sakop sa pamilya. Wala nagpaapekto, ilang gibiyaan ang kadaghanan sa ilang mga kabtangan ug misugod sa pagbaktas dala ang bisan unsa nga ilang madala.
Ang pamilya ni Jane milakaw og sobra sa 800 ka milya (1,287 km). Milakaw sila latas sa kaalimuot sa panahon ug mangiob nga mga kagabhion. Kausa mibaktas sila agi sa usa ka lasang, natulog nga walay kapasilongan. Sa ilang pagmata, ang ilang mga sinena namuti sa mitabon nga yelo.
“Nanglakaw mi hangtud nga napudpud ang among mga sapatos, ug among mga tiil nagsakit na ug nangapaslot ug nagdugo,” mihinumdom si Jane. “… Mihangyo kami sa Dios ang Mahangturong Amahan sa pag-ayo sa among mga tiil ug ang among mga pag-ampo natubag.”1
Samtang naglahutay niining lisud nga panaw, si Jane mikanta og mga himno duyog sa iyang mga ginikanan ug mga igsoon, sa pagdayeg sa Dios. Sa katapusan, human sa dul-an tulo ka bulan nga paglakaw, miabut sila sa Nauvoo. Paglabay sa katuigan, sa dihang ang matinud-anong mga Santos mibiya aron motabok sa kapatagan, si Jane usa sa unang mga pioneer nga misugod og lakaw sa agianan.